Skip to main content

Psalm 106:6-12

Written by Chris van Wyk on . Posted in Bid die Psalms.

Die fokus van hierdie Leesplan is gemeenskap met God. Ons begin telkens met die bid van die Ons Vader, bid dan die Psalm met ‘n tyd van nadenke, en sluit ons gebedstyd af met ‘n kort Lofprysing. Die idee is dat jy na die Ons Vader die kort gedeelte oor die teks en konteks van die Psalm lees, daarna die Psalm met aandag deurlees, en dan vers vir vers in jou eie woorde (hardop as dit kan) bid. Daarna kan jy die kort bydrae oor die boodskap en betekenis lees vir nadenke. Sluit met die bid van die Lofprysing. Die middag en aand bid jy net die Ons Vader, die Psalm, en die Lofprysing.

Ons Vader

“Ons Vader wat in die hemele is, laat u Naam geheilig word. Laat u koninkryk kom. Laat u wil geskied, soos in die hemel, so ook op die aarde. Gee ons vandag ons daaglikse brood. En vergeef ons ons sondes, soos ons ook ons skuldenaars vergeef. En laat ons nie in versoeking kom nie, maar verlos ons van die Bose. Want aan U behoort die koninkryk en die krag en die heerlikheid tot in ewigheid. Amen.” (Matt. 6:9-13)

Teks en konteks

Die Psalmis vereenselwig hom volledig met sy voorvaders. Dit is immers waarom hulle nou in ballingskap sit. Hy gaan egter voort om tegelykertyd op omvattende wyse ook hulle ervarings van verlossing en dissipline in die verlede as deel van sy eie geskiedenis te vertel. Die Psalmis begin deur twee verhale van die verlossing uit Egipte (magtige dade wat waarskynlik na die plae verwys, die trek deur die Rietsee) te noem – vers 7-12.

Bid die Psalm

“Ons en ons voorouers het gesondig. Ons het oortree en is skuldig. In Egipte het ons voorouers die Here se wonders gering geag, en sy baie dade van goedheid vergeet. By die Rietsee het hulle teen Hom in opstand gekom. Tog het Hy hulle gered ter wille van die eer van sy Naam, om sy mag bekend te maak. Op sy bevel het die Rietsee opgedroog sodat Israel op die seebodem kon trek. Dit was so droog soos ’n woestyn. Uit die vyand se mag het Hy hulle gered en hulle uit hulle teenstanders se mag verlos. Water het toe hulle vyande bedek. Nie een van hulle het dit oorleef nie. Toe eers het Israel sy beloftes geglo en het hulle sy lof besing.” NLV

Boodskap en betekenis

Op grond van dié herinneringe van die verlossing deur die Rietsee kan die Psalmis met oorgawe sy smeekgebed om ’n nuwe verhaal van verlossing verder voer om saam met die ander lede van die volk in ballingskap weer teruggebring te word na Israel toe. Dit is waarom hy ook soveel tyd afstaan om God te prys vir sy magtige dade in die verlede teen die agtergrond van Israel se sonde en opstand. Dit sluit wonders in sowel as straf wat albei van God se noue betrokkenheid by hulle getuig. Dit vorm die basis van sy smeekgebed om verandering; dat God weer sal optree soos Hy dit in die verlede gedoen het. Maar, hy is ook baie bewus van die feit dat die volk toentertyd op hierdie magtige dade met blydskap gereageer het, om egter maar net weer daarna terug te val in sonde en opstand. Implisiet is daarin ook ‘n waarskuwing vir ons ingesluit dat ons die Here moet vertrou sonder dat dit nodig is om deur ‘n tyd van tugtiging ons weer op die pad te kry.

Lofprysing

“Weet vandag en verstaan dat die Here God is; Hy alleen is God in die hemel en op die aarde.” (Deut. 4:39)

View all posts in this series

Discover more from Bybelskool

Subscribe to get the latest posts sent to your email.

Bid die Psalms

Chris van Wyk

Ek is Direkteur van Bediening en Geestelike Vorming by Veritas College International. My passie in die lewe is om God bo alles te dien en gelowiges in geloofsvorming te begelei. I am Director of Ministry and Spiritual Formation at Veritas College International. My passion in life is to serve God above all and to lead believers in faith formation.

Comments

Maak 'n opmerking

Your email address will not be published. Required fields are marked *

Onlangse kommentaar