Skip to main content

Lukas 3

Written by Chris van Wyk on . Posted in Kronologiese Bybelleesplan.

Jesus is familie van alle mense

Die bediening van Johannes die Doper word in alle Evangelies as belangrik beskou, omdat dit die weg voorberei vir Jesus Christus. Sy bediening vind plaas in die woestyngebied rondom die Jordaan en sluit die doop van bekering in.

Teks en konteks

Johannes die Doper kondig die doop van bekering aan (Lukas 3:1-6)

Lukas plaas Johannes se prediking binne die historiese konteks van Romeinse en Joodse leiers, soos Tiberius, Pilatus, Herodes, Filippus, en Annas en Kajafas. Johannes se bediening kontrasteer egter sterk met hierdie politieke en godsdienstige status quo. Hy opereer vanuit die woestyn eerder as die tempel en tree as priester en profeet op. Die “woord van God” kom na hom toe, waarskynlik as die bestaande Skrifwoord en persoonlike openbaring.

Johannes verkondig die doop van bekering as voorbereiding vir die Messias en vervulling van Jesaja 40. Die visuele beeld van ‘n reguit pad en gelyk paaie dui op geestelike bekering en gehoorsaamheid aan God. Die simboliek wys dat alle mense, nie net die Jode nie, God se redding sal sien.

Boodskap en betekenis

  1. Die evangelie en die status quo: Die boodskap van die evangelie daag politieke en godsdienstige status quo’s uit. Waar staan jy teenoor die samelewing se norme?
  2. Gehoorsaamheid aan God: Die evangelie roep op tot gehoorsaamheid aan God se wet, soos Jesus in die Bergrede sal beklemtoon.
  3. Die rol van God se Woord: Johannes se bediening word deur die Woord van God begelei. Hoe luister en leef jy God se Woord?

Johannes waarsku die skares om die vrug van bekering te dra (Lukas 3:7-14)

Johannes spreek die skares wat na hom kom as “addergebroedsel” aan, om hulle tot dieper bekering te roep. Hy waarsku dat afkoms van Abraham of skynbekering hulle nie van God se oordeel sal red nie. Net bekering en vrug dra wat daarvan getuig, is geldig. Die beeld van die byl wat gereed is om onvrugbare bome te kap, illustreer die dringendheid van bekering.

Johannes word prakties oor die vrugte van bekering:

  • Vir die skares: Wees mededeelsaam, deel jou oortollige besittings met ander.
  • Vir tollenaars: Wees billik en moenie meer invorder as wat regverdig is nie.
  • Vir soldate: Moenie afpers of vals beskuldig nie; wees tevrede met jou loon.

Boodskap en betekenis

Johannes se waarskuwing geld ook vandag:

  1. Mededeelsaamheid: Help ander prakties, veral minderbevoorregtes.
  2. Billikheid: Moenie korrup wees nie; werk regverdig.
  3. Regverdigheid: Tree regverdig op teenoor almal, selfs in gesagsposisies.

God se oordeel is werklik, en bekering bevestig ons verbintenis aan Hom.

Johannes die Doper verkondig die goeie nuus van die Messias (Lukas 3:15-18)

Johannes maak dit duidelik dat hy nie die Messias is nie. Hy wys na Jesus, wat met die Heilige Gees en vuur sal doop. Dié vuur dui aan die een kant op die oortuiging en krag van die Heilige Gees en aan die ander kant op die onderskeiding tussen bekeerdes (koring) en onbekeerdes (kaf) in God se oordeel.

Johannes beskryf Jesus as die Een wat sy dorsvloer sal skoonmaak, met die koring in sy skuur en die kaf wat in onblusbare vuur verbrand sal word.

Boodskap en betekenis

Johannes verbind die Heilige Gees aan God se oordeel. Bekering is nie net om God se toorn te ontvlug nie, maar ‘n reaksie op sy reinigende werk deur die Gees. Jesus is meer as die “liewe Jesus” van kindergebede; Hy bring oordeel en genade.

Johannes die Doper word in die tronk opgesluit (Lukas 3:19-20)

Johannes die Doper is in die tronk opgesluit aan die begin van Jesus se openbare bediening (Mark. 1:14), ná ‘n kort tydperk van oorvleueling in hul bedienings (Joh. 3:22-36). Die rede vir sy gevangenskap was sy dapper teregwysing van Herodes Antipas oor sy sonde. Herodes was nie ‘n ware koning nie, maar ‘n tetrarg oor Galilea en Perea, aangestel deur die Romeine. Johannes het Herodes se huwelik met Herodias veroordeel, wat ‘n skending van die wet van Moses was.

Herodias, die dogter van Herodes Antipas se halfbroer Aristobulus, was eers getroud met nog ‘n halfbroer, Filippus. Sy het van Filippus geskei en met Herodes getrou, wat ook van sy vrou geskei het. Dit het Johannes as sonde uitgewys, aangesien die wet verbied het om jou broer se vrou te neem (Lev. 20:21). Verder het Johannes Herodes oor ander wandade teregwys, waarvan Josefus, die Joodse geskiedskrywer, melding maak.

Herodes het Johannes in die tronk opgesluit by Machaerus naby die Jordaan (volgens Josefus). Johannes se bediening het met hierdie gevangenskap geëindig, maar sy nalatenskap as ‘n getroue profeet wat Jesus uitgewys het, bly steeds sigbaar.

Boodskap en betekenis

Johannes die Doper se voorbeeld leer ons dat teregwysing, al is dit ongewild, belangrik bly. In ‘n wêreld waar individuele vryheid dikwels as belangriker beskou word as reg of waarheid, kan dit moeilik wees om mense oor hul sondes te waarsku. Tog is dit liefdeloos om te weet dat God se oordeel oor sonde kom, maar niks daaromtrent te doen nie.

Jesus word gedoop (Lukas 3:21-22)

Jesus se doop word in Lukas kortliks beskryf, sonder om Johannes die Doper se rol spesifiek te vermeld, met die fokus op wat tydens en ná sy doop gebeur het. Lukas noem dat Jesus in gebed verkeer het toe die hemele geopen is. Die Heilige Gees het in die vorm van ‘n duif op Hom neergedaal, en God het Hom as sy geliefde Seun geïdentifiseer.

Die Drie-eenheid is hier duidelik sigbaar: die Vader (stem uit die hemel), die Seun (Jesus), en die Heilige Gees (duif). Die doop van Jesus is die hoogtepunt van Johannes die Doper se bediening en die begin van Jesus se openbare bediening.

Boodskap en betekenis

Lukas beklemtoon gebed in sy Evangelie en wys hoe Jesus, selfs in hierdie oomblik van oorgang, in gebed verkeer. Dit dien as ‘n voorbeeld vir gelowiges om God in gebed te soek, veral in tye van belangrike lewensgebeure.

Jesus se geslagsregister (Lukas 3:23-38)

Jesus het sy bediening begin toe Hy omtrent 30 jaar oud was, wat aansluit by die ouderdom waarop Leviete en konings in die Ou Testament hul diens begin het (Num. 4:3; 2 Sam. 5:4).

Die geslagsregister van Lukas verbind Jesus aan Adam, en uiteindelik aan God. Dit verskil van Matteus se geslagsregister, wat by Abraham begin en Jesus as die Joodse Messias voorhou. Lukas se geslagsregister wys egter dat Jesus die Verlosser van alle mense is, aangesien Hy aan die hele mensdom verwant is deur Adam.

Verskille tussen Matteus en Lukas se geslagsregisters

  1. Verskillende kinders van Dawid:
    Matteus volg Salomo se koninklike lyn, terwyl Lukas Natan, ‘n ander seun van Dawid, se lyn volg.
  2. Josef se vader:
    Matteus noem Jakob as Josef se vader, terwyl Lukas Eli noem. Dit kan deur ‘n leviraatshuwelik verduidelik word, waar Eli Josef se wettige vader was en Jakob sy biologiese vader. ‘n Alternatiewe verklaring stel voor dat Eli Maria se vader was, wat sou beteken dat Lukas Maria se lyn volg. Daar is egter geen ander interne gegewens in die Bybel wat dit bevestig nie.

Boodskap en betekenis

Hierdie geslagsregister wys dat Jesus nie net die Verlosser van die Jode is nie, maar van die hele wêreld. Soos ons in Adam deel aan sonde, deel ons in Jesus aan vergifnis en verlossing (Rom. 5:12-21). Jesus se missie strek na elke mens op aarde – ‘n waarheid wat ons vandag kan vier.

View all posts in this series

Discover more from Bybelskool

Subscribe to get the latest posts sent to your email.

Kronologiese Bybelleesplan

Chris van Wyk

Ek is Direkteur van Bediening en Geestelike Vorming by Veritas College International. My passie in die lewe is om God bo alles te dien en gelowiges in geloofsvorming te begelei. I am Director of Ministry and Spiritual Formation at Veritas College International. My passion in life is to serve God above all and to lead believers in faith formation.

Maak 'n opmerking

Onlangse kommentaar

  • Hannes. on Hoe het “Bid die Psalms” jou gehelp?Middag Dr. Chris, Baie dankie vir ‘n insiggewende reis deur Psalms. Dit het beslis gehelp om my persoonlike gebedslewe te verbeter, en ek glo sterk dat elke gebed beslis my verhouding met die Here verdiep op ‘n manier waar ek tans baie meer pligsgetrou is teenoor my persoonlike stiltetyd en gesprekk…
  • Kobus on Hoe het “Bid die Psalms” jou gehelp?Dit was vir my 'n wonderlike ervaring, ek kyk met 'n ander insig nou na die Psalms
  • Chris van Zyl on Hoe het “Bid die Psalms” jou gehelp?Bid die Psalms het vir my baie beter insig verskaf, veral die kontektualisering en verklarings wat elke gedeelte belig het. Ek is so dankbaar dat ek kon deel in hierdie bid-gerigte ervaring. Menige dag het ek gevoel dat die Psalm van die dag spesiaal vir my bedoel was. Dankie Chris van Wyk vir hierd…
  • Chris van Wyk on Psalm 137Dit is my voorreg. Groete!
  • Doreen Snyders on Psalm 137Net om weer 'n slag dankie te sê vir al die wonderlike verklarings en verduidelikings van al die Bybelse waarhede. Ons dien 'n wonderbare en allerheilige God. Ek sien baie uit na die Matteusevangelie. Nogmaals baie dankie. Doreen Snyders
  • Chris van Wyk on Psalm 119:169-176Absoluut!
  • sparklybc467b2e69 on Psalm 119:169-176Psalm 119 is voorwaar ñ baie Geseënde Psalm
  • Chris van Wyk on Psalm 119:145-152Dis self opnuut weer ‘n vreugde vir my.
  • originalblizzard19aaa84c56 on Psalm 119:145-152Ek was altyd baie langtand om Ps 119 aan te durf, nou wens ek dat dit nie ophou nie... Ps 119 is te kort!!! PDH
  • sparklybc467b2e69 on Psalm 119:105-112Goeie middag, baie dankie vir die deel van die kosbare verhaal wat so gepas is met die Psalm
  • originalblizzard19aaa84c56 on Psalm 119:1-8Sien waarlik die nou verband tussen OT EN NT. waarlik verhelderend. אמן
  • Chris van Wyk on Psalm 118:19-29Ek gee maar net aan wat ek ontvang het. Dit bly egter 'n kosbare voorreg.
  • sparklybc467b2e69 on Psalm 118:19-29Goeie môre, baie dankie dat u met ons deel wie en waar die vertaaling van die Bybel sy oorsprong gekry het, dit is so kosbaar, baie dankie vir een en elkeen wat deel is en was om hierdie kosbare woord ook vir ons in ons Taal te kon uitlê
  • sparklybc467b2e69 on Psalm 110Baie dankie vir hierdie kosbaarhede wat u met ons deel. Ek het Openbaring 22 gelees en dit klink baie soos die tuin van Eden, hy praat van die boom van lewe. Die sondeval gemaak dat die mens gesondig het en dat hul nie meer in die tuin kon woon nie asgevolg van die sonde.
  • sparklybc467b2e69 on Psalm 109:6-19Goeie middag, ek wil ook by las dat in Psalm 139:23 bid David;"Deurgrond my, O GOD, en ken my hart, toets my en ken my gedagtes" GOD ken die mens en HY deersoek die hart en die gedagtes. Ek het self al telkens gebid, HERE vergewe hulle want hulle weet nie wat hulle doen nie en dan soos die woord sel…