Skip to main content

2 Korintiërs 10

Written by Chris van Wyk on . Posted in Kronologiese Bybelleesplan.

Paulus verdedig sy gesag om hulle op te bou in geloof en gehoorsaamheid

In aansluiting by Paulus se motiverings vir die regkry van die Korintiërs se dankoffer in hoofstuk 8-9, brei Paulus in hoofstuk 10 verder uit oor sy gesag as apostel. In hoofstuk 11 en 12 sal hy skryf oor sy stryd met die valse apostels in die konteks van God se openbarings aan hom, sowel as sy besorgdheid oor die Korintiërs se geestelike volwassenheid. Hy sal sy brief in hoofstuk 13 afsluit met ‘n paar slotopmerkings oor sy verdere reis van hulle af.

Teks en konteks

Let op die sarkastiese toon waarmee Paulus hierdie hoofstuk begin (vgl ook vers 10): “ek, wat mos ‘gedwee’ is as ek by julle is, maar ‘manhaftig’ teenoor julle as ek van julle af weg is”. Dit is ‘n duidelike aanduiding dat die volgende paar hoofstukke ‘n skerper aanslag gaan hê.

Tog koppel hy sy meer persoonlike kommentaar aan die Naam van Christus wat sy sarkasme relativeer. Let op hoe hy van Christus se sagmoedigheid (dit is ‘n beter vertaling as “nederigheid” – vgl Moses: Num 12:3 en Jesus: Matt 11:29; 21:5) en vriendelikheid praat.

Daarmee gee hy steeds ‘n duidelike gesag aan sy woorde, maar maak dit ook duidelik dat dit nie maar is net ter wille van homself wat hy hulle aanspreek en sy apostelskap verdedig nie. Dit is ter wille van en met die gesag van God self wat hy optree.

Hy doen dit aan die een kant met die nodige strengheid (vers 2), om met elke ongehoorsaamheid af te reken (vers 6), sonder egter om hulle bang te maak (vers 9). Sy opdrag en motivering is om op te bou en nie net af te breek nie (vgl. Jeremia se opdrag). Hy hoop daarom dat hulle geloof en gehoorsaamheid in die proses sal toeneem (vers 15).

Ek weet dat die skeidslyn tussen “ernstig beroep doen” (vers 1) en “bangpraat” (vers 9) baie fyn is. Maar, een manier om te sorg dat jy binne jou perke bly wanneer jy ‘n ernstige beroep doen, is om, soos Paulus, seker te maak dat jy in jou eie werkkring optree, en seker te maak dat dit God se opdrag aan jou is (vers 13).

Let ook mooi op dat vers 3-6 nie soseer direk aan geestelike oorlogvoering verbind word nie, maar dat Paulus hier eintlik besig is om die verkeerde idees aan te vat wat sommige van die Korintiërs het oor sy apostelskap. ‘n Mens kan wel in die tweede plek sy gedagtes op die afbreek van ander vestings in mense se gedagtewêrelde van toepassing maak, maar jy moet eers seker maak dat jy sy primêre boodskap goed verstaan.

Paulus spel ook nie die kragtige wapens van God direk uit nie, maar ‘n mens lei af uit vers 4-6 dat dit op gedagtes (redenasies, en hooghartige aanvalle teen die kennis van God wat dui op intellektuele en ideologiese denkraamwerke en wêreldbeskouings), sowel as ongehoorsaamheid (moreel-eties) gerig is, d.w.s. hoe mense dink en hoe mense leef.

Dit kom ooreen met wat Jesus gesê het oor die waarheid wat vrymaak: “As julle aan my woorde getrou bly, is julle waarlik my dissipels; en julle sal die waarheid ken, en die waarheid sal julle vry maak.” (Joh. 8:31-32).

Die waarheid verander dus beide ‘n mens se gedagtewêreld en jou gedrag. En dit is in wese wat geestelike oorlogvoering behels, nie ‘n aksie teen duiwels in die eerste plek nie, maar die bring van die waarheid wat die vestings van ongeloof en ongehoorsaamheid in mense se gedagtes en gedrag kan verower en hulle aan Christus verbind.

Hou ook in gedagte dat Paulus in Romeine 1:16 en 1 Korintiërs 2:4 die krag van God spesifiek uitspel in terme van die invloed wat die evangelie in mense se lewens het. Dit is nie gebed teen die geeste wat mense oortuig om die Here in hulle lewens te aanvaar nie, maar die evangelie wat aan die mense verkondig word. Die stryd moet in die gedagtewêreld van mense gevoer word!

Dit is in wese wat Paulus ook in sy latere brief aan die Efesiërs gaan skrywe dat die stryd teen die geeste oor sewe goed gaan: die 1) waarheid, 2) vryspraak, 3) verkondiging, 4) geloof, 5) verlossing, 6) God se woord en 7) gebed vir gelowiges en die bedienaars van die evangelie (Ef. 6:10-20).

Boodskap en betekenis

Paulus verdedig hier sy apostoliese gesag nie om homself te verhef nie, maar om sy gesag om die gelowiges op te bou in geloof en gehoorsaamheid aan Christus te verdedig. Hy doen dit met die sagmoedigheid en vriendelikheid van Christus self, maar terselfdertyd met absolute erns en dringendheid.

Sy gesag is dus gemik op die afbreek van ideologiese en immorele vestings in die denke en lewens van mense sodat hy hulle in geloofsvolwassenheid kan opbou. Die wapens waarmee hy veg, is die waarheid van die evangelie wat mense se denke hervorm en hulle lewens verander.

View all posts in this series

Discover more from Bybelskool

Subscribe to get the latest posts sent to your email.

Kronologiese Bybelleesplan

Chris van Wyk

Ek is Direkteur van Bediening en Geestelike Vorming by Veritas College International. My passie in die lewe is om God bo alles te dien en gelowiges in geloofsvorming te begelei. I am Director of Ministry and Spiritual Formation at Veritas College International. My passion in life is to serve God above all and to lead believers in faith formation.

Maak 'n opmerking

Onlangse kommentaar