Skip to main content

Handelinge 12

Written by Chris van Wyk on . Posted in Kronologiese Bybelleesplan.

God antwoord gebede in die gemeente van Jerusalem en bevry Petrus

Handelinge 12 fokus op die konflik tussen menslike mag en Goddelike ingryping, wat die wyse waarop God sy koninkryk vestig, selfs in die aangesig van vervolging, illustreer. Die hoofstuk begin met die martelaarskap van die apostel Jakobus (die “Grote” in onderskeid van die ander apostel, Jakobus, die “Kleinere”) en die gevangeneming van Petrus deur koning Herodes Agrippa I, maar dit eindig met God se bonatuurlike bevryding van Petrus en die dood van Herodes.

Teks en konteks

Toe die Joodse leiers nie slaag in hul poging om die evangelie te stuit deur vervolging nie, besluit die Joodse koning, Herodes Agrippa 1 (Herodes Antipas was die een tydens Jesus se kruisiging), om tot die stryd toe te tree en laat van die gemeentelede vang, vermoor een van die twee “manne van die donder”, Jakobus (Mark 3:17 – die bynaam wat Jesus Johannes en Jakobus gegee het!), en laat Petrus in die tronk opsluit. Let op dat dit twee van die eerste vier geroepe dissipels van Jesus is (Luk 5:1-11). ‘n Geweldige aanslag dus op die leierskap van die jong gemeente in Jerusalem.

Dit gebeur weereens op die Paasfees, soos ’n paar jaar tevore met Jesus se kruisdood, die fees van die ongesuurde brood. Herodes wou net na die Paasfees vir Petrus om die lewe laat bring, dieselfde fees waarop Jesus tereggestel is. Hy wou dus die leier, Petrus, wat begin het om die pas aan te gee vir die oorgrens beweging van die evangelie, se mond snoer, soos die Jode dit met Jesus probeer doen het, maar nie daarin kon slaag nie.

Herodes en die 16 soldate wat Petrus in die tronk bewaak, is egter nie bestand teen die gebede van die gemeente en die engel van die Here nie, en Petrus word bevry en as bevestiging van God se seën op hulle werk, vir hulle terug gegee.

Die verlossing uit die tronk en die aankoms van Petrus by die gelowiges word met baie detail beskrywe om ons van die werklikheid van die gebeure te oortuig. Selfs die diensmeisie, Rodé, se naam word genoem, wat Petrus aanvanklik nie inlaat by die gemeentebyeenkoms nie, waarskynlik weens haar verbouereerdheid.

Dit leer ons dat die gebede van die regverdiges – let op die kontras met Herodes se onregverdigheid – groot krag het wanneer dit gefokus word op God se wil in sulke situasies. En onthou dat Barnabas en Saulus ook in daardie tyd daar was en saam gebid het (vgl Hand 11:30). Die gemeenskap van gelowiges oor gemeentegrense heen is deel van hierdie wonderlike bevestiging van God se verlossing en ingrype in die geestelike en politieke werklikheid.

Die engel van die Here se werk is egter nog nie klaar nie, en toe Herodes as god vereer word in die interaksie met die afvaardiging van Tirus en Sidon, tree God in en laat hom sterwe, ‘n paar jaar na die dood en opstanding van Sy Seun (Josefus bevestig Herodes se dood; sy beskrywing dui op 44 n.C.).

Dit is nogal ’n verontrustende gebeure. Dit laat my dink aan die gesegde: die wiele van geregtigheid draai stadig, maar verseker. God laat nie met Hom mors nie, en tree op om Sy naam te beskerm en Sy wil te laat geskied. Dit is ook ’n duidelike aanduiding dat ’n mens nie God se lankmoedigheid moet onderskat nie of veral nie as swakheid of traagheid om op te tree, moet interpreteer nie. Waar Sy eer in gedrang gebring word, tree Hy op.

Lukas sluit die deel van sy verhaal af met sy herhalende opmerking dat die woord van die Here verder versprei het en veld gewen het. Die tafel is gedek vir die volgende uitbreiding van die koninkryk wat van Antiogië af sou kom met Titus en Johannes Markus wat saam met Saulus en Barnabas terugreis.

Boodskap en betekenis

Te midde van swaarkry en teenstand, wys Lukas vir ons hier hoe die gebede van die gemeente wat vasgryp aan God se almag, die onafwendbare verspreiding van die evangelie begelei. Ons word uitgenooi om met geloof en volharding op hierdie God te vertrou, selfs wanneer omstandighede onseker en bedreigend lyk. Die volgende fase van die uitbreiding van die evangelie sou met die gebedstyd in Antiogië aanbreek, waarvan ons in Handelinge 13 gaan lees.

Dit is egter tyd vir die brief van Jakobus wat moontlik in dié tyd geskryf is.

View all posts in this series

Discover more from Bybelskool

Subscribe to get the latest posts sent to your email.

Kronologiese Bybelleesplan

Chris van Wyk

Ek is Direkteur van Bediening en Geestelike Vorming by Veritas College International. My passie in die lewe is om God bo alles te dien en gelowiges in geloofsvorming te begelei. I am Director of Ministry and Spiritual Formation at Veritas College International. My passion in life is to serve God above all and to lead believers in faith formation.

Maak 'n opmerking

Onlangse kommentaar

  • Hannes. on Hoe het “Bid die Psalms” jou gehelp?Middag Dr. Chris, Baie dankie vir ‘n insiggewende reis deur Psalms. Dit het beslis gehelp om my persoonlike gebedslewe te verbeter, en ek glo sterk dat elke gebed beslis my verhouding met die Here verdiep op ‘n manier waar ek tans baie meer pligsgetrou is teenoor my persoonlike stiltetyd en gesprekk…
  • Kobus on Hoe het “Bid die Psalms” jou gehelp?Dit was vir my 'n wonderlike ervaring, ek kyk met 'n ander insig nou na die Psalms
  • Chris van Zyl on Hoe het “Bid die Psalms” jou gehelp?Bid die Psalms het vir my baie beter insig verskaf, veral die kontektualisering en verklarings wat elke gedeelte belig het. Ek is so dankbaar dat ek kon deel in hierdie bid-gerigte ervaring. Menige dag het ek gevoel dat die Psalm van die dag spesiaal vir my bedoel was. Dankie Chris van Wyk vir hierd…
  • Chris van Wyk on Psalm 137Dit is my voorreg. Groete!
  • Doreen Snyders on Psalm 137Net om weer 'n slag dankie te sê vir al die wonderlike verklarings en verduidelikings van al die Bybelse waarhede. Ons dien 'n wonderbare en allerheilige God. Ek sien baie uit na die Matteusevangelie. Nogmaals baie dankie. Doreen Snyders
  • Chris van Wyk on Psalm 119:169-176Absoluut!
  • sparklybc467b2e69 on Psalm 119:169-176Psalm 119 is voorwaar ñ baie Geseënde Psalm
  • Chris van Wyk on Psalm 119:145-152Dis self opnuut weer ‘n vreugde vir my.
  • originalblizzard19aaa84c56 on Psalm 119:145-152Ek was altyd baie langtand om Ps 119 aan te durf, nou wens ek dat dit nie ophou nie... Ps 119 is te kort!!! PDH
  • sparklybc467b2e69 on Psalm 119:105-112Goeie middag, baie dankie vir die deel van die kosbare verhaal wat so gepas is met die Psalm
  • originalblizzard19aaa84c56 on Psalm 119:1-8Sien waarlik die nou verband tussen OT EN NT. waarlik verhelderend. אמן
  • Chris van Wyk on Psalm 118:19-29Ek gee maar net aan wat ek ontvang het. Dit bly egter 'n kosbare voorreg.
  • sparklybc467b2e69 on Psalm 118:19-29Goeie môre, baie dankie dat u met ons deel wie en waar die vertaaling van die Bybel sy oorsprong gekry het, dit is so kosbaar, baie dankie vir een en elkeen wat deel is en was om hierdie kosbare woord ook vir ons in ons Taal te kon uitlê
  • sparklybc467b2e69 on Psalm 110Baie dankie vir hierdie kosbaarhede wat u met ons deel. Ek het Openbaring 22 gelees en dit klink baie soos die tuin van Eden, hy praat van die boom van lewe. Die sondeval gemaak dat die mens gesondig het en dat hul nie meer in die tuin kon woon nie asgevolg van die sonde.
  • sparklybc467b2e69 on Psalm 109:6-19Goeie middag, ek wil ook by las dat in Psalm 139:23 bid David;"Deurgrond my, O GOD, en ken my hart, toets my en ken my gedagtes" GOD ken die mens en HY deersoek die hart en die gedagtes. Ek het self al telkens gebid, HERE vergewe hulle want hulle weet nie wat hulle doen nie en dan soos die woord sel…