Psalm 24

Die fokus van hierdie Leesplan is gemeenskap met God. Ons begin telkens met die bid van die Ons Vader, bid dan die Psalm met ‘n tyd van nadenke, en sluit ons gebedstyd af met ‘n kort Lofprysing. Die idee is dat jy na die Ons Vader die kort gedeelte oor die teks en konteks van die Psalm lees, daarna die Psalm met aandag deurlees,  en dan vers vir vers in jou eie woorde (hardop as dit kan) bid. Daarna kan jy die kort bydrae oor die boodskap en betekenis lees vir nadenke. Sluit met die bid van die Lofprysing. Die middag en aand bid jy net die Ons Vader, die Psalm, en die Lofprysing.

Ons Vader

“Ons Vader wat in die hemele is, laat u Naam geheilig word. Laat u koninkryk kom. Laat u wil geskied, soos in die hemel, so ook op die aarde. Gee ons vandag ons daaglikse brood. En vergeef ons ons sondes, soos ons ook ons skuldenaars vergeef. En laat ons nie in versoeking kom nie, maar verlos ons van die Bose. Want aan U behoort die koninkryk en die krag en die heerlikheid tot in ewigheid. Amen.” (Matt. 6:9-13)

Teks en konteks

Hierdie Psalm word ten nouste met die ark verbind en is daarom soos Psalm 15 met die tempel verbind. Die twee Psalms vorm die buitenste konsentriese sirkel van die tien tempel Psalms met Psalm 19 se verheerliking van God se stem in die Skepping en in sy Woord die sentrum. Die ark van die Here het ‘n besondere geskiedenis. Nie net het dit die sigbare teenwoordigheid van die Here in die woestyn voorgestel nie. Nie net het dit ‘n plek in die heiligdom gehad, in die Allerheiligste deel, nie. Nee, dit was ook die sigbare teenwoordigheid van die Here as Israel geveg het. In die tyd van Dawid het die ark ‘n rusplek in Jerusalem gekry by die aanvang van sy regering (2 Sam. 6). Hier het dit dan gestaan, behalwe as dit tydens ’n oorlog saam met die leër geneem is (2 Sam. 11). Elke keer as hulle dan weer terugkom van die oorlog af, het hulle die ark op feestelike wyse in die stad ingeneem (2 Sam. 6:5,13). Blykbaar is hierdie Psalm op twee maniere gebruik met betrekking tot die ark. Eerstens is dit gesing op die eerste dag van die week, om die feit dat die ark ‘n rusplek in Jerusalem gekry het, te vier. Tweedens is dit gesing tydens die optog, wanneer die leërs terugkom van die oorlog af, en hulle die oorwinning kom vier. Dit is dus ‘n Psalm vir die tot-rus-kom, vir die tuiskoms van die ark, sowel as die viering van God se voortdurende teenwoordigheid by sy volk.

Bid die Psalm

“’n Dawidspsalm. Die aarde behoort aan die Here, met alles wat daarop is, die wêreld en alles wat daarop lewe. Die fondamente van die aarde het Hy in die oseane gelê, en dit op die riviere gevestig. Wie mag opklim teen die berg van die Here? Wie mag staan in sy heilige plek? Net hulle wie se dade onskuldig, wie se denke sonder bybedoeling is; wat nie bedrog pleeg nie en nie ’n eed valslik aflê nie. So ’n persoon sal die seën van die Here ontvang en God sy redder sal aan hom reg laat geskied. Só lyk die mense wat Hom dien en die God van Jakob aanbid. Sela Word hoër, o poorte! Word nog hoër, eeue oue deure, sodat die roemryke Koning kan ingaan. Wie is die roemryke Koning? Die Here, sterk en magtig, die Here, onoorwinlik in die stryd. Gaan oop, o poorte! Gaan oop, eeue oue deure, sodat die roemryke Koning kan ingaan. Wie is die roemryke Koning? Die Here, die Almagtige, Hý is die roemryke Koning. Sela” NLV

Boodskap en betekenis

Die Psalm is herhaaldelik by die tempel opgevoer. In so ’n opvoering het die mense aan die buitekant van die tempelpoort uitgeroep dat die poorte hulle moet ophef (hoër raak) en oopgaan sodat die magtige Koning kan ingaan. Dan het die priesters aan die binnekant gevra: “wie is hierdie magtige Koning?” en die mense buite het geantwoord: “Die Here, sterk en geweldig, die Here, oorwinnaar in elke stryd.” Dan het die tempelpoort oopgegaan as simbool dat die Here nou by sy mense is. Die boodskap van die Psalm is daarom tweërlei. Aan die een kant bevestig dit aan die gemeenskap van Israel dat: alles behoort aan die Here (vgl. Paulus wat dié teks aanhaal as bevestiging dat ‘n mens alles mag eet – 1 Kor. 10:26). Aan die ander kant verseker dit die mense wat in Sy teenwoordigheid wil lewe: dié God seën sy mense. Hierdie is ’n Psalm vir tot rus kom by God. Soos Jesus hierna sou sê: Kom na My toe almal wat vermoeid en belas is, en Ek sal vir julle rus gee (Matt. 11:25).

Lofprysing

“Weet vandag en verstaan dat die Here God is; Hy alleen is God in die hemel en op die aarde.” (Deut. 4:39)