Skip to main content

Openbaring 19:11-21

Written by Chris van Wyk on . Posted in Kronologiese Bybelleesplan.

Jesus Christus oorwin die antichris en vals profeet

Openbaring eindig met ‘n visioen van Satan wat deur die Woord van God, die Here Jesus, oorwin word (19:11-21), die duisend jaar van vrede wat aanbreek (Openb 20:1-10), die laaste oordeel wat plaasvind (20:11-15), en die nuwe hemel en aarde (21:1-8) en die nuwe Jerusalem wat deur God onthul word (21:9-22:5).

Teks en konteks

Die Woord van God op sy wit perd oordeel regverdig – Openbaring 19:11–21

Jesus Christus word in die volgende gedeelte voorgestel – met vier beskrywings wat herinner aan Openbaring 1 – in sy rol as beide die Regter wat regverdig oordeel en die Generaal wat met die swaard van sy mond met die leërs van die hemel die oorlog teen die Bose aanvoer en twee van die bose driemanskap (die antichris en die valse profeet) en hulle magte uitwis (die draak se uitwissing kom in die volgende hoofstuk).

Sy karakter word beskryf as een wat getrou is – die Getroue – en ook een wat die waarheid lief het – die Betroubare.

Hy het ‘n ontsagwekkende voorkoms met oë soos ‘n vuurvlam en op sy kop nie net sewe of tien krone soos die draak of die dier uit die see nie (Openb. 12:3; 13:1), maar baie krone.

Jesus het ‘n vyfde geskrewe Naam wat niemand ken, behalwe Hyself nie (vgl Openb. 2:17; 3:12), d.w.s. die diepte daarvan kan ons nie peil nie. Maar, die sesde baie bekende Naam is dat Hy die Woord van God genoem word, soos alreeds in die Johannes evangelie aangetoon is (Joh. 1). Daarmee kan ons identifiseer.

Dat sy klere deurweek is met bloed verbind Hom aan die vorige beeld van die wingerdoes (Openb. 14:14-20; vgl Jes 63:1-6) as die Regter en Generaal wat sy oordeel uitoefen.

Jesus lei die leërs van die hemel in ’n groot oorlog op wit perde om sy heerskappy te vestig. Die word deur sy vurige oordeel tot stand gebring. Hy is ‘n Herder, sy sewende beskrywing, maar met ‘n ysterstaf (vgl Ps. 2:9; Openb. 12:5).

‘n Agste besondere Naam is op sy kleed geskrywe wat Hom as die Koning van die konings en die Here van die heersers aandui.

’n Baie besondere engel – let op dat hy by of op die son staan! – kondig die vernietiging van die hele goddelose mensdom aan met die grusame beeld van ’n oproep aan die (aas)voëls van die hemel om aan die gesneuweldes in die oorlog te kom peusel. Die feesmaal word die “groot feesmaal van God” genoem. ‘n Grusame kontras met die bruilofsmaaltyd van die Lam.

Dit lei tot ‘n grootskaalse oorlog tussen die twee diere – die antichris uit die see en die valse profeet uit die aarde – en die Een wat op die perd sit met hulle magte, die Christus.

Die magte van die antichris en die valse profeet word in die oorlog oorwin (vgl. Armageddon wat met die sesde bak se oordele gebeur: Openb. 16:16) en hulle “is lewendig in die vuurpoel met brandende swael gegooi.” Die res van die mensdom het ook omgekom. Dit berei die weg voor vir die finale oorwinning oor die draak, die Satan.

Boodskap en betekenis

Jesus Christus word as die regverdige Regter en oorwinnaar geopenbaar wat in glorie terugkeer om die bose magte te oorwin en sy heerskappy te vestig. Sy titels en beskrywings beklemtoon sy goddelike gesag, betroubaarheid, en regverdigheid, terwyl sy bloedbevlekte klere sy rol as Regter en Generaal simboliseer. Die leërs van die hemel volg Hom in ‘n beslissende stryd teen die antichris en die valse profeet, wat uiteindelik in die vuurpoel gewerp word. Die toneel kontrasteer die vreugde van die bruilofsmaal van die Lam met die grusame “groot feesmaal van God,” waar aasvoëls die gevalle goddelose eet. Hierdie oorwinning berei die weg voor vir die finale oordeel oor Satan in die volgende hoofstuk.

View all posts in this series

Discover more from Bybelskool

Subscribe to get the latest posts sent to your email.

Kronologiese Bybelleesplan

Chris van Wyk

Ek is Direkteur van Bediening en Geestelike Vorming by Veritas College International. My passie in die lewe is om God bo alles te dien en gelowiges in geloofsvorming te begelei. I am Director of Ministry and Spiritual Formation at Veritas College International. My passion in life is to serve God above all and to lead believers in faith formation.

Maak 'n opmerking

Onlangse kommentaar

  • Hannes. on Hoe het “Bid die Psalms” jou gehelp?Middag Dr. Chris, Baie dankie vir ‘n insiggewende reis deur Psalms. Dit het beslis gehelp om my persoonlike gebedslewe te verbeter, en ek glo sterk dat elke gebed beslis my verhouding met die Here verdiep op ‘n manier waar ek tans baie meer pligsgetrou is teenoor my persoonlike stiltetyd en gesprekk…
  • Kobus on Hoe het “Bid die Psalms” jou gehelp?Dit was vir my 'n wonderlike ervaring, ek kyk met 'n ander insig nou na die Psalms
  • Chris van Zyl on Hoe het “Bid die Psalms” jou gehelp?Bid die Psalms het vir my baie beter insig verskaf, veral die kontektualisering en verklarings wat elke gedeelte belig het. Ek is so dankbaar dat ek kon deel in hierdie bid-gerigte ervaring. Menige dag het ek gevoel dat die Psalm van die dag spesiaal vir my bedoel was. Dankie Chris van Wyk vir hierd…
  • Chris van Wyk on Psalm 137Dit is my voorreg. Groete!
  • Doreen Snyders on Psalm 137Net om weer 'n slag dankie te sê vir al die wonderlike verklarings en verduidelikings van al die Bybelse waarhede. Ons dien 'n wonderbare en allerheilige God. Ek sien baie uit na die Matteusevangelie. Nogmaals baie dankie. Doreen Snyders
  • Chris van Wyk on Psalm 119:169-176Absoluut!
  • sparklybc467b2e69 on Psalm 119:169-176Psalm 119 is voorwaar ñ baie Geseënde Psalm
  • Chris van Wyk on Psalm 119:145-152Dis self opnuut weer ‘n vreugde vir my.
  • originalblizzard19aaa84c56 on Psalm 119:145-152Ek was altyd baie langtand om Ps 119 aan te durf, nou wens ek dat dit nie ophou nie... Ps 119 is te kort!!! PDH
  • sparklybc467b2e69 on Psalm 119:105-112Goeie middag, baie dankie vir die deel van die kosbare verhaal wat so gepas is met die Psalm
  • originalblizzard19aaa84c56 on Psalm 119:1-8Sien waarlik die nou verband tussen OT EN NT. waarlik verhelderend. אמן
  • Chris van Wyk on Psalm 118:19-29Ek gee maar net aan wat ek ontvang het. Dit bly egter 'n kosbare voorreg.
  • sparklybc467b2e69 on Psalm 118:19-29Goeie môre, baie dankie dat u met ons deel wie en waar die vertaaling van die Bybel sy oorsprong gekry het, dit is so kosbaar, baie dankie vir een en elkeen wat deel is en was om hierdie kosbare woord ook vir ons in ons Taal te kon uitlê
  • sparklybc467b2e69 on Psalm 110Baie dankie vir hierdie kosbaarhede wat u met ons deel. Ek het Openbaring 22 gelees en dit klink baie soos die tuin van Eden, hy praat van die boom van lewe. Die sondeval gemaak dat die mens gesondig het en dat hul nie meer in die tuin kon woon nie asgevolg van die sonde.
  • sparklybc467b2e69 on Psalm 109:6-19Goeie middag, ek wil ook by las dat in Psalm 139:23 bid David;"Deurgrond my, O GOD, en ken my hart, toets my en ken my gedagtes" GOD ken die mens en HY deersoek die hart en die gedagtes. Ek het self al telkens gebid, HERE vergewe hulle want hulle weet nie wat hulle doen nie en dan soos die woord sel…