Skip to main content

Spreuke 31:1-31

Written by Chris van Wyk on . Posted in Kronologiese Bybelleesplan.

Wyse woorde van en oor ‘n knap vrou

Spreuke 31:1-7

Dit val op hoe die boek Spreuke omraam word deur die pa in gesprek met sy seun (hfst 1-9) aan die begin van die boek, en hier die ma in gesprek met haar seun (hfst 31) aan die einde van die boek. Dit wys nie net hoe ewewigtig die boek aan mekaar gesit is nie, deur metafories aan albei ouers se onderrig aandag te gee, maar ook hoe noodsaaklik beide ouers se onderrig en leiding in ‘n kind se lewe geag word.

Dit is opvallend hoe die ma haar seun se onderskeidingsvermoë juis oor vrouens wil opskerp, maar op ‘n ander wyse as wat die pa vroeër gedoen het. Waar die pa baie uitgebrei het oor hoe vreeslik dit is om te val in die hande van die vreemde vrou (in drie al hoe langer en uitgebreide gedeeltes), en min gesê het oor die waarde van die regte vrou, doen die ma dit andersom.

Sy is duidelik ook wie hy moet vermy, maar doen dit kort en kragtig in 2 verse (Spr 31:2-3). Sy sê net dit is ‘n vermorsing van sy krag. Hy het beter dinge om te doen.

Sy is eintlik meer bekommerd oor drank, as oor die vreemde vrou, want dit rig regtig skade aan. Sy gebruik 3 keer meer verse daarvoor (Spr 31:4-9) as om oor die vreemde vrou uit te brei!

Let ook op hoe sy haar onderrig verbind aan ‘n gelofte wat sy oor haar kind afgelê het, ‘n verbintenis aan hom wat sy voor die Here gedoen het. Haar onderrig is deel van haar manier om dié gelofte na te kom.

Die probleem van drank word uitgespel in terme van vergeetagtigheid ten opsigte van die wet, en die minagting van die regte van minderbevoorregtes (Spr 31:5). Drank daarenteen is vir dié wat besig is om onder te gaan, dié wat swaar ly, want as hulle drink vergeet hulle van hulle armoede en moeilikheid (Spr 31:6-7). Die koning moet nooit van hulle nood vergeet nie, en daadwerklik iets daaraan doen.

Spreuke 31:8-9

Die ma se raad is dat die koning moet praat vir dié wat self nie hulle sê kan sê nie, en opkom vir die regte van dié wat te gronde gaan (Spr 31:8). Die armes en ellendiges is die koning se primêre regsverantwoordelikheid (Spr 31:9).

Spreuke 31:10-17

Teenoor die kort aandag wat die ma aan die vreemde vroue verleen (2 verse), staan die lied oor die regte vrou wat in ‘n oorvloedige sin, in ‘n fyn uitgewerkte akrostiese gedig (22 verse wat telkens met ‘n opeenvolgende letter van die Hebreeuse alfabet begin), die lof van die regte vrou besing, dié een met wie die koning sy lewe moet deel.

En die ma brei uitvoerig uit oor die geweldige voordele wat só ‘n vrou vir hom sal hê. Hy kan en moet haar op geen manier mis nie! Dit is die tipe onderrig wat verandering bring, omdat dit uitnooi na ‘n baie beter toekoms met ‘n helder aantreklike visioenêre prentjie daarvan!

Só ‘n vrou het 22 voordele. Die eerste agt voordele is:

  1. Sy is baie kosbaar, meer werd as edelstene – Spreuke 31:10.
  2. Sy is ‘n steunpilaar vir haar man wat die vrugte van haar werk pluk – Spreuke 31:11.
  3. Sy bring net voordeel haar lewe lank – Spreuke 31:12.
  4. Sy is vaardig met die verwerking van ru stowwe, wol en vlas – Spreuke 31:13.
  5. Sy sorg dat daar (eksotiese?) kos is – Spreuke 31:14.
  6. Sy maak kos – Spreuke 31:15.
  7. Sy dryf handel met grond en wingerd – Spreuke 31:16.
  8. Sy doen alles met passie, haar hande staan vir niks verkeerd nie – Spreuke 31:17.

Spreuke 31:18-24

Die volgende sewe voordele van ‘n knap vrou is:

  1. Sy dryf ‘n begroting, al moet haar lamp laatnag aan die brand bly – Spreuke 31:18.
  2. Sy produseer goedere met die spinwiel – Spreuke 31:19.
  3. Sy is vrygewig en sorg vir die armes – Spreuke 31:20.
  4. Sy sorg dat haar gesin klere het teen die koue – Spreuke 31:21.
  5. Sy maak self beddegoed en klere van linne en wol – Spreuke 31:22.
  6. Sy sorg dat haar man met die leiers kan beraadslaag – Spreuke 31:23.
  7. Sy bedryf ‘n besigheid met klere en gordels – Spreuke 31:24

Spreuke 31:25-31

Die laaste sewe voordele van ‘n knap vrou is:

  1. Sy het ‘n sterk en edel persoonlikheid – Spreuke 31:25.
  2. Sy praat met wysheid en gee leiding met liefde – Spreuke 31:26.
  3. Sy hou goeie toesig oor haar huishouding – Spreuke 31:27.
  4. Sy is haar kinders se trots, haar man bewonder haar – Spreuke 31:28.
  5. Sy is voortreflik onder die knap vrouens – Spreuke 31:29.
  6. Sy leef in ontsag vir die Here – Spreuke 31:30.
  7. Sy word in die gemeenskap geëer – Spreuke 31:31.

Natuurlik is hierdie skets die prentjie van ‘n ideale vrou. Maar dit wil eintlik net ‘n prentjie gee van wat moontlik is as potensiaal toegelaat word om te ontwikkel. En na watter tipe eienskappe gekyk moet word in ‘n toekomstige lewensmaat.

Ek sluit af met ‘n bykomende manier van interpretasie. ‘n Mens kan die gedig oor hierdie vrou ook as ‘n verdere verpersoonliking van Vrou Wysheid in Spreuke sien.

Dit beteken dan dat Vrou Wysheid nie net by die Skepping teenwoordig was nie (Spr 8), nie net almal uitnooi om van haar wyshede te geniet nie (Spr 9), maar haar woning by ons in die werklike lewe kom maak, as’t ware die metgesel van ‘n werklike persoon word (Spr 31). Dit is nou jy!

Soos Murphy (Word) dit so pragtig stel:

“She is not some lofty, remote ideal for those initiated into her mysteries, but a practical, ever-present, faithful guide and lifelong companion for all who choose her ways. Her origins are with God (8:22–30) and her teaching wins blessings from God (8:35). But her home is in this world. This is the way Wisdom herself wanted it. Even while she was beside the Creator, playing before him, she was also, in her own words from 8:31: rejoicing in his inhabited world and delighting in the sons of men.”

View all posts in this series

Discover more from Bybelskool

Subscribe to get the latest posts sent to your email.

Kronologiese Bybelleesplan

Chris van Wyk

Ek is Direkteur van Bediening en Geestelike Vorming by Veritas College International. My passie in die lewe is om God bo alles te dien en gelowiges in geloofsvorming te begelei. I am Director of Ministry and Spiritual Formation at Veritas College International. My passion in life is to serve God above all and to lead believers in faith formation.

Maak 'n opmerking

Onlangse kommentaar