2 KORINTIËRS 4:13-5:1

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

2 KORINTIËRS 4:13-5:1

¹¹ Want ons wat leef, word voortdurend aan die dood uitgelewer ter wille van Jesus, sodat ook die lewe van Jesus in ons sterflike liggaam sigbaar kan word. ¹² So werk die dood dan in ons, maar die lewe in julle.

¹³ Maar aangesien ons dieselfde Gees van die geloof het – soos geskryf staan, “Ek het geglo, daarom het ek gepraat” – glo ons ook, en daarom praat ons. ¹⁴ Ons weet dat Hy wat die Here Jesus opgewek het, ons ook saam met Jesus sal opwek, en julle voor Hom sal stel. ¹⁵ Want dit gebeur alles ter wille van julle, sodat die genade, wat steeds meer mense insluit, die dankbaarheid oorvloedig kan maak tot eer van God. 

Die tydelike teenoor die ewige 

¹⁶ Daarom gee ons nie moed op nie, want selfs al vergaan ons uiterlike mens, word ons innerlike mens van dag tot dag vernuwe. ¹⁷ Want ons ligte en tydelike verdrukking bewerk vir ons ‘n gewigtige en allesoortreffende ewige heerlikheid, ¹⁸ terwyl ons nie let op die sigbare nie, maar op die onsigbare dinge; want die sigbare is tydelik, die onsigbare ewig. ^5:1 Ons weet tog dat wanneer ons aardse tentwoning afgebreek word, ons ‘n gebou het wat van God kom, ‘n ewige woning in die hemele, wat nie met hande gemaak is nie.

² En daarom sug ons, want ons verlang intens daarna om met ons woning vanuit die hemel beklee te word. ³ As ons net nie ontklee en nakend gevind sal word nie! ⁴ Want ons wat nog in die tentwoning is, sug as mense wat swaarkry, omdat ons nie ontklee nie, maar geklee wil word; sodat wat sterflik is, verteer kan word deur die lewe. ⁵ Hy wat ons juis hiervoor voorberei het, is God, wat aan ons die Gees as waarborg gegee het. (2020-vertaling)

Teks en konteks

In sy beskrywing van die triomf van die evangelie in die wêreld het Paulus in hoofstuk 3-4 vyf metafore gebruik om die rol wat ons in die wêreld speel, te beskryf: ons is soos wierook, briewe, spieëls, lig, en erdepotte. Alles in diens van die evangelie.

Hier aan die einde van hoofstuk 4 gebruik hy ‘n ander metafoor om die effek van die evangelie op onsself te beskrywe. Die evangelie skep in ons ‘n verlange na ons vaste gebou in die hemel. Paulus het al daaroor geskrywe en dit verbind aan ons hemelse liggaam (vgl 1 Kor 15). Dit beteken dat hierdie gebou beide ‘n plek in die hemel is (vgl Jesus in Johannes 14), as die verheerlikte liggaam wat God belowe vir ons wat nou net ‘n tentbestaan (ons aardse liggaam) voer.

Met hierdie metafoor van die gebou in die hemel, ‘n plek, ‘n liggaam wat nie aan sonde en verganklikheid blootgestel is nie, spel Paulus die hoop en verwagting uit wat ons, ten spyte van die uitdagings wat die evangelie aan ons stel, in ons omdra.

Die swaarkry van hierdie lewe, weet ons, gaan verby, en ons wag vir dít wat God gaan bring, en wat vir ewig sal staan, ‘n nuwe bestaan by Hom. Ons wag vir die opstanding van die liggaam. Ons wag vir ons plek in die hemel.

Hierdie verwagting laat ons aan die een kant sug dat ons eerder gouer as later die oorgang na die hemelse werklikheid kan beleef.

Maar, aan die ander kant gee die Gees ons die moed gee om te wag op God se tyd (vgl Rom 8).

Let op dat, anders as met die Grieke, wat net aan ‘n voortbestaan van die siel gedink het, Paulus eerder aan ‘n gebou dink, dws aan ‘n plek by God, en ‘n liggaam wat voortbestaan, vir ewig.

Dit is daarom dat ons net een begeerte het, om te lewe soos Hy dit wil, sodat niks ons kan keer om daardie vaste gebou te betrek nie, die verheerlikte liggaam wat God vir ons voorberei.

Boodskap en betekenis

Dit is ‘n wonderlike gedagte om jou in hierdie tyd van onsekerheid mee te bewapen. God het vir ons ‘n vaste gebou geskep. ‘n Plek by Hom ná die dood. ‘n Liggaam wat vir ewig sal bestaan.

Dit is hierdie boodskap waarmee die Gees jou dankbaarheid oorvloedig wil maak, en jou met hart en siel wil laat inwerp in die genadewerk wat God vir ons hier nog oor het.

Veral as jy kyk na dinge wat jou uiterlik aftakel. Die Gees help jou om te verstaan dat dit lig is (ja, dit is oppervlakkig in vergelyking met die allesoortreffende heerlikheid wat God vir jou skenk!) en tydelik.

En help om jou visie te plaas op die onsigbare dinge. Soos ‘n Abraham wat “die stad verwag wat fondamente het, waarvan God die argitek en boumeester is.” (Hebr 11:10)

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.