Psalm 17

God verontagsaam nie die gebed van die hulpelose nie

Psalm 17 gaan oor die feit dat God die gebed van die hulpeloses nie verontagsaam nie. Dawid bid hier om verlossing op grond van God se regverdige karakter. Die Psalm pas dus goed by die uitdagings van sy vyande – beide Nabal en Saul – en Dawid se weiering om óf vir Nabal (hfst 25), óf vir Saul (hfst 26) dood te maak, maar op die Here staat te maak vir verlossing, soos Abigajil hom aangeraai het.

Teks en konteks

Psalm 17 is ’n Psalm vir beskerming wat ‘n onskuldige bid wat onder groot druk verkeer. Dit lyk asof dit ook ‘n nag-gebed is, want hy bid dit waarskynlik gedurende ‘n lang nag se worsteling met sy omstandighede (vers 3, 15).

Belangrik: dit is nie ‘n gebed van iemand wat homself probeer regverdig of probeer verontskuldig nie. Hy is in ‘n spesifieke situasie en kan eerlik sê dat hy geen skuld aan die omstandighede het nie. En hy wil nie net hê dat mense sal sien hy is onskuldig nie, maar dat God dit sal sien en daarom sal optree. Iets wat hy beklemtoon in al sy optredes teenoor Nabal, Saul, en Abner.

Dawid maak dus volledig staat op God se regverdigheid – en dat Hy niemand wat regverdig lewe in die steek sal laat nie. Laat my dink aan Paulus wat ook nie soseer bekommerd was of mense sy werk en lewe beoordeel nie, maar wat God daarvan sou dink (1 Kor 4:3-5).

Met pragtige metafore beskryf die Psalmis sy verlange, dat God hom soos sy oogappel sal beskerm, sal wegsteek onder Sy vlerke, en sal beskerm van die mense wat sy dood soek.

Let op hoe hy die twee-paaie metafoor van Psalm 1 gebruik en aanpas as hy oor sy handel en wandel praat en dit kontrasteer met dié van die goddelose in vers 5: “Elke stap van my was vas op die koers wat U aangewys het. My voete het nie daarvan afgewyk nie.”

‘n Mens hoor die herinnering aan die wonder van die Uittog uit Egipte in sy gebed in vers 7 (vgl Eks 15:11-13). Soos soveel keer in die Psalms is God se wonderdade in die verlede die aanleiding tot vertroue in die hede. Dit is waarom die geloofsgemeenskap ook so belangrik is vir elkeen wat onder druk kom in die lewe, want die wonderdade van God word juis in die geloofsgemeenskap lewendig gehou. En dit is ook waarom hy in vers 7 nie net van uitkoms in sy eie situasie praat nie, maar sê dat verlossing iets is wat vir almal geld in die geloofsgemeenskap.

Die keersy van die gebed om beskerming is Dawid se gebed van God se wraak vir die goddelose. Sy gebed is skerp en vol wraak. Hy bid dit selfs af op die goddelose se kinders en kleinkinders. Die geweld van die gebed vir die verwoesting van die arrogante opstandige goddelose is wel waarskynlik metafories, maar steeds erg! Dit is militêre taal, gekoppel aan die herinnering van die oorwinning oor farao in die Uittog (vgl Eks 15).

Let tog op dat Dawid se hoop lê in wat God kan doen, nie in sy eie planne of in die toeval van die oomblik nie. Dit is nie asof hy self die kinders en kleinkinders wil uitwis nie. Hy het konsekwent gekies om nie by wraak betrokke te raak nie, hoewel hy op sy sterfbed tog vir Salomo opdrag gee om die onreg van Joab teenoor Abner om hom in vredestyd te vermoor, en die vervloeking wat Simeï Dawid toegesnou het, te hanteer. Salomo het dit met wysheid hanteer. Joab is terstond tereggestel, en Simeï in huisarres geplaas, en ook tereggestel toe hy die ooreenkoms verbreek het (1 Kon 2).

Dawid se hoop sluit ook die ewigheid in. Vers 15 se verwysing na die wakker word uit die slaap, is waarskylik ‘n versluierde verwysing na die wakker word uit die dood se slaap. Dawid hou dus rekening hou met die feit dat niks God se teenwoordigheid kan troef nie, selfs nie die dood nie.

Boodskap en betekenis

Hierdie Psalm is ’n smeking dat God jou sal bewaar soos sy oogappel. Dat Hy reg sal laat geskied in die onreg wat jou aangedoen word. Dit is ook ’n aanmoediging om te dink voor jy praat, om jou denke in God se Woord te bly skool, sodat jou woorde en werke onberispelik kan wees.

Ons kom soms in situasies van erge leed aan die hand van ander mense. Bring jou ervarings voor die Here, wees eerlik, en bring dan jouself tot rus in die Here se teenwoordigheid. Hy sal intree vir jou. Hy sal jou vyande hanteer.