Bybelskool

Geloofsgewoontes

Drie basiese geloofsgewoontes

Hier is die drie basiese geloofsgewoontes wat deur die eeue gelowiges gehelp het in geloofsvorming.

  1. Die eerste is die daaglikse ondersoek in gebed.
  2. Die tweede is die geestelike lees van die Bybel.
  3. Die derde is die beoefening van die teenwoordigheid van God.

Soos ‘n mens groei in die beoefening van hierdie drie geloofsgewoonte verdiep jou geloof en groei jy in geestelike volwassenheid.

1. Die daaglikse ondersoek in gebed

Die eerste geloofsgewoonte fokus op selfondersoek.

Dit lê jou diepste motiverings en bedoelings in die lewe bloot sodat jy deur God se krag daarvan verlos kan word.  Deur die eeue is daar drie basiese dinge geïdentifiseer wat veral in dié suiweringsproses gebeur.  Jy raak bewus van jou hoogmoed, wellus en gierigheid en word daarvan verlos.

2. Die geestelike lees van die Bybel

Die tweede geloofsgewoonte is die geestelike lees van die Bybel.

Dit laat God se Woord toe om tot in die diepste dele van jou menswees te skyn. Jy lees nie net die Woord vir inligting nie, maar dink ook na oor die praktiese betekenis van die teks vir jou lewe en word deur die Woord gevorm en verander.

3. Die beoefening van die teenwoordigheid van God

Die derde geloofsgewoonte het te make met die ervaring dat God se wil en strewe jou lewe so vol maak dat die lewe vir jou Christus word.

Jy leer om elke dag al hoe meer bewustelik in die teenwoordigheid van die Here te lewe, totdat jou hele lewe deur God gestempel word.

Al drie hierdie geloofsgewoontes is belangrik. ‘n Mens kan kies om jou dag af te sluit met die daaglikse ondersoek, die dag te begin met die geestelike lees van die Bybel en deur die dag te fokus op die beoefening van die teenwoordigheid van God. Of jy kan kies om die eerste twee te kombineer in jou stiltetyd (soos ek dit verkies) en steeds die derde geloofsgewoonte te beoefen deur die dag.

Joernaal

Vir al drie hierdie geloofsgewoontes is dit belangrik om een of ander vorm van joernaal te hou.  Dit help jou om jou gedagtes neer te skryf en só op ‘n geestelike reis te gaan met die Here.

‘n Joernaal help jou om gefokusde aandag te gee aan die dinge wat gebeur in jou lewe.  Dit help jou om bewustelik en sistematies te reflekteer oor jou verhouding met die Here. Soos Psalm 16:8 sê: “Ek hou die Here altyd voor oë.”  Dit help jou veral om God se teenwoordigheid en betrokkenheid in jou lewe te begin raaksien.  Benewens die feit dat die neerskryf van jou ervarings jou help om dit te verwoord, vorm dit mettertyd ‘n skriftelike rekord van jou verhouding met God.

‘n Joernaal kan daagliks of weekliks gehou word.  Dit is baie persoonlik en moet aanpas by jou lewensfase of manier van werk.  Soos Adele Calhoun sê: “Journaling is a way for you to be with God and your thoughts, not an exercise in language arts.”  Daarom moet jy dit ook so eerlik as moontlik doen, sodat jy God se pad met jou kan raaksien.  In die periodieke nadenke en refleksie oor wat jy geskryf het, kom jy herhalende temas in jou lewe agter wat jou sal help om jou behoeftes, frustrasies en verwagtinge in lyn met God se doel en wil vir jou lewe te bring (Fil. 4:4-9).

‘n Joernaal is ook veral waardevol wanneer jy deur tye van verandering gaan en dit jou kan help om rigting binne jou veranderende omstandighede te vind.  God is immers betrokke in alles wat met jou gebeur, ook in tye van verandering.  ‘n Joernaal help jou om veral die herhalende patrone en rigting van God se werk in jou lewe raak te sien.

‘n Joernaal kan baie verskillende vorme aanneem.  Hier is ‘n paar idees:

  • Begin deur net jou ervarings daagliks of weekliks neer te skryf.
  • As daar artikels is wat ‘n betekenisvolle impak op jou verhouding met God gehad het, oorweeg om dit te versamel en in jou joernaal te plak met jou kommentaar daarby (in ‘n boek of elektronies).
  • Sommige mense vind dat daar gedigte of aanhalings is wat hulle tref en help in hulle reis met God.  Skryf dit neer of plak dit in jou joernaal.
  • Ander mense werk meer visueel en sal baat vind om simbole of grafika van die dinge wat hulle raak in hul reis met God in ‘n joernaal te plaas.
  • Fokus óf op jou private verhouding met God óf op jou persoonlike reis in jou werk of bediening. Jy kan dit ook afwissel of kombineer.
  • Skryf jou gebede in jou joernaal neer.  Dit help jou om God se antwoorde op jou gebede raak te sien.
  • Jy kan ook fokus op dinge waaroor jy dankbaar is– ‘n dankie-sê joernaal (gratitude journal).  Jy kan dit ook met ander reisgenote deel – hetsy in jou familie- of vriendekring.
  • Neem van tyd tot tyd bestek op van wat jy geskryf het, en probeer patrone of fases in jou verhouding met God raaksien.  Bring dit in gebed na die Here en vra vir insig en wysheid.
  • Jy kan só ‘n joernaal ook hou in jou nadenke oor iemand ná aan jou, ‘n kind se gesegdes en ervaringe in die grootword proses, wat ‘n besondere geskenk kan wees as hy of sy mondig word of die volwasse lewe begin.

Hoe jy dit doen, kan baie verskil, maar dat jy dit op een of ander manier doen, is belangrik. Kies dus ‘n manier wat vir jou sal werk en kombineer dit met die daaglikse ondersoek óf die geestelike lees van die Bybel.

Kies ‘n geloofsgewoonte

Ek stel voor dat jy die geloofsreis as volg doen:

  1. Week een tot twee doen jy elke dag die daaglikse ondersoek soos ek dit voorskryf.
  2. Week drie tot vier konsentreer jy op die geestelike lees aan die hand van die voorbeeld wat ek gee.
  3. Week vyf tot ses konsentreer jy op die beoefening van die teenwoordigheid van God volgens een of meer van die voorbeelde wat ek gee.

Herhaal na ses weke nog twee keer

Na ses weke herhaal jy nog twee keer die proses en gebruik elke twee weke van die ander voorbeelde wat ek by die onderskeie geloofsgewoontes gee. Jy sal agterkom dat daar voorbeelde is wat vir jou beter werk as ander.

Ná jy 18 weke op hierdie reis was, sal die geloofgewoontes goed genoeg ingeoefen wees om dit deel van jou normale geloofsreis te maak.

Begin hier

Klik op die inleiding van die geloofsgewoonte wat jy gaan beoefen om jouself te oriënteer. Daarna klik jy op die skakels hieronder soos jy vorder met die proses. Elke twee weke sal ek ‘n ekstra geloofspraktyk laai by elke geloofsgewoonte wat jy dan kan inspan op jou geloofsreis.

Geniet!

Daaglikse ondersoek

Lees die inleiding hieronder en fokus op die eerste geloofspraktyk in week 1-2. Herhaal met die tweede een wanneer ek dit plaas in week 7-8. En die derde een in week 13-14. Ek gee daarna ook ekstra geloofspraktyke indien jy nog verder wil werk hieraan.

Geestelike lees

Lees die inleiding hieronder en fokus op die eerste geloofspraktyk in week 3-4.  Herhaal met die tweede een wanneer ek dit plaas in week 9-10. En die derde een in week 15-16. Ek volstaan met dié drie geloofspraktyke.

Beoefen die teenwoordigheid van God

Lees die inleiding hieronder en fokus op die eerste geloofspraktyk in week 5-6.  Herhaal met die tweede een wanneer ek dit plaas in week 11-12. En die derde een in week 17-18. Ek gee daarna ook ekstra geloofspraktyke indien jy nog verder wil werk hieraan.

     

Onlangse kommentaar

  • Avatar

    Chris van Wyk

    |

    Ek het net die stof wat op die webtuiste is, beskikbaar:
    Die brief van 2 Korintiërs
    2 Korintiërs 1:1-2:11 – God gee moed in elke omstandigheid
    2 Korintiërs 2:12-3:18 – Ons raak God se woorde aan die wêreld
    2 Korintiërs 4:1-5:10 – Om te lewe soos Hy dit wil
    2 Korintiërs 5:11-6:13 – Ambassadeurs van die versoening
    2 Korintiërs 6:14-7:16 – Toegewy aan God alleen
    2 Korintiërs 8-9 – Vrygewigheid is regverdig
    2 Korintiërs 10 – Om te bou en nie af te breek nie
    2 Korintiërs 11 – Goddelike bekommernisse en besorgdheid
    2 Korintiërs 12 – As ek swak is, is ek sterk
    2 Korintiërs 13 – Groei in geestelike volwassenheid

  • Avatar

    Martie

    |

    Hi Chris
    Ons het bybelstudie gehad oor 1Korntiers nou soek ek graag n bybelstudie in boekvorm vir 2Korintiers

    Groete

  • Avatar

    Chris van Wyk

    |

    Hi André. Ja, vir werkendes is die daaglikse tyd van afsondering eintlik die enigste moontlikheid. My ervaring is egter dat as ‘n mens nie só iets beplan nie, kom jy nooit so ver nie. Ek het nou self begin met die vaste gebedstyd as ‘n riglyn (eintlik nog net die oggendgebed en soms die aandgebed) en dit raak ‘n kosbare tyd van stilte vroegoggend. Ek het egter ‘n regte retraite nodig om heeltemal stil te raak weens my program. Kon dit darem al ‘n paar keer vir so 3 dae doen by Deon Loots se Shama. Dit is van onskatbare waarde vir my.

  • Avatar

    A Kritzinger

    |

    Chris – baie dankie vir jou plasings!
    Tov dié een oor tye van afsondering maak ek graag ‘n opmerking. Die meeste mense moet maar “tevrede wees” met die daaglikse tye.
    Die weeklikse tye van afsondering klink wonderlik. Maar ek ken so baie mense wat Maandag tot Vrydag 7vm die huis verlaat werk toe en dan saans teen 18:00 tuis kom. Sommiges werk nog soms 2 Saterdae per maand ook. Dan is daar die gewone sake wat aandag kry Saterdae en Sondae is betrokkenheid in hulle plaaslike gemeentes…
    Vir hulle kan ‘n oggend per week net nie prakties werk nie.

    Of het jy ander raad?

  • Avatar

    Chris van Wyk

    |

    Hi Jan. Die paaie het vóór dié vergadering in Jerusalem al uitmekaar begin beur met die Joodse Christene wat die nakoming van die hele wet voorgestaan het, en die Christene uit die heidene wat vrae gevra het daaroor. Die hoop bestaan dus altyd dat ‘n kerk – en ek sluit alle kerke in – die onderlinge teologiese spanninge aan die hand van dié vier fases van geloofsonderskeiding sal oplos. Dit het vir die kerk in Jerusalem toentertyd gewerk. My hoop is steeds dat dit by die NG Kerk – en alle ander kerke wat worstel met praktiese gehoorsaamheid aan die Skrif – kan werk.

    Die uitkoms van dié vergadering in Jerusalem was interessant genoeg om raak te sien dat die seremoniële en burgerlike kante van die wet in Christus opgehef is. Maar, dat die morele kant van die wet vir almal geldig sal bly, veral in terme van afgodery (uit die eerste tafel van die wet en Jesus se opsomming van die belangrikste gebod) en onsedelikheid (uit die tweede tafel van die wet en Jesus se talle voorskrifte oor reinheid, bv Markus 7 en Matteus 19).

    Geen wonder nie dat Jesus dit weereens beklemtoon in sy brief aan Tiatira in Openbaring 2 dat afgodery en onsedelikheid gemeentes – persoonlik en korporatief – aan die straf van die Here self onderwerp. Hoe tegelyk veronrustend en vertroostend klink Jesus se woorde nie vandag ook nog nie:

    Haar volgelinge sal Ek deur ’n pessiekte om die lewe bring. Dan sal al die gemeentes weet dat dit Ek is, die Een wat die gedagtes en begeertes van die mens deurgrond. Ek sal elkeen van julle straf volgens julle doen en late. Maar vir julle ander in Tiatira, wat nie hierdie leer aanhang en nie die ‘diep geheimenisse van die Satan’, soos hulle dit noem, leer ken het nie, sê Ek: Ek lê op julle geen ander verpligting nie; hou net vas wat julle het, totdat Ek kom.” (Openb 2:23-25).

    Daarmee onderstreep Jesus dat die morele aspekte van die wet van God tot in ewigheid geldig sal bly. Dit is ook dié aspekte van die wet wat die Gees in ons harte inskryf soos ons by Paulus in Galasiërs 5, Romeine 8, en Efesiërs 4 agterkom. Paulus verbind in Romeine 1 selfs nog nouer afgodery en onsedelikheid, waar die onsedelikheid (en ‘n rits ander sondes) vloei uit ‘n ignorering van wat God van Homself en die lewe openbaar.

    Waar jy nie God se uitgespelde moraliteit in die Skrif aanvaar en uitleef nie, is jy per definisie besig met jou eie godsdiens, en kan ‘n mens dit as afgodery teken, soos Paulus inderdaad doen. Daarom kan Paulus in Romeine 12:1-2 alle gelowiges in die gemeente aanmoedig om in die eerste plek hulle fisiese liggame: “as ’n lewende, heilige en aan God welgevallige offer” te stel. “Dit is julle redelike godsdiens.” Dit is gemik teen (onder andere) onsedelikheid.

    En dan in die tweede plek te beklemtoon dat hulle hulle denke skoei op God se openbaring: “En word nie aan hierdie wêreld gelykvormig nie, maar word verander deur die vernuwing van julle gemoed, sodat julle kan beproef wat die goeie en welgevallige en volmaakte wil van God is.” Dit is gemik teen (onder andere) afgodery.

    Dus: “Hou net vas wat julle het, totdat Ek kom.

  • Avatar

    Chris van Wyk

    |

    In die konteks van oordeel bly die drie aspekte van God ons hoop. En ons riglyn: “Dat liefde, reg en geregtigheid belangriker is as insig, krag en rykdom bly ’n fundamentele keuse van dié wat die Here ken en Hom in alles wil erken. Dat dít gelowiges in konflik bring met wêreldse insig, krag en rykdom is daarom egter ook ’n feit. Maar, dit is wat getrouheid van ons vra.”

  • Avatar

    Yvonne

    |

    Ds Chris wat my tref is in Jeremia 9:24 God se hart “Ek bewys liefde, reg en geregtigheid op die aarde, want dit is wat ek wil he, se die Here.

  • Avatar

    Jan Louw

    |

    Ai Chris,
    Ek kyk na die vier punte wat jy hier noem oor geloofsonderskeiding.
    Gee vir almal kans om ʼn bydrae te lewer.
    Fokus op getuienisse van God se werk en teenwoordigheid in hierdie lewe.
    Toets alles aan die Bybel totdat die geloofsgemeenskap duidelikheid kry.
    Neem ’n vaste besluit eers wanneer julle algemene instemming en ’n gemeenskaplike oortuiging bereik het.
    Waarom wil dit nie meer werk in die NG Kerk nie? Die proses veronderstel dat ons van een Gees deurdronge sal wees. Hoekom kry ek die idee ons werk nie meer met dieselfde Bybel en dat ons nie meer deur dieselfde Gees gelei word nie.
    Ons paaie gaan uitmekaar soos die kerk en die Jode se paaie uitmekaar gegaan het in Hand 15.

  • Avatar

    Fransina Hashipala

    |

    More Pastoor Chris ek geniet baie van jou preke, ek is ‘n ouderling by my kerk en leer rerig baie van u af.