Skip to main content

Romeine 6

Written by Chris van Wyk on . Posted in Kronologiese Bybelleesplan.

Lewe vir God, nie vir die sonde nie

Ons is steeds besig met die vierde hoofdeel van Paulus se boodskap wat handel oor die implikasies van die regte verhouding met God. In hierdie hoofstuk brei Paulus uit oor God se genade deur Christus se sterwe en opstanding wat aan die een kant tot oorwinning oor sonde lei (6:1-14) en aan die anderkant tot gehoorsaamheid en ‘n heilige lewe (6:15-23).

Teks en konteks

Ons is deur Christus dood vir die sonde, en lewe deur sy opstanding (6:1-14)

God en die sonde word hier as’t ware as twee magte of kragvelde geteken wat teenoor mekaar staan. Ons is uit die kragveld van die sonde geneem – die dinge waaraan God ons oorgegee het (Rom. 1:24-32) – en geplaas in die kragveld van God.

En dit is waar ons moet lewe, in die kragveld van God.

Sy belofte is dat: “As ons inderdaad met Hom saamgegroei het in ‘n dood soos syne, sal ons ook met Hom saamgroei in ‘n opstanding soos syne.”

Dit is waarhede wat ons daagliks vir onsself moet toereken: “Beskou julleself dan so dat julle in Christus Jesus dood is vir die sonde, maar lewend vir God.” (Rom. 6:11). Ons is nie meer slawe van seksuele immoraliteit, skandelike seksuele begeertes of korrupte denkwyses nie, maar slawe van God en die lewe wat die Here Jesus Christus gebring het.

Teenoor God se oorgawe van die mensdom aan die sonde, omdat hulle Hom verwerp het, gee Hy dié wat in Christus glo twee genadegawes:

  1. Ons het deur die doop deel gekry aan Christus se kruisdood. Ons is daardeur nou self dood vir die sonde.
  2. Ons het deur die opstanding deel gekry aan die lewe vir God. Ons kan God nou dien.

Dit is hierdie eenheid met Christus wat ons ’n aandeel gee aan die sonde-dood en die opstandingslewe. En dit is ook net in ’n verhouding met Jesus Christus wat dit vir ons waar is en bly.

Dit het twee implikasies vir ons daaglikse lewe:

  1. Ons kan nie meer in die sonde voortlewe nie. Ons moet afreken met die sonde.
  2. Ons is nou in diens van wat God Ons is sy slawe om net te doen wat Hy wil.

Daarom moet ons elke deel van ons sterflike liggame – en let spesifiek op dat hy hier nie net van ons siel of gees praat nie – in diens van God stel om heilig te lewe:

“Die sonde mag beslis nie oor julle heers nie; julle is immers nie onder die wet nie, maar onder die genade.”

Omdat ons in die regte verhouding met God is, kan ons heilig leef (6:15-23)

Die feit dat ons nie meer onder die wet is nie, kan ons egter laat dink dat ons maar sonde kan doen, want ons is onder die genade.

Paulus sê: “Hoegenaamd nie!”

Want, ons sal óf slawe wees van die sonde, wat tot die dood lei, óf slawe van gehoorsaamheid aan God, wat lei tot ‘n regte verhouding met Hom. Dit is immers Hy wat ons vry gemaak het van die sonde. Ons is nou “slawe” van die regte verhouding met God. Ons stel ons ledemate in diens van God om heilig te leef, nie in diens van onreinheid en losbandigheid nie. Ons is nou aan God en die regte verhouding met Hom gebonde.

Die vrug van losbandigheid was immers skandelik en die uiteinde daarvan die dood, soos ons in Adam dit kon raaksien. Noudat ons van die sonde vrygemaak is en diensbaar aan God geword het, lewer ons die vrug van heiligmaking, en die wonderlike uiteinde hiervan is die ewige lewe.

Die wonderlike boodskap is: “Die loon van die sonde is die dood; maar die genadegawe van God is die ewige lewe in Christus Jesus ons Here.”

Boodskap en betekenis

Romeine 6 verduidelik dat die regte verhouding met God radikale verandering bring in hoe gelowiges leef, deurdat hulle van die mag van sonde bevry is en vir God lewe. Paulus gebruik die beeld van twee heersers: sonde en God. Deur Christus se kruisdood en opstanding is gelowiges nie meer slawe van die sonde nie, maar slawe van geregtigheid, dws gehoorsaam aan die regte verhouding met God. Die vrug van hierdie gehoorsaamheid is heiligmaking, met die ewige lewe as uiteinde.

View all posts in this series

Discover more from Bybelskool

Subscribe to get the latest posts sent to your email.

Kronologiese Bybelleesplan

Chris van Wyk

Ek is Direkteur van Bediening en Geestelike Vorming by Veritas College International. My passie in die lewe is om God bo alles te dien en gelowiges in geloofsvorming te begelei. I am Director of Ministry and Spiritual Formation at Veritas College International. My passion in life is to serve God above all and to lead believers in faith formation.

Maak 'n opmerking

Onlangse kommentaar