Skip to main content

1 Konings 10:14-25; 2 Kronieke 9:13-28

Written by Chris van Wyk on . Posted in Kronologiese Bybelleesplan.

Die rykdom, weelde en mag van Salomo

Hierdie gedeeltes in 1 Konings 10 en 2 Kronieke 9 is ‘n ooreenstemmende katalogus van Salomo se rykdom, weelde en mag. Dit word veelseggend geplaas tussen die besoek van die koningin van Skeba aan Salomo, wie se wysheid haar oorweldig het, en die verslag van Salomo se liefde vir vreemde vrouens, wie se gode hom oorweldig het, en op ‘n dwaalspoor gelei het.

Teks en konteks

’n Redelike uitvoerige beskrywing word van Salomo se weelde en rykdom gegee in 1 Konings 10 en 2 Kronieke 9, iets waartoe ander lande asook die lewendige handel bygedra het. Sy jaarlikse inkomste net aan goud was 666 talente (laat mens dink aan Openbaring 13!), wat 23 ton geweeg het. Silwer is as waardeloos beskou, soveel goud was daar in omloop.

Salomo het sy rykdom aangewend om sy eie aansien te verhoog deur die groot aantal goue skilde, en ‘n groot troon van ivoor en goud vir homself, sowel as selfs ‘n trop leeus op die trappe, die simbool van sy stam Juda, wat besoekers uitermate moes beïndruk.

Nog belangriker as sy rykdom en weelde was sy wysheid, sodat al die konings van die aarde probeer het om hom te sien te kry en die wysheid wat God hom gegee het, aan te hoor.

Dit het interessant genoeg sy rykdom verder laat toeneem, omdat elkeen ’n geskenk saamgebring het. Hy het selfs sy drinkgoed uit goud laat maak (wat natuurlik met die ballingskap deur Nebukadnesar opgeraap is!).

Ons lees ook dat hy in strydwaens handel gedryf het. Dit is ingevoer uit Egipte en vandaar af teen ‘n wins verkoop aan die omliggende koninkryke. Die strydwaens was dus nie soseer vir Salomo se eie beskerming nie, maar om mee handel te dryf, iets wat ‘n mens vandag met reg sou kon bevraagteken.

Sy koninkryk het uiteindelik van die Eufraat af tot teen die Middellandse See en tot aan die grens van Egipte gestrek. ‘n Vervulling van die belofte van God aan Abraham.

Maar, selfs só ’n ryk en suksesvolle man moet uiteindelik sterf. En soos ons later gaan agterkom, dié rykdom het nie gemaak dat sy seun Rehabeam ’n sukses van sy koningskap kon maak nie.

Boodskap en betekenis

Hierdie katalogus van Salomo se rykdom is aan die een kant ‘n bewys van ‘n “goue eeu” wat deur Salomo se wysheid teweeggebring is vir Israel. Dit is aan die ander kant ook ‘n bewys van die “gevaar” van rykdom veral waar dit blyk Salomo wins gemaak het uit die verkoop van oorlogstuig aan ander nasies en hy boonop sy rykdom eintlik ingespan het om sy eie status te verhoog. In die volgende hoofstuk sal dit blyk dat hierdie oorvloed ‘n negatiewe invloed op sy verhouding met die Here gehad het.

View all posts in this series

Discover more from Bybelskool

Subscribe to get the latest posts sent to your email.

Kronologiese Bybelleesplan

Chris van Wyk

Ek is Direkteur van Bediening en Geestelike Vorming by Veritas College International. My passie in die lewe is om God bo alles te dien en gelowiges in geloofsvorming te begelei. I am Director of Ministry and Spiritual Formation at Veritas College International. My passion in life is to serve God above all and to lead believers in faith formation.

Maak 'n opmerking

Onlangse kommentaar