Skip to main content

Psalm 10:14-18

Written by Chris van Wyk on . Posted in Bid die Psalms.

Die fokus van hierdie Leesplan is gemeenskap met God. Ons begin telkens met die bid van die Ons Vader, bid dan die Psalm met ‘n tyd van nadenke, en sluit ons gebedstyd af met ‘n kort Lofprysing. Die idee is dat jy na die Ons Vader die kort gedeelte oor die teks en konteks van die Psalm lees, daarna die Psalm met aandag deurlees,  en dan vers vir vers in jou eie woorde (hardop as dit kan) bid. Daarna kan jy die kort bydrae oor die boodskap en betekenis lees vir nadenke. Sluit met die bid van die Lofprysing. Die middag en aand bid jy net die Ons Vader, die Psalm, en die Lofprysing.

Ons Vader

“Ons Vader wat in die hemele is, laat u Naam geheilig word. Laat u koninkryk kom. Laat u wil geskied, soos in die hemel, so ook op die aarde. Gee ons vandag ons daaglikse brood. En vergeef ons ons sondes, soos ons ook ons skuldenaars vergeef. En laat ons nie in versoeking kom nie, maar verlos ons van die Bose. Want aan U behoort die koninkryk en die krag en die heerlikheid tot in ewigheid. Amen.” (Matt. 6:9-13)

Teks en konteks

Dawid eindig Psalm 10 met die besef dat God die hele tyd alles gesien het en op sy tyd ‘n einde daaraan sal maak. Hy het dus nuwe moed, want God bly altyd die Een wat reg laat geskied en gebede verhoor.

Bid die Psalm

“Maar U sien die moeilikheid en leed wat hulle veroorsaak, ja, U, U sien dit raak en tree teen hulle op. Die hulpeloses vertrou op U, die beskermer van die weeskind. Breek die greep van die goddelose, dié wat kwaad bewerk! Roep hom tot verantwoording oor sy bose dade totdat U hom nie meer vind nie. Die Here is koning vir altyd! Die nasies is uit sy land verdryf. Here, U hoor die smeking van die hulpeloses. U sal hulle gerusstel en hulle gebede verhoor. U spreek reg oor wese en verdruktes sodat mense hulle nie meer verskrik nie.” NLV

Boodskap en betekenis

Psalm 9 en 10 is ‘n komplekse nadenke oor God se regverdigheid en sy sorg vir die wat ly onder die onreg wat ander hulle aandoen. Die goddeloses word in hierdie Psalm as praktiese ateïste geteken, mense wat nie noodwendig regtig glo dat daar nie ’n God is nie, maar Hom net nie in die praktyk van die lewe raaksien of wil raaksien nie. Dit bring die geloof van Dawid onder erge druk, omdat hy ly onder die aanslag van die goddeloses, nie net in terme van sy geloof in God nie, maar in sy geloof dat dié God optree in die nood, en ’n toevlug is vir dié wat in die nood is. Weereens, soos in vele ander Psalms, kom die verandering in Dawid se gemoed nie in die eerste plek uit omstandighede wat verander het nie, maar uit die geloofsbelydenis dat die Here altyd Koning bly, en dat Hy sal optree, soos Hy in die verlede telkemale al bewys het. Die spanning tussen God se regverdigheid en die lyding van die onskuldiges word dus opgelos in ‘n hernude toewyding aan en vertroue op God te midde van onsekerheid en lyding. Terwyl ons ook erken dat ons self sondig is en die verlossing wat net God alleen kan gee, nodig het.

Lofprysing

“Weet vandag en verstaan dat die Here God is; Hy alleen is God in die hemel en op die aarde.” (Deuteronomium 4:39)

View all posts in this series

Discover more from Bybelskool

Subscribe to get the latest posts sent to your email.

Bid die Psalms

Chris van Wyk

Ek is Direkteur van Bediening en Geestelike Vorming by Veritas College International. My passie in die lewe is om God bo alles te dien en gelowiges in geloofsvorming te begelei. I am Director of Ministry and Spiritual Formation at Veritas College International. My passion in life is to serve God above all and to lead believers in faith formation.

Comments

Maak 'n opmerking

Your email address will not be published. Required fields are marked *

Onlangse kommentaar