Jesus verwyt die dorpe wat nie tot inkeer gekom het waar sy wonderdade plaasgevind het nie

MATTEUS 11:20-24

20 Toe het Hy begin om die dorpe te verwyt waarin die meeste van sy wonderdade plaasgevind het, omdat hulle nie tot inkeer gekom het nie:

21 “Wee jou, Gorasin, wee jou, Betsaida, want as in Tirus en Sidon die wonderdade plaasgevind het wat in julle plaasgevind het, sou hulle lank gelede in sak en as tot inkeer gekom het.

22 Maar Ek sê vir julle: Vir Tirus en Sidon sal dit op die oordeelsdag draagliker wees as vir julle.

23 En jy, Kapernaum, jy sal tog nie tot die hemel verhef word nie? Jy sal tot in die doderyk neerdaal, want as in Sodom die wonderdade plaasgevind het wat in jou plaasgevind het, sou dit tot vandag toe gestaan het.

24 Maar Ek sê vir julle dat dit vir die gebied van Sodom op die oordeelsdag draagliker sal wees as vir jou.”

Teks en konteks

11:20 Matteus plaas hierdie verwyt van Jesus ná die gesprek oor die wispelturigheid van die Jode in reaksie op beide Johannes die Doper se boodskap as sy eie. Let op dat Jesus die dorpe begin verwyt (oneidizō – bestraf of teregwys) waar die meeste van sy wonderdade plaasgevind het, omdat hulle nie tot inkeer gekom het nie.

11:21-22 Dan spreek Jesus ‘n oordeel uit – ‘n wee (vgl. Openbaring se goue bakke waarvan drie van hulle as ‘n “wee” beskryf word) oor Gorasin (naby Kapernaum) en Betsaida, die dorpie van Andreas en Petrus wat ook naby Kapernaum was. Dit sal vir Tirus en Sidon draagliker wees as vir hulle in die oordeel wat kom, want as hulle dieselfde wonderdade sou gesien het sou hulle lank gelede al in sak en as tot inkeer gekom het. Die voorbeeld van Nineve is duidelik die agtergrond hiervan, al word Jona nie genoem nie.

11:23 Dieselfde geld vir Kapernaum. In ‘n meer duidelike toespeling as in Lukas 10:18 op die oordeel wat Jesaja oor die koning van Babilonië, Nebukadnesar, uitgespreek het (Jes. 14:13-15), word ‘n oordeel oor Kapernaum uitgespreek, omdat hulle tot die hemel verhoog is deur die Seun van God wat hulle stad sy basis gemaak het, maar weens hulle onbekeerlikheid uiteindelik in die doderyk (Hades) sal beland.

Trouens, as die wonderdade van Jesus in Sodom sou plaasgevind het, sou hulle tot vandag toe bestaan het.

11:24 Dit sal daarom vir die mense van Sodom wat deur vuur vir hulle losbandigheid en afvalligheid gestraf is, meer draaglik wees in die finale oordeel as vir die mense van die stede wat Jesus verwerp het ten spyte daarvan dat hulle sy wonderdade kon ervaar.

Boodskap en betekenis

Daar is ‘n valse beeld wat dwaalleraars van Jesus voorhou asof Hy net liefde is en nooit oordeel of veroordeel nie. Hier is dit egter duidelik dat Jesus nie net genade uitdeel nie, maar ook teregwysing. Hy vergewe nie net nie, maar verwyt ook. Hy spreek nie net vry nie, maar verdoem ook.

Die oordeel van Jesus gebeur letterlik in die aanvaarding of verwerping van sy boodskap. Dié wat tot inkeer kom en hulle vertroue op Hom plaas, ontvang die koninkryk van God. Dié wat nie tot inkeer kom nie en hulle vertroue nie op Jesus plaas nie, kom in die oordeel van God.