Author: Chris van Wyk

Ons sit die fokus op die lewe van geregtigheid in Matteus 6 voort. Die eerste 18 verse het op liefdadigheid, gebed en vas as sleutelkenmerke van die lewe met God gefokus. Van vers 19-34 fokus Jesus op die wyse waarop jou welvaart in gemeenskap met Hom hanteer moet word. Die fokus moet aan die een kant op God self wees, nie op jou besittings nie – vers 19-24. Aan die ander kant moet die fokus op sy koninkryk wees, nie op jou bekommernisse nie – vers 25-34.

Ons lees dit weereens in kleiner paragrawe om deeglik op die boodskap en betekenis daarvan te kan konsentreer.

MATTEUS 6:19-21

19 “Moenie vir julle skatte bymekaarmaak op die aarde, waar mot en roes vernietig en waar diewe inbreek en steel nie,

20 maar maak vir julle skatte bymekaar in die hemel waar nóg mot nóg roes vernietig en waar diewe nie inbreek en steel nie,

21 want waar jou skat is, daar sal jou hart ook wees.”

Teks en konteks

6:19-20 Jesus gee hier as’t ware ‘n nuwe doel en strategie vir die lewe in die gemeenskap.  Aan die basis daarvan lê ‘n revolusionêre waardestelsel. Aardse skatte is onderworpe aan verganklikheid – mot, roes, en diefstal. Hemelse skatte kan nie opgevreet of vernietig word nie.

6:21 Dit gaan egter ten diepste oor waar jou hart (en jou oog – vers 22-23) is. ‘n Aardse fokus bring ‘n gebrek aan insig oor wat regtig belangrik is.

Boodskap en betekenis

Jesus leer ons hiermee dat ‘n aardse belegging nie kan meeding met die opbrengs en dividende van ‘n hemelse belegging nie. Dit kan eintlik nie vergelyk word nie, want dit is so ver verwyder van mekaar as verganklikheid van onverganklikheid. Jou keuse sal jou hart – jou manier van dink en doen – beïnvloed.

MATTEUS 6:16-18

16 “Wanneer julle vas, moenie soos die skynheiliges met lang gesigte wees nie, want hulle vertrek hulle gesigte sodat mense kan sien hulle vas. Amen, Ek sê vir julle: Hulle het hulle beloning ontvang.

17 Maar wanneer jy vas, salf jou kop en was jou gesig

18 sodat die mense nie sien dat jy vas nie, maar jou Vader, wat jy nie kan sien nie; en jou Vader wat sien wat in die geheim is, sal jou beloon.”

MATTEUS 6:5-15

5 “En wanneer julle bid, moenie wees soos die skynheiliges nie, want hulle hou daarvan om in die sinagoges en op die straathoeke te staan en bid sodat hulle deur die mense gesien kan word. Amen, Ek sê vir julle: Hulle het hulle beloning ontvang.

6 Maar wanneer jy bid, gaan in jou kamer in en sluit jou deur en bid privaat tot jou Vader; en jou Vader wat dinge sien wat privaat is, sal jou beloon.

7 En wanneer julle bid, moenie baie woorde gebruik soos die heidene nie, want hulle dink dat hulle oor hulle baie woorde verhoor sal word.

8 Moet dan nie soos hulle wees nie, want julle Vader weet wat julle nodig het voordat julle Hom vra.

9 So moet julle dan bid:

Ons Vader in die hemel,

laat u Naam geheilig word.

10 Laat u koninkryk kom.

Laat u wil op die aarde geskied,

soos in die hemel.

11 Gee ons vandag die brood

wat ons nodig het.

12 En vergewe ons ons sondes,

soos ons ook dié vergewe het

wat teen ons sondig.

13 En laat ons nie in versoeking kom nie,

maar verlos ons van die bose. (‘n Aantal minder goeie manuskripte het ook nog want aan U behoort die koningskap en die krag en die heerlikheid vir altyd. Amen)

14 Want as julle mense hulle oortredings vergewe, sal julle Vader in die hemel julle ook vergewe.

15 Maar as julle mense nie vergewe nie, sal julle Vader julle oortredings ook nie vergewe nie.”

In Matteus 6 fokus Jesus op die lewe van geregtigheid. Nadat Hy ses sleutelaspekte uit die wet in die stryd vir geregtigheid op die tafel gesit het, fokus Hy op hóé ‘n mens die lewe van geregtigheid beoefen.

Onthou: die dele uit die wet omsluit eintlik almal met wie jy in ‘n verhouding is.  Mense wat naby aan jou is soos huweliksmaats, en mense wat jou teenstanders en selfs jou vyande is.  Mense wat jou kwaad maak en ontstel met hulle dwaasheid en “nikswerd wees”, sowel as jou verhouding met jouself, waarin dit belangrik is om reg te kyk, reg te praat en reg op te tree teenoor dié wat jou kwaad (kan) aandoen.

Jesus lig in hierdie hoofstuk sewe oorhoofse aspekte van die lewe van geregtigheid uit:

1. Doen liefdadigheid in die geheim; die Vader sal jou beloon – Matt. 6:1-4
2. So moet julle dan bid – Matt. 6:5-15
3. So moet julle dan vas – Matt. 6:16-18
4. Maak vir julle skatte bymekaar in die hemel – Matt. 6:19-21
5. Sorg dat die lig in jou nie duisternis is nie – Matt. 6:22-23
6. Julle kan nie God én Mammon dien nie – Matt. 6:24
7. Soek eers die koninkryk van God en wat Hy vereis, en al hierdie dinge sal vir julle gegee word – Matt. 6:25-34

MATTEUS 5:43-48

43 “Julle het gehoor dat gesê is: ‘Jy moet jou naaste liefhê en jou vyand haat.’ (Lev. 19:18)

44 Maar Ek sê vir julle: Julle moet julle vyande liefhê en bid vir dié wat julle vervolg,

45 sodat julle kinders van julle Vader in die hemel kan wees, want Hy laat sy son opgaan oor slegtes en goeies en Hy laat reën op regverdiges en onregverdiges.

46 Want as julle dié liefhet wat vir julle liefhet, watter beloning het julle? Doen die tollenaars nie ook dieselfde nie?

47 En as julle net julle broers groet, wat besonders doen julle? Doen die heidene nie ook dieselfde nie?

48 Wees dan volmaak soos julle Vader in die hemel volmaak is.”