Bybelskool

Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Comments (3)

  • Avatar

    Francois Conradie

    |

    Dr van Wyk, hierdie vraag is ‘n bietjie uit pas uit met die jaarprogram.
    Vraag: Hoe is die boodskap van die boek Joël van toepassing vir ons as Nuwe Testamentiese Christene? Noudat vir ons sondes aan die kruis betaal is, is God se bedoeling nog steeds dat daar inkeer en omkeer van ons lewens moet wees voordat God sal help? Moet die verhoudings wat tussen ons en God en ons en ander mense verbreek is eers herstel word voordat God sal help? ( Ek verstaan dat God soewerein is en enige tyd kan help).
    As mens bogenoemde manier van verstaan deur trek na die huidige omstandighede in Suid Afrika, kan mens die afleiding maak dat ons as die volgeling van Jesus Christus ons voortgaande (nuwe onbelyde) sondes weer moet erken, bely en ons gedrag verander (omkeer) en voluit met dankbaarheid leef, voordat God die omstandighede in Suid Afrika sal verander?

    Reply

    • Avatar

      Chris van Wyk

      |

      Hi Francois

      Die sentrale tema in die boek van Joël is die koms van die “dag van die Here”. Dit het na my mening drie toepassings.

      1. Die eerste toepassing is op die Joodse volk. Die Here roep die Joodse volk op tot bekering deur die boodskap van oordeel wat in die “dag van die Here” opgesluit lê (1:1-20). Hy belowe medelye en voorspoed vir dié wat na Hom toe terugkeer (2:1-32). Vir dié wat egter nie luister nie, wag daar verwoesting, die verwoesting van die ballingskap.

      Dit is dan ook wat gebeur het met die volk van Juda. Hulle het nie geluister nie, en God het hulle gestraf. Hulle land is verwoes deur vier verwoestende sprinkaanplae (1:4-7) en die volk is in ballingskap weggevoer.

      Joël het egter ook gepraat van ‘n herstel van die volk (2:21-27), ‘n verandering van hulle lot (3:1-3), en oorvloed in die teenwoordigheid van die Here (3:18-21). Dit het ook waar geword met die terugkeer uit ballingskap.

      2. Die tweede toepassing is op alle mense. Die boodskap van die “dag van die Here” word in die NT na alle mense uitgebrei. Dit neem sy aanvang reeds met die koms van Jesus en sy kruisdood en opstanding (Joël 2:28-32; Matt 27:45-66), sowel as met die uitstorting van die Heilige Gees (Joël 2:28-32; Hand 2:14-36).

      Die Here roep deur hierdie boodskap almal op om tot inkeer te kom, soos Petrus dit eksplisiet uitspel in die tweede deel van sy toespraak op Pinksterdag (Hand 2:37-47). Dié wat gehoorsaam, ontvang vergifnis en die belofte van die Heilige Gees. Dié wat ongehoorsaam is, bly onder die toorn en straf van die Here.

      Dit is dus die hoofboodskap wat die boek van Joël nie net vir Christene het nie, maar vir alle mense. Bekeer julle, laat julle gedoop word tot vergifnis van sonde, en ontvang die Heilige Gees as gawe van God die Vader. Anders bly julle onder die oordeel van God.

      Die geestelike betekenis van hierdie boodskap oorheers dus in die NT, hoewel die “dag van die Here” vir seker ook politieke, ekonomiese en selfs ekologiese implikasies vir mensegroepe kan inhou.

      God praat immers nog steeds deur dinge soos oorlog, misoeste en droogte (Matt 24:1-14; Jak 5:17-18; Openb 11:1-14). Waar ‘n volk of land dus tot inkeer kom, sal die beloftes van Joël ook vervul kan word in ‘n lotsverandering en oorvloed in die teenwoordigheid van die Here.

      3. Die derde toepassing is op die kosmos. Die boek van Joël praat ook oor kosmiese veranderinge wat die einde van die tyd sal aankondig (Joël 2:1-11, 28-32; 3:9-17; Matt 24:29-35; Openb 6 – die kosmiese tekens; 9:1-12 – die sprinkane; 14:14-20 – die sekel en die parskuip). Die vervulling daarvan is nog uitstaande, maar net so relevant vir ons om mee rekening te hou vir die toekoms. Dit sal die hele kosmos betrek.

      Reply

  • Avatar

    Marinda Hattingh

    |

    Sjoe, báie dankie hiervoor. Duideliker kan die waarheid nie gestel word nie!

    Reply

Leave a comment

Onlangse kommentaar

  • Avatar

    Chris van Wyk

    |

    Ek het jou geregistreer Gawie. Welkom.

  • Avatar

    Chris van Wyk

    |

    Daar is twee datums wat redelik vasstaan waartussen Jesus se geboorte moes plaasgevind het.

    Die eerste is die volkstelling waarvan die evangelies skryf. In Lukas 2:1-3 verbind Lukas die geboorte van Jesus aan keiser Augustus (regeer van 27 vC tot 14 nC) en goewerneur Sirenius van Sirië. Sirenius word met die volkstelling geassosieer. Dit het in 8-6 vC plaasgevind. Jesus is dus ná 8 vC gebore.

    Die tweede is die dood van Herodes die Grote wat as die koning geteken word gedurende die geboorte van Johannes die Doper sowel as Jesus die Christus in Lukas 1:5. Herodes is dood in 4 vC soos Josephus dit vermeld. Herodes se dood het volgens Josephus tussen ‘n maansverduistering en ‘n Paasfees gebeur. Daar was ‘n maansverduistering op 13 Maart 4 vC ongeveer 29 dae voor die Paasfees. Daar is ook ander moontlikhede, maar dié datum word deur baie geleerdes aanvaar. Jesus is dus voor 4 vC gebore.

    Daarom plaas ek die aankondiging van Johannes die Doper se geboorte waarskynlik in ongeveer 7 of 6 vC. Die aankondiging van Jesus se geboorte vind dan gedurende die loop van ongeveer 6 vC plaas, want dit vind ses maande later plaas soos ons in Lukas 1:26 lees.

    Dit gee genoeg tyd vir die sterrekykers om op te daag, want hulle besoek Jesus in ‘n huis in Bethlehem, nie meer in die grot nie (Matt 2:11), sowel as die kindermoord (Matt 2:16)

  • Avatar

    Herman Steyn

    |

    Dankie Chris hiervoor. Datering bly vir my altyd ‘n interesante onderwerp. Sal jy asseblief net weer die feit dat Jesus in 4 nC gebore is en nie in die jaar 0 nie, beredeneer of my net verwys na ‘n skakel waar jy dit hanteer het?

  • Avatar

    Gawie van Schalkwyk

    |

    Registreer my op julle groep asseblief. Ek het toevallig op julle afgekom deur Google toe Die Heilige Gees my 03:00 wakker gemaak het om na iets te gaan soek.
    Baie dankie.

  • Avatar

    Chris van Wyk

    |

    Hi Johan, Die Noordland is ‘n term wat vir Babel gebruik word, dws in dié geval vir die ballinge wat sal terugkeer uit Babel (Jer 1:14-15 identifiseeer die Noorde met Nebukukadnesar se beleëring van Jerusalem). Babel was natuurlik meer oos van Israel, maar weens die Arabiese woestyn in die ooste van Israel, kon ‘n mens nie anders as om daar rondom te trek en Israel vanuit die noorde binne te trek nie. Die agterhoeke van die wêreld dui die mense aan wat nog verder verspreid is oor die wêreld – onthou daar was verskillende wegvoerings – wat ook sal terugkeer.

    Die Leviatan word met die krokkodil of seedraak verbind. Hy laat die diep water kook; “Agter hom lê ‘n blink streep op die water (see), lê die diep water wit van die skuim.” (Job 41:23). Selfs op die land is daar vir hom geen gelyke nie: “Hy kyk met minagting na diere groter as hy, hy is baas selfs oor al die groot diere.” (Job 41:25).

    Dit is egter duidelik uit die beskrywing van vonke, vuur, rook, en vlamme (Job 41:9-12) dat die Leviatan mitologiese en simboliese trekke het (Job 41:6-25). Die Leviatan word dan ook in die res van die Skrif as ‘n veelkoppige seedraak geteken wat God by die skepping getem het (Jes 27:1; Ps 74:14; 104:26). Leviatan word uiteindelik ook met die Satan verbind (Openb 12:9).

  • Avatar

    johan venter

    |

    Jeremia 31 vers 8 en Jeremia 6 vers 22

    Kyk ek bring hulle aan uit die Noordland en sal hulle bymekaar laat kom uit die agter hoeke van die aarde.
    Vraag: Waar is die Noordland en waar is die agter hoeke van die aarde?

    Psalm 104 vers 26. ( Job , Amos , Jesaja )
    Daar gaan die skepe en die leviathan wat u geformeer het om daarin te speel.
    Vraag : wat is die leviathan?

  • Avatar

    Chris van Wyk

    |

    ‘n Mens kan die volgende gegewens in ag neem om die vraag te beantwoord:

    1. Jesus se verwysing na Jona se “drie dae en drie nagte” (Matt 12:40) was ‘n Hebreeuse idioom wat vir enige kombinasie van ‘n deel van drie verskillende dae gebruik is. So skryf RT France in sy Jesus and the Old Testament en D A Carson in die Expositors Bible Commentary.
    2. ‘n Mens sien dit 1 Samuel 30:12-13 waar die frase gebruik word om iemand se uitputting aan te dui asook in Jona 1:17 vir Jona se tyd in die groot vis. Iets soortgelyks sien ‘n mens in 2 Kronieke 10:5 en 12 waar Rehabeam mense wegstuur om na drie terug te kom, maar hulle kom reeds op die derde dag terug. Dieselfde gebeur in die boek Ester waar sy die Jode beveel om drie dae en nagte te vas, maar dan “op die derde dag” voor die koning verskyn (Est 4:16; 5:1).
    3. ‘n Mens moet dus hierdie idiomatiese gebruik in gedagte hou as ‘n mens hoor dat Jesus self voorspel dat Hy na drie dae sal opstaan (Mark 8:31; 9:31; 34). Daarom kan Hy ook sê “op die derde dag” (Luk 9:22). Trouens, Jesus verklaar dat Hy “binne drie dae” sal opstaan (Mark 14:58).
    4. ‘n Mens moet verder ook onthou, die Joodse dae is van sononder tot sononder getel.
    5. Jesus word gekruisig op ‘n Vrydag, die “dag voor die sabbat” (Mark 15:42), die “dag van voorbereiding” (Luk 23:54; Joh 19:31).
    6. Die graf is van die Saterdag af bewaak omdat almal geweet het van die voorspelling dat Hy op die derde dag sou opstaan (Matt 27:62).
    7. Jesus word opgewek op die Sondag, die eerste dag van die week, en daarom die derde dag van sy dood (Mark 16:2; Luk 24:1; Mat 28:1; Joh 20:1).
    8. So Goeie Vrydag was die eerste dag (Donderdagaand tot Vrydagaand), Stil Saterdag die tweede dag (Vrydagaand tot Saterdag aand), en Paassondag die derde dag (Saterdagaand tot Sondagaand).
    9. Die helderste stem is egter Paulus wat vir ons sê Jesus is: “OP die derde dag opgewek, volgens die Skrifte.” (1 Kor 15:4).
    10. Paulus verwys hier na Hosea 6:2: “Hy sal ons ná twee dae lewend maak, op die derde dag sal Hy ons laat opstaan”, wat in Hosea eintlik net dui op die sekerheid van God se verlossing waarop die volk kan staatmaak, maar in die lig van Jesus se kruisiging en opstanding nuut geïnterpreteer word. Vir die volk belowe God dat sy oordeel baie vinnig opgehef sal word as hulle na Hom toe terugkeer. God wil hulle juis só motiveer om te reageer op sy aanbod. Die oorlog sal net twee dae duur! Vir Jesus het dit die betekenis gehad dat die tydperk van Jesus se dood net twee dae sal duur, dws op die derde dag sal Hy opstaan. So het Paulus dit uitgelê.

  • Avatar

    Ensie Enslin

    |

    Chris, hi.
    ‘n Neef van my vra uit Canada uit die vraag na die “3 dae en 3 nagte soos Jona”… en die “stukkies van 2 dae & 1 hele dag en net 2 nagte”? Ek het probeer oplees, maar óf die kommentatore raak nie die “issue” aan nie, óf hulle dwaal heel weg na die Woensdag-Sabbat kruisiging siening…
    Kan jy asb help?

  • Avatar

    Vanette Nagel

    |

    Prontuit die waarheid.

    Kostes verbonde?

Prontuit die Waarheid