Bybelskool

Oor my

Ek het in 1978 op Stellenbosch teologie gaan studeer en in 1984 klaargemaak.  Terwyl ek verder gestudeer het, is ek in 1986 as studenteleraar na die gemeente Somerstrand, Port Elizabeth, beroep.  Ek het my studies in die Ou Testament voortgesit en my doktersgraad in 1993 behaal.  My onderwerp was “Die vervulde landsbelofte as literêre en teologiese motief in die boek Jeremia“.

Met die groei in die gemeente Somerstrand het ek in 1990 gemeenteleraar geword, ‘n pos wat ek tans nog beklee.  Ek is ongelooflik bevoorreg om so ‘n groot groep gelowiges te hê wat saam met my die pad stap, en my toelaat om nie net in die gemeente nie, maar ook wyer my gawes aan te wend en die Here op dié manier te dien.

My bediening het in die laaste paar jaar op twee vlakke ontwikkel.

  1. Ek is al hoe meer in leiersposisies ingetrek in die sinode en Algemene Sinode en dien tans op die moderatuur van die Algemene Sinode van die NG Kerk.
  2. Ek het ook by fasilitering van gemeentes en die ontwikkeling van materiaal vir geestelike verryking betrokke geraak, onder andere by GDN, Communitas en die Seisoen van Luister, waarvoor ek ook steeds as webmeester optree.

My betrokkenheid veral by die ontwikkeling van die luistersiklus van die Seisoen van Luister – en met die skrywe van ‘n hele paar boeke saam met Nico Simpson en Frederick Marais – het my passie vir die Bybel en die lees van die Bybel eksponensieel laat groei.

Met ‘n besoek aan die gemeente Willow Creek in Chicago, Illinois, in 2008 het hulle Midweek byeenkoms my uitgedaag om iets soortgelyks te probeer in Somerstrand.  En met ons beplanning in die gemeente is die gedagte van ‘n Bybelskool gebore.

En die res is geskiedenis, soos hulle sê. Ons het elke week bymekaar gekom tot in 2018!

Ek is deur my kollegas ondersteun met die uitdaging: Werk die hele Bybel deur! … en deur die Here se genade is dit presies wat ek kon doen. Bydraes oor al 1 189 hoofstukke van die Bybel is hier beskikbaar.

Skryf het uiteraard in die dekade-lange fokus op die Bybel al hoe meer belangrik geraak vir my. Ek het ‘n webtuiste geskep waar jy inligting oor al my boeke kan kry: chrisvanwyk.co.za. Jy kan die boeke ook daar aanskaf met die skakels wat ek verskaf.

Chris van Wyk

     

Comments (14)

  • Avatar

    Theresa

    |

    chris, ek is tans in iets wat soos n nagmerrie voel wat nooit einde kry nie, en my hoop en geloof is teen die grond. ek sal graag met jou wil gesels oor hoop en geloof want ek weet nie met wie om te praat oor die hoekoms en waaroms van die Bybel nie..asb sal jy my kan help met my vrae? dankie

    Reply

  • Avatar

    Past L Titus

    |

    Dit word meer en meer duidelik dat die Here sy bruid bymekaar maak.Hy roep meer en meer manne en vroue uit bestaande gevestigde kerke en bedieninge om die evangelie te verkondig.Die enkele groot hiervoor is dat die dwaalleër net so vurig verkondig word.Die Here seën u Bediening ek was self jaar met die AGS en nou is ons Seed of Abraham Ministries.Vir Theresa is Jer 23v23 so relevant

    Reply

  • Avatar

    Danie Malan

    |

    Chris
    Jou bydraes is kernagtig, verstaanbaar en geestelik baie verrykend. Mag die Here jou vandag in die gesig kyk en sy genade oor jou laat val soos ‘n sagte winterreen.

    Reply

    • Avatar

      Chris van Wyk

      |

      Dankie Danie. Die genade van die Here is juis vir my vandag soos ‘n rivier waaraan ek my oorgee. Het vanoggend met 5 tekste gewerk saam met die Seisoen van Luister span, en die wysheid van Spreuke het ons meermale op nuwe weë geneem.

      Reply

  • Avatar

    Pierre

    |

    Chris

    Dankie vir jou bybelskool. Ek gebruik jou insig baie in my eie bybelstudie.

    Salwing fassineer my in die laaste tyd. Het jy enige materiaal daaroor. Ek sal graag die geestelike verstaan van salwing wil weet maar ook die praktiese toepassing in vandag se tye.

    Bie dankie

    Pierre

    Reply

    • Avatar

      Chris van Wyk

      |

      Salwing
      1. Salwing met (olyf)olie is op verskillende wyses in ou Israel gebruik: as offer (Eks 29:40; Lev 8:26; Num 7:19), as simbool van toewyding vir voorwerpe (Eks 40:9–11 – die tabernakel, die altaar en ander voorwerpe), priesters (Lev 8:12, 30), en konings (1 Sam 10:1; 1 Kon 1:39). Die salwing met olie simboliseer in die OT dus veral die amptelike bevestiging of toewyding van iets of iemand aan die Here. Dit is nou benewens die gebruik van olie in die kosmaak proses (1 Kon 17:12), as medisyne en as salf vir sere (Jes 1:6; Mark 6:13; Luk 10:34) en by die versorging van die liggaam (2 Sam 12:20; Ps 104:15). Olie simboliseer ook voorspoed en oorvloed (Deut 33:24; Job 29:6; Eseg 16:13).
      2. Die OT praat ook van ‘n salwing met die Heilige Gees wat die ontvanger bemagtig en toegerus vir sy werk en roeping (Jes 61:1). Dit is ook wat gebeur het met die kerk in die NT toe die Heilige Gees uitgestort is (Hand 2). Só is gelowiges gesalf/bemagtig vir die taak wat God vir hulle in sy koninkryk gehad het (1 Joh 2:22 – “Julle is egter deur die Heilige Gees gesalf, en julle almal ken die waarheid” -vgl ook vers 27).
      3. Jesus word natuurlik by uitstek die Gesalfde genoem (Luk 2:26), wat in Aramees met Messias en in Grieks met Christus weergegee word. Al drie hierdie name: Gesalfde, Messias en Christus, beteken dus dieselfde, dat Jesus deur God as Verlosser van die wêreld gesalf en bemagtig is (Luk 4:18-19; Hand 10:38). Dit is wat Petrus ook van Jesus bely, “U is die Christus” (Mark 8:29).
      4. Die NT noem gelowiges natuurlik ook gesalfdes, omdat ons volgelinge van Christus is (2 Kor 1:21). Die Heidelbergse Kategismus vra in Vraag en Antwoord 32: “Waarom word jy ’n Christen genoem ?”, en antwoord: “Omdat ek deur die geloof ’n lid van Christus is en daardeur deel aan sy salwing het, sodat ek sy naam kan bely, myself as ’n lewende dankoffer aan Hom kan toewy en in hierdie lewe met ’n vrye gewete teen die sonde en die duiwel kan stry en hierna met Christus in ewigheid oor alle skepsels kan regeer.” Christen beteken dus beide volgeling van Christus en gesalfde van Christus.
      5. Salwing met olie is ook deur die dissipels gebruik in die proses om siekes gesond te maak, dit waarvoor die Here hulle uitgestuur en bemagtig het (Mark 6:13). Hierdie salwing met olie was dus aan die een kant die benutting van ‘n bekende geneesmiddel, maar ook ‘n simbool van die genesing wat God deur Sy Gees gee.
      6. Dit is waarskynlik ook waarom salwing met olie gebruik is as deel van die gebed om genesing deur ouderlinge (Jak 5:14). Omdat olie ‘n geneesmiddel was, was dit ook ‘n kragtige simbool van die gebed om genesing.

      Salwing het dus ‘n geestelike betekenis waar dit aan die werk van die Heilige Gees verbind word, en as deel van ‘n gebedsaksie gebruik word. Die krag lê natuurlik nie in die olie nie, maar in die Heilige Gees en in die gebed. Gebed sonder olie is daarby ook net so kragtig, soos vele plekke in die Bybel dit vir ons uitspel (bv Jak 5:16).

      Reply

  • Avatar

    Chris Visser

    |

    Hi Chris, jammer om n besige man te steur; Kan jy dalk raad gee; Ek skep n Blog op WordPress (sien skakel-adres) Ek soek raad uit jou ervaring met twee vrae:
    1) Watter raad het jy vir die baie Scam wat ek in my comments ontvang, en ek is nog nie eers aan die gang nie.
    2) Is dit wys om jou eposadres op jou Blog te gee?

    Reply

    • Avatar

      Chris van Wyk

      |

      Gebruik Akismet. Dis briljant en gratis. Kry ‘n ander adres, bv by gmail, en wys dit daar. Of gebruik ‘n vorm in WordPress waarmee mense met jou kan kommunikeer sonder om jou adres te sien. Contact Form 7 werk lekker.

      Reply

      • Avatar

        Chris van Wyk

        |

        O ja, en gebruik Wordfence vir sekuriteit. Dit gee jou ook ‘n goeie oorsig van wie jou blog besoek, en jy kan daarmee ongewenste mense uit hou. Dit het selfs ‘n Firewall, maar wees versigtig hoe hoog jy die sekuriteit stel.

        Reply

  • Avatar

    Petro Reynders

    |

    Beste Ds Chris

    Ek is so opgewonde oor hierdie nuwe webtuiste wat ek vanoggend ontdek met dank aan Radio RSG.
    Was besig om ontbyt vir my gaste by my B&B te maak en my radio is langs my stoof toe ek U hoor praat oor die bybelskool. Ek is tans besig om Rev. David Pawson van Engeland se You Tube Videos te kyk en ook sy boek Unlocking the Bible te bestudeer. Hy neem ook die Bybel van Genesis tot Openbaring en werk elke boek deur.

    Ek bid U seen toe en goeie gesondheid vir die werk van die Here waarmee U besig is asook vir hierdie webtuiste en die Bybelskool, dat dit sal groei en die uithoeke van die wereld sal bereik.

    Vriendelike Groete

    Petro Reynders
    ESTCOURT KZN

    Reply

    • Avatar

      Chris van Wyk

      |

      Dankie! Ek het ook David Pawson se boek geniet, en het verskillende ander soortgelyke boeke in Engels, onder andere Larry Richards se uitstekende Bible Reader’s Companion en sy Teacher’s Commentary asook Gordon Fee en Douglas Stuart se fenomenale How to Read the Bible Book by Book. Laasgenoemde was die inspirasie vir my aanpak, hoewel ek vir ‘n hoofstuk-vir-hoofstuk metodiek gekies het, en nie net boek-vir-boek nie. Dié twee reuse het ook ‘n uitstekende boek How to Read the Bible for All its Worth. Geniet!

      Reply

  • Avatar

    Jan

    |

    Om watter rede gebruik mense die Here se naam in die algemene gesprek voering.
    Ek praat van in fleiks, mense in nood- wat nie noodwendig tot God roep nie, maar net die hele tyd, in engels sê”O my God”, ens.
    Hoekom dan nie sê ” O my Allah” of wat ookal nie?

    Reply

    • Avatar

      Chris van Wyk

      |

      Mense gebruik die Here se naam ydelik om verskillende redes, soos in “O my God”. Sommige gebruik dit as ‘n stopwoord, uitroep of kragwoord. Hulle beklemtoon daarmee hulle verbasing of afgryse. Dit is egter gewoonlik onnadenkend en het geen godsdienstige betekenis nie. Hulle weet baie keer nie eers wat hulle sê nie. Jy sal egter min kinders van die Here kry wat sy Naam só ydelik gebruik. Ons weet immers dat ons van elke ydele woord rekenskap moet gee. Mense in die Weste gebruik nie die woord “Allah” op dieselfde manier nie, want dit het nie vir hulle dieselfde betekenis nie. Allah is wel net die Arabiese woord vir God, maar baie dink verkeerdelik dat dit ook die persoonsnaam vir die Moslem God is.

      Reply

Leave a comment

Onlangse kommentaar

  • Avatar

    Heather thebus

    |

    Baie leersaam God seen.

  • Avatar

    Chris van Wyk

    |

    Hi Herman. Die Nuwe Lewende Vertaling (NLV) is in 2006 deur CUM uitgegee. Die NLV is ‘n dinamies-ekwivalente vertaling soos die 1983 Nuwe Afrikaanse Vertaling (NAV). Ek het dit gebruik vir die boeke wat CUM uitgee, vandaar dat ek dit aanhaal. CUM het ook ‘n Afrikaanse Standaard Vertaling (ASV) wat ‘n direkte vertaling van die Bybel is, soos dit die geval is met Bybelgenootskap se Bybel Direkte Vertaling (BDV) waarvan die NT in 2014 uitgegee is, en die volle Bybel in 2020 verwag word. Dié vertalings is beter vir studie, soos die 1933 vertaling dit ook is, aangesien dit nader aan die oorspronklike teks is.

    CUM bied ook die Parallel Nuwe Testament te koop aan vir R99 waarin die teks van beide die ASV en die NLV se Nuwe Testament parallel langs mekaar verskyn sodat die Bybelteks maklik vergelyk kan word. Die ASV, as direkte vertaling, probeer so getrou moont­lik aan die bronteks bly deur byvoorbeeld die lang sins­konstruksies, so ken­merkend van Grieks, te behou, asook lengtemate en inhoudsmate (soos vaam, sata en el) en geldstukke (soos stater en mina), wat in voetnote verduidelik word. Jy sal dié twee vertalings baie bruikbaar vind.

  • Avatar

    Herman Steyn

    |

    Goeie more Chris.
    Byvoorbaat baie dankie vir elke dag se les. Dit word opreg waardeer.

    Vraag.
    Ek het nog altyd geglo en gebruik net die 33/53 vertaling. Ek sien jy verwys gereeld na die NLV. Wat is die verskil behalwe moderne/hedendaagse woordstellings. Sal jy aanbeveel om hom te gebruik vir studie??

    Byvoorbaat

    Herman

  • Avatar

    Chris van Wyk

    |

    Die Hebreeuse frase wat in Genesis 2:7 gebruik word is nishmat chajjim. Dit beteken “asem van die lewe”. In Genesis 6:17 word die frase ruach chajjim gebruik, wat met “gees van die lewe” of “asem van die lewe” vertaal kan word. Genesis 7:22 gebruik al drie woorde in die frase nishmat ruach chajjim wat eintlik maar op dieselfde manier vertaal kan word.

    Daarmee word heel breedweg na lewende mense verwys waarvan hulle asemhaling toon dat hulle lewe. Ander lewende wesens het ook lewe van God ontvang, maar mense word van hulle onderskei deurdat hulle ‘n deel van God se lewe – sy asem of gees – in hulle ontvang. ‘n Mens moet hierdie “gees” dus onderskei van God se “Gees”.

    Dié lewe – asem of gees – word egter teruggeneem met die dood. Dit is net dié wat in Christus is wat deur die Heilige Gees die ewige lewe ontvang en dus vir altyd God se asem in hulle sal hê.

  • Avatar

    Chris van Wyk

    |

    Fanie, jy glo dan nie in die Heilige Gees nie?

  • Avatar

    Leon

    |

    Dankie vir jou antw Chris.
    As ons Gen 2 v 7 lees dan sien ons dat elke lewende siel die Gees van God het. Volgens Handeling 8 v 17 en Hand 19 v 6 het net dié wat dit van die apostels ontvang het die Heilige Gees. Selfs die moslems het die Gees van God, maar hulle het nie die Heilige Gees nie!

  • Avatar

    Fanie Bekker

    |

    …ek probeer nou ook my foto by my naam plaas maar ek kry nie die plek hoe en waar mens dit kan doen nie… help tog asseblief.

  • Avatar

    Fanie Bekker

    |

    Ek probeer baie hard om te verstaan – en onthou, ek soek nie skoor nie, ek probeer regtig verstaan wat u verduidelik. Maar ek kry net nie die kloutjie by die oor nie. Miskien wil u, asseblief vir my die saak uit ‘n ander hoek verduidelik. Want, my vraag staan steeds: “…hoe kan dieselfde Heilige Gees wat my eens soos u laat verklaar het dat die Bybel die Woord van God is, my nou so oortuig dat dit toe inderwaarheid nie die Woord/e van God is nie.”?

  • Avatar

    Fanie Bekker

    |

    Alwyn, jy mis die boot. 🙂 Ek lees juis die pragtig saamgstelde daaglikse boodskappies van Bybelskool omdat ek dit geniet – dit beteken egter nie ek stem met alles saam nie. En, in plaas daarvan om my hoed en my handsak te vat ek weg te stap wanneer ek nie saamstem nie, bly ek deelneem… want hoe sal ek dan nou die ander kant van die saak hoor, en jy en Dr van Wyk, as ek nie hier bly, en bly deelneem nie? Inteendeel, ek sou ook graag wou lees hoe jy die saak sien in die lig van my eerlike openhartige kommentaar. Ek het ook nooit die indruk gekry dat mens alles wat jy in Bybelskool lees en leer vir soetkoek moet opeet nie? Mooi dag vir jou ook. 🙂