PSALM 26

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

PSALM 26

¹Van Dawid.

Handhaaf my reg, Here,

want ek, ek gedra my onberispelik;

ek vertrou op die Here,

ek wankel nie.

²Toets my, Here,

en stel my op die proef.

Suiwer my niere en my hart!

³Want ek hou u troue liefde voor oë

en ek leef volgens u waarheid.

⁴Ek sit nie by bedrieërs nie,

en by slinkse mense kom ek nie.

⁵Ek het ‘n weersin in die byeenkoms

van kwaaddoeners,

en by goddeloses sit ek nie.

⁶Ek was my hande

om my onskuld te toon,

sodat ek rondom u altaar kan loop, Here,

⁷om ‘n loflied te laat opklink

en te vertel van al u wonderdade.

⁸Here, ek het die huis

waar U woon, lief,

u heerlike woonplek.

⁹Moet my nie wegruk

saam met sondaars,

my lewe saam met manne

wat bloed vergiet nie,

¹⁰hulle aan wie se hande

‘n skanddaad kleef,

en wie se regterhand

vol omkoopgeld is.

¹¹Maar ek, ek gedra my onberispelik –

red my en wees my genadig!

¹²My voet staan op gelyk grond;

in die byeenkomste

sal ek die Here prys.

Teks en konteks

Die Psalm kom ooreen met Psalms 15 en 24 en was moontlik ook ‘n tempel-toetrede Psalm wat deur pelgrims gebruik is.

Dawid maak hier sy lewe oop voor God en lê sy integriteit (onskuld) in optrede en vertroue op God aan Sy ondersoekende oog bloot. Daarmee herinner hy ons daaraan dat sowel ons lewe in die wêreld as ons lewe met God volgens dieselfde waardes geleef moet word. Dit is waarom hy sê dat Hy hom deur God se liefde laat lei het. Hy het God se karakter as rigtingwyser gebruik in sy lewenstyl, terwyl hy ook op God vertrou het om dit te kan regkry (Fil 2:12 in OT gewaad!).

Dit gaan dus vir hom daaroor om in lyn met God se waardes en beginsels op te tree. Dit is die deurlopende tema in die Psalm soos in vers 1 en 11 aangedui word (onskuld kan met integriteit vertaal word): “Ek het met integriteit opgetree … Ek sal met integriteit optree … Red my en wees my genadig”. Maar wat vir my ongelooflik diepsinnig is, is dat hy homself weliswaar verbind aan ‘n lewe met integriteit (vers 1,11), maar tog in die laaste instansie staatmaak op God se redding en genade (vers 11).

“Ek het nie getwyfel nie” in vers 1 word deur Craigie as volg vertaal: “I shall not slip” wat beteken Dawid het nie opgehou om God te vertrou nie. Twyfel, volgens dié Psalm, is dus nie net om aan God se bestaan te twyfel nie, maar eerder om te twyfel in God se vermoë om betroubaar op te tree. Dit is ook die uitdaging vir ons vandag, om God te vertrou dat Hy in óns wêreld betrokke is en Sy wil sal laat geskied.

Hierdie verbintenis is iets wat natuurlik ook nie net met Dawid se eie manier van lewe te make het nie. Dit beteken ook dat hy nee sê vir die waardes en lewenstyl van bedrieërs, agterbakse mense, misdadigers, goddeloses, moordenaars en mense wat ander probeer omkoop.

“Ondersoek my deur en deur” in vers 2 beteken letterlik: “toets my niere en hart”, die setel van emosies en verstand. Dawid wil dus sy gevoelens en gedagtes aan God se ondersoekende oog blootlê dat God self sal sien dat hy met integriteit opgetree het en steeds so wil lewe.

Boodskap en betekenis

Dit is ook die manier waarop ons moet lewe. In absolute integriteit. Terwyl ons van God self ook vra om ons te ondersoek en te help om dit inderdaad te doen.

Die keuse om God te dien, vereis van ons om in elke dimensie van ons publieke en private lewe met integriteit te lewe. Dit is iets waarvoor ons verantwoordelik is. In elke keuse wat ons maak. Dit is egter ten diepste ook iets wat God vir ons gee. Waarvoor ons Hom moet vertrou.

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.