Psalm 6

Die fokus van hierdie Leesplan is gemeenskap met God. Ons begin telkens met die bid van die Ons Vader, bid dan die Psalm met ‘n tyd van nadenke, en sluit ons gebedstyd af met ‘n kort Lofprysing. Die idee is dat jy na die Ons Vader die kort gedeelte oor die teks en konteks van die Psalm lees, daarna die Psalm met aandag deurlees,  en dan vers vir vers in jou eie woorde (hardop as dit kan) bid. Daarna kan jy die kort bydrae oor die boodskap en betekenis lees vir nadenke. Sluit met die bid van die Lofprysing. Die middag en aand bid jy net die Ons Vader, die Psalm, en die Lofprysing.

Ons Vader

“Ons Vader wat in die hemele is, laat u Naam geheilig word. Laat u koninkryk kom. Laat u wil geskied, soos in die hemel, so ook op die aarde. Gee ons vandag ons daaglikse brood. En vergeef ons ons sondes, soos ons ook ons skuldenaars vergeef. En laat ons nie in versoeking kom nie, maar verlos ons van die Bose. Want aan U behoort die koninkryk en die krag en die heerlikheid tot in ewigheid. Amen.” (Matt. 6:9-13)

Teks en konteks

Hierdie Psalm is uiters geskik as ’n gebed in siekte. Die woord “agtste” word in die opskrif met basstem vertaal. Dit kan ook met oktaaf vertaal word (1 Kron. 15:21) met die implikasie dat die Psalm in ‘n laer (dieper) stem gesing moet word. Dit dui dus aan vir watter atmosfeer die Psalm bedoel is, vir ’n donkerder tyd, ’n tyd van siekte, in ’n mens se lewe. Dawid sê nie hier aan watter siekte hy gely het nie, hoewel dit iets is wat sy liggaam (letterlik sy bene of beendere/skelet) uitgeteer het en hom (letterlik sy siel) gedaan gemaak het – d.w.s. fisies en/of psigies. Dit maak dit eintlik moontlik om die Psalm te gebruik vir enige behoefte aan genesing. Die wending vir Dawid kom in vers 9, miskien met een of ander begeleiding van die koorleier, of tussenkoms van ‘n priester in die tempel (dink aan Eli wat op Hanna se gebed in die tabernakel reageer – 1 Sam. 1:17) waarin God se ingrype geloof word. Anders kan dit net beteken dat sy gebed van wanhoop na vertroue beweeg het, en hy innerlik die bevestiging van God se antwoord gekry het.

Bid die Psalm

“Vir die koorleier: Met snarespel, met basstem. ’n Dawidspsalm. Here, straf my nie in u toorn, kasty my tog nie in u woede nie. Wees my genadig, Here, want ek is swak. Maak my gesond, Here, want my liggaam is vol pyne. My hele wese is angsbevange. Hoe lank nog, Here? Kom terug, Here, en red my. Genees my op grond van u liefde. Want wie onthou U in die graf? Wie kan U loof in die doderyk? Ek is vermoeid van verdriet. Snags is my bed deurweek, is my kussing nat van trane. My oë is dof van droefheid, dis verswak weens al my vyande. Gaan weg, al julle kwaaddoeners, want die Here het na my hulpgeroep geluister. Die Here het my pleidooi gehoor; die Here sal my gebed beantwoord. Al my vyande sal beskaamd en baie verslae wees; in ’n oogwink sal hulle beskaamd wees en omdraai.” NLV

Boodskap en betekenis

’n Mens kan op twee maniere kyk na die gebed dat God nie toornig of woedend teenoor hom sal optree nie. Omdat hy nie ’n sondebelydenis doen, kan dit wees dat hy hom onskuldig ag – soos Job – en daarom vra dat die lyding van hom weggeneem sal word. Hy dink nie dat hy dit verdien nie. Of miskien is hy juis versigtig om God se voorsiening in twyfel te trek deur vir genesing te vra, en vra daarom dat God nie vir hom kwaad sal word, net omdat hy vir iets anders vra – genesing – as wat vir hom uitgedeel is – siekte. As die laaste interpretasie korrek is, beteken dit dat die Psalm sê dat genesing nie vanselfsprekend is nie, maar iets is wat God uit genade gee. ’n Mens mag dus vir genesing vra, en God kan genesing gee, maar jy kan genesing nie afdwing nie. God gee… en God neem – soos Job so diepsinnig bely het. ‘n Mens hoor ook Jesus se roepstem na God en sy dissipels in Getsemane wat verband hou met hierdie gebed: “Hy sê toe vir hulle: “Ek is benoud tot sterwens toe. Bly julle hier, en waak saam met My.”” (Matt 26:38 NLV) Hy het gevra dat die beker van lyding by Hom verbygaan, maar moes egter God gehoorsaam deur die dood te verduur ter wille van ons voordat Hy die wonder van die opstanding kon beleef.

Lofprysing

“Weet vandag en verstaan dat die Here God is; Hy alleen is God in die hemel en op die aarde.” (Deuteronomium 4:39)