Skip to main content

Vraag 39: Hoe help die Heilige Gees jou?

Written by Chris van Wyk on . Posted in Wie is God?.

1. Hoe help die Heilige Gees jou?

2. Lees my antwoord en oordink dit.

 Die Heilige Gees maak my ’n nuwe mens. Hy help my bid en om God se Woord te begryp. Hy gee my geloof, hoop en liefde. Hy troos en begelei my. Hy heilig en vernuwe my om die sonde af te sterwe. Hy dra sy vrug in my en gee my geestelike gawes. Hy waarborg my die ewige lewe en bly vir ewig by my.

3. Lees Lukas se verduideliking van die tweede vervulling van die eerste gelowiges met die Heilige Gees in Handelinge 4:1-31. Wat tref jou?

4. Lees my opmerkings daaroor. Oordink dit.

Die Heilige Gees gee ons waagmoed om onverskrokke van Jesus te vertel

Petrus en Johannes het van Jesus getuig voor die Joodse Raad. Hulle was vervul met die Heilige Gees. Die Joodse Raad was verbaas oor hulle waagmoed. Toe hulle losgelaat is, het al die gelowiges saam tot God gebid. Hulle het met God gepraat oor die mense wat saamspan teen Jesus. Hulle het gevra dat God hulle sy woord met waagmoed sal laat verkondig. Hulle het gevra vir tekens en wonders deur die Naam van Jesus. Ná hierdie gebed het die gebou waar hulle bymekaar was, geskud. Hulle is almal met die Heilige Gees vervul. Hulle het God se boodskap onverskrokke verkondig.

5. Lees die Dordtse Leerreëls 3-4.1.11-13. Dink na oor die werk van die Heilige Gees.

Dordtse Leerreëls Hoofstuk 3 en 4:

DIE VERDORWENHEID VAN DIE MENS, SY BEKERING TOT GOD EN DIE WYSE WAAROP DIT PLAASVIND

1. Die mens is van die begin af na die beeld van God geskape. Verstandelik was hy toegerus met ware en heilsame kennis van sy Skepper en van geestelike sake. In sy wil en hart was hy met geregtigheid toegerus en sy hele gesindheid was suiwer. Hy was dus volkome heilig. Maar deur die ingewing van die duiwel en uit sy eie vrye wil het hy hom van God losgeskeur en homself van hierdie uitnemende gawes beroof. Daarenteen het hy in die plek daarvan oor homself gebring: blindheid, verskriklike duisternis ydelheid en verdorwenheid van verstandelike oordeel, boosheid, rebellie en hardheid van sy wil en hart, sowel as onsuiwerheid van sy hele gesindheid.

11. Verder: wanneer God sy welbehae in die uitverkorenes tot uitvoering bring en die ware bekering in hulle werk, dan laat Hy die evangelie nie net uiterlik aan hulle verkondig nie. Hy verlig ook nie net hulle verstand kragtig deur die Heilige Gees, sodat hulle die dinge van die Gees van God reg verstaan en onderskei nie. Maar deur die kragtige werking van dieselfde Gees, wat die wedergeboorte skenk, dring Hy ook deur tot in die binneste dele van die mens, open Hy die geslote hart, versag Hy wat hard is en besny Hy wat onbesnede is. In die wil stort Hy nuwe eienskappe in en maak die wil, wat dood was, lewend; wat sleg was, goed; wat onwillig was, gewillig en wat ongehoorsaam was, gehoorsaam. Hy beweeg en versterk die wil sodat dit, soos ‘n goeie boom, vrugte van goeie werke kan dra.

12. Dit is die wedergeboorte, die nuwe skepping, die opwekking uit die dood en die lewendmaking waarvan die Skrif so heerlik spreek wat God sonder ons in ons werk. Dit alles word glad nie deur die uiterlike prediking alleen, deur morele oorreding of op enige ander wyse in ons gewerk nie, sodat, na die voltooiing van God se werk, dit dan in die mens se mag sou lê om weergebore te word of nie, om bekeer te word of nie. Dit is ‘n volkome bonatuurlike, baie kragtige en tegelyk baie aangename, wonderlike, verborge en onbeskryflike daad van God. Volgens die getuienis van die Skrif wat deur Hom, die Outeur van hierdie werkinge, geïnspireer is, is dit in sy krag nie minder of geringer as die skepping of die opwekking van die dooies nie. Die gevolg is dat almal in wie se harte God op hierdie wonderlike wyse werk, sekerlik, onfeilbaar en kragdadig weergebore word en daadwerklik glo. Dan word die wil, wat nou vernuwe is, nie alleen deur God gedryf en beweeg nie, maar omdat dit deur God beweeg word, werk dit ook self. Daarom word ook tereg gesê dat die mens, deur die genade wat hy ontvang het, glo en hom bekeer.

13. Die aard van hierdie werking kan die gelowiges in hierdie lewe nie volkome begryp nie. Intussen is dit vir hulle ‘n gerusstelling dat hulle weet en oortuig is dat hulle deur hierdie genade van God van harte glo en hulle Verlosser liefhet.

View all posts in this series

Wie is God?

Chris van Wyk

Ek is Direkteur van Bediening en Geestelike Vorming by Veritas College International. My passie in die lewe is om God bo alles te dien en gelowiges in geloofsvorming te begelei. I am Director of Ministry and Spiritual Formation at Veritas College International. My passion in life is to serve God above all and to lead believers in faith formation.

Maak 'n opmerking

Onlangse kommentaar