Psalm 92

Die fokus van hierdie Leesplan is gemeenskap met God. Ons begin telkens met die bid van die Ons Vader, bid dan die Psalm met ‘n tyd van nadenke, en sluit ons gebedstyd af met ‘n kort Lofprysing. Die idee is dat jy na die Ons Vader die kort gedeelte oor die teks en konteks van die Psalm lees, daarna die Psalm met aandag deurlees, en dan vers vir vers in jou eie woorde (hardop as dit kan) bid. Daarna kan jy die kort bydrae oor die boodskap en betekenis lees vir nadenke. Sluit met die bid van die Lofprysing. Die middag en aand bid jy net die Ons Vader, die Psalm, en die Lofprysing.

Ons Vader

“Ons Vader wat in die hemele is, laat u Naam geheilig word. Laat u koninkryk kom. Laat u wil geskied, soos in die hemel, so ook op die aarde. Gee ons vandag ons daaglikse brood. En vergeef ons ons sondes, soos ons ook ons skuldenaars vergeef. En laat ons nie in versoeking kom nie, maar verlos ons van die Bose. Want aan U behoort die koninkryk en die krag en die heerlikheid tot in ewigheid. Amen.” (Matt. 6:9-13)

Teks en konteks

Die titel van Psalm 92 val op: ”ʼn Lied vir die Sabbatdag.” In die Joodse tradisie (Mishna) is daar ‘n Psalm vir elke dag van die week voorgeskryf om deur die Leviete tydens die daaglikse brandoffer in die tempel as die “lied van die dag” te sing: Psalm 24 op Sondag; Psalm 48 op Maandag; Psalm 82 op Dinsdag; Psalm 94 op Woensdag; Psalm 81 op Donderdag; Psalm 93 op Vrydag; en dan Psalm 92 op die Sabbatdag. Elkeen van die Psalms het op ‘n aspek van die skeppingsweek gefokus. In Psalm 92 se geval het dit die boodskap gedra dat dit goed is om elke môre God se goedheid en elke aand sy getrouheid aan te kondig, want sy groot dade maak ons bly. Die Psalm kan in drie dele opgedeel word: 1) Vers 1-7 – ‘n Danklied: “Dit is goed om die Here te dank/loof.” 2) Vers 8-12 – ‘n Belydenis: “Alle boosdoeners sal verstrooi word. U maak my sterk soos ’n buffel.” 3) Vers 13-16 – ‘n Verwagting: “Maar regverdiges sal blom soos ’n palmboom… Die Here is regverdig.” Weereens gee dié indeling ‘n mens ‘n handige struktuur vir jou eie gebede: dank, belydenis, verwagting. Ons lees dit as ‘n eenheid.

Bid die Psalm

“Dit is goed om die Here te dank, om u Naam te loof, Allerhoogste; om soggens u goedheid aan te kondig, en in die aand u getrouheid, met snaarinstrumente, met die harp en die begeleiding met die lier. U groot dade maak my bly, Here! Ek juig oor u handewerk. Hoe groot is u werke, Here! Hoe diep is u gedagtes! Net ’n onkundige sal dit nie weet nie! Net ’n dwaas sal dit nie verstaan nie! Die goddeloses floreer soos onkruid, en boosdoeners woeker met sukses; tog sal hulle vir goed vernietig word. Maar U is hoog verhewe. U, Here, bestaan vir ewig. Maar u vyande, Here, u vyande sal sekerlik vergaan. Alle boosdoeners sal verstrooi word. U maak my sterk soos ’n buffel. U salf my met vars olie. Ek sal die einde van my vyande sien. Ek sal hoor sonder om te vrees wanneer boosdoeners teen my opstaan. Maar regverdiges sal blom soos ’n palmboom, en welig groei soos ’n seder van die Libanon. Geplant in die Here se huis, groei hulle weelderig in die voorhowe van ons God. Al is hulle oud, sal hulle steeds vrugte dra; hulle is vars en lewenskragtig. Hulle sal sê: “Die Here is regverdig. Hy is my rots. By Hom is daar geen onreg nie.”” NLV

Boodskap en betekenis

Daar is min dinge wat ‘n mens meer bewus maak van die teenwoordigheid van die Here as om in lofprysing en danksegging voor die Here te verkeer. Wie dit nie besef nie, sê die Psalm, is onnosel. Wie dit nie insien nie, het geen insig nie. Sulke mense sal daarom uitgewis word, al lyk dit asof hulle voorspoedig is (onthou Ps. 73!). Die lof en dank lei vanselfsprekend tot ‘n belydenis dat God se koningskap vir ewig is en dat Hy dit sal bewys in die feit dat aan die een kant onreg en dié wat onreg pleeg, God se vyande, uitgewis sal word. Aan die ander kant sal God dit ook bewys dat Hy gelowiges deel sal hê aan die oorwinning oor God se vyande, wat ook die gelowiges se teëstanders is. Vir hulle hoef gelowiges dus nie in vrees te lewe nie. Hulle dreigemente sal tot niks kom nie. Daarom kan ons rus in die verwagting dat God in beheer is. Die Psalm gebruik die twee metafore van die krag van die palmbome sowel as die hoë seders van Libanon om hulle oorlewing en lewenskrag te beskryf. Omdat regverdiges die Here ken, sal hulle selfs in hulle ouderdom nog toeneem in krag, sodat ook dié getuienis sal aankondig dat die Here regverdig is. Hy bly vir ons die onbeweeglike rots.

Lofprysing

“Weet vandag en verstaan dat die Here God is; Hy alleen is God in die hemel en op die aarde.” (Deut. 4:39)