Skip to main content

Psalm 16:1-6

Written by Chris van Wyk on . Posted in Bid die Psalms.

Die fokus van hierdie Leesplan is gemeenskap met God. Ons begin telkens met die bid van die Ons Vader, bid dan die Psalm met ‘n tyd van nadenke, en sluit ons gebedstyd af met ‘n kort Lofprysing. Die idee is dat jy na die Ons Vader die kort gedeelte oor die teks en konteks van die Psalm lees, daarna die Psalm met aandag deurlees,  en dan vers vir vers in jou eie woorde (hardop as dit kan) bid. Daarna kan jy die kort bydrae oor die boodskap en betekenis lees vir nadenke. Sluit met die bid van die Lofprysing. Die middag en aand bid jy net die Ons Vader, die Psalm, en die Lofprysing.

Ons Vader

“Ons Vader wat in die hemele is, laat u Naam geheilig word. Laat u koninkryk kom. Laat u wil geskied, soos in die hemel, so ook op die aarde. Gee ons vandag ons daaglikse brood. En vergeef ons ons sondes, soos ons ook ons skuldenaars vergeef. En laat ons nie in versoeking kom nie, maar verlos ons van die Bose. Want aan U behoort die koninkryk en die krag en die heerlikheid tot in ewigheid. Amen.” (Matt. 6:9-13)

Teks en konteks

Die Psalm is al op baie maniere in koorstukke verwerk, omdat dit só ’n pragtige prentjie skilder van die rus wat daar in die teenwoordigheid van God is. Alles vloei uit die verwagting in die eerste vers: “Neem my in beskerming, o God; ek soek skuiling by U.” Want, Dawid bely in die eerste deel van die Psalm dat hy aan God behoort. Die Here alleen is sy erfenis, die Een wat sy lotsbestemming bepaal.

Bid die Psalm

“’n Gebed van Dawid. Beskerm my, o God, want ek kom na U toe vir skuiling. Ek sê vir die Here: “U is my Here! Alle goeie dinge kry ek van U alleen.” Die sogenaamde heiliges in die land, vervloek is elkeen wat vreugde in hulle vind. Mag hulle wat ander gode najaag baie droefheid beleef. Drankoffers van bloed sal ek nie uitgiet nie, of die name van hulle afgode op my lippe neem nie. Here, U alleen is my erfenis, my beker van seën. U waarborg my lotsbestemming. ’n Pragtige plek is vir my afgemeet. Wat ek geërf het, is vir my mooi!” NLV

Boodskap en betekenis

Iets wat my besonders tref, is dat Dawid bely dat God ’n aanspraak op Hom het: “Ek behoort aan U” (vers 2). Hy gebruik die woord ’Adonay wat Heer of Eienaar kan beteken. Hy sê: “My Heer is U”. Maar, dié feit, dat hy God se onderdaan of slaaf is – dat God ’n aanspraak op hom het – is nie vir hom’n verskrikking nie, maar ’n troos. Daar is regtig niks goeds vir hom behalwe by God nie – die tema van die Psalm. Daarom kan hy nee sê vir die afgode wat baie ander verlei (vers 3-4), omdat hy in God se teenwoordigheid die dwaasheid en smart besef wat afgodediens mense berokken. Luister vandag na enige van die toonsettings van hierdie Psalm op die Internet (bv.: “Neem my in beskerming” van die Drakensberg Seunskoor op YouTube) en wy jouself toe aan die Here, die Een aan wie jy ook behoort.

Lofprysing

“Weet vandag en verstaan dat die Here God is; Hy alleen is God in die hemel en op die aarde.” (Deut. 4:39)

View all posts in this series

Discover more from Bybelskool

Subscribe to get the latest posts sent to your email.

Bid die Psalms

Chris van Wyk

Ek is Direkteur van Bediening en Geestelike Vorming by Veritas College International. My passie in die lewe is om God bo alles te dien en gelowiges in geloofsvorming te begelei. I am Director of Ministry and Spiritual Formation at Veritas College International. My passion in life is to serve God above all and to lead believers in faith formation.

Maak 'n opmerking

Your email address will not be published. Required fields are marked *

Onlangse kommentaar