Esra
Esra en Nehemia wys hoe jy te werk gaan om ‘n geloofsgemeenskap op te bou. Ná die Kronis in 1 en 2 Kronieke sy waarderende blik op die verlede gegooi het om daaruit dinge te neem wat identiteitsvormend is, vertel hy in Esra-Nehemia verder van die drie leiers ná die ballingskap, naamlik Serubbabel, Esra, en Nehemia wat:
- die verhouding met God herstel deur die bou van die tempel en die herstel van die liturgiese omgang met God,
- die fokus op die regte en reflekterende lees van die Bybel plaas sodat dit die hele lewe kan deursuur en
- op die herstel van die muur van Jerusalem fokus sodat die geloofsgemeenskap kan gedy in ‘n veilige ruimte waarin lewe kan floreer. Dit gee vir ons prentjies van hoe ons met God kan saamwerk in ons eie tyd wat uiters inspirerend is.
Hoe om die Bybelboek te lees
Die Bybel moet ons lewe vorm. Daarvoor is dit nodig dat ons leer om die Bybel te leef terwyl ons dit lees. Daardeur hoor ons die stem van God in die Bybel, leer ons hoe om Jesus prakties te volg, en skryf die Gees ons in God se verhaal met die wêreld in.
Een van die maniere wat gelowiges deur die eeue gebruik het om die Bybel só te lees, dat dit jou lewe beïnvloed, jou transformeer, is Lectio Divina, geestelike of goddelike lees.
Gebruik die volgende metode om hierdie Bybelboek deur te werk:
RUS
- Raak stil. Dink na oor wat die afgelope 24 uur gebeur het. Dank God vir die goeie. Gee vir Hom die slegte.
HOOR
- Lees die gedeelte in die Bybel soos dit aangetoon word. Fokus op wat jou tref.
- Lees my bydrae oor die gedeelte.
- Kies een gedagte wat jou tref en dink daaroor na. Dink veral oor die praktiese betekenis daarvan vir jou.
- Antwoord die Here in gebed.
- Geniet ‘n paar oomblikke die teenwoordigheid van die Here sonder woorde.
LEEF
- Besluit op ‘n praktiese manier om op God se woord aan jou te reageer.
View all posts in this series
- Inleiding op die boek Esra - Aug 7, 2013
- Esra 1 – God beweeg Kores en die volk om na Juda terug te keer
- Esra 2-3 – Die Jode vestig hulle weer in die land en herstel hulle verhouding met God - Aug 8, 2013
- Esra 4 – Die mense van die land bied sterk weerstand teen die bou van die tempel en die mure van die stad - Aug 9, 2013
- Esra 5 – God ondersteun die leiers deur die profete Haggai en Sagaria in die bou van die tempel - Aug 12, 2013
- Esra 6 – Darius gee opdrag dat die tempel voltooi word met die ondersteuning van die staat - Aug 13, 2013
- Esra 7 – God stuur Esra as Skrifgeleerde om die onderrig en regspraak vanuit die wet van God te behartig - Aug 14, 2013
- Esra 8 –God bewaar Esra en sy geselskap en maak hulle reis voorspoedig - Aug 15, 2013
- Esra 9 – Esra verootmoedig hom namens die volk voor God oor hulle godsdienstig-gemengde huwelike - Aug 16, 2013
- Esra 10 – Die geloofsgemeenskap vernuwe die verbond deur godsdienstig-gemengde huwelike te ontbind - Aug 19, 2013
anoesjka kouter
Leer my hoe om te lewe vir God asb
Chris van Wyk
Anoesjka – 1) die lewe vir God begin by ‘n besef van sy liefde vir jou. Hy het al jou sondes op Hom geneem en jou gekies om sy kind te wees. Elkeen wat die Here Jesus as persoonlike Verlosser aanneem, is ‘n kind van God. Sy genade is dus spesiaal vir jou. Hy het jou vrygemaak om Hom te dien. Hy het sy Heilige Gees vir jou gegee, om jou te lei in die waarheid. Hy belowe dat niemand jou uit sy hand kan ruk nie. Hy gee jou die ewige lewe. 2) die lewe vir God sluit die volgende ses dinge in: Bybellees en bid, Erediensbywoning en ‘n kleingroep, diens en getuienis in hierdie wêreld. Met die eerste twee kan hierdie Bybelskool jou help. Kies ‘n boek en werk dit deur soos ek dit aandui. Vir die ander vier sal jy by ‘n plaaslike gemeente moet inskakel. Dit sal jou help om vas te staan as jy saam met ander aanbid in ‘n groot en klein groep. En om diens aan ander te lewer, en vir hulle te vertel van die Here Jesus se invloed in jou en ander se lewe, is iets wat jy maklik kan doen deur net met dié om jou te begin. Laat weet my hoe dit gaan.