Skip to main content

MARKUS 10:46-52

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

MARKUS 10:46-52

GENESING VAN DIE BLINDE BARTIMEUS

(Matt 20:29-34; Luk 18:35-43)

46Hulle het in Jerigo aangekom. En toe Hy met sy dissipels en ‘n groot skare uit Jerigo vertrek, het ‘n blinde bedelaar, Bartimeus, die seun van Timeus, langs die pad gesit. 47Toe hy hoor dat dit Jesus van Nasaret is, begin hy uitroep: “Seun van Dawid, Jesus, ontferm U oor my!” 48Baie mense het hom berispend aangesê om stil te bly, maar hy het net al hoe harder uitgeroep: “Seun van Dawid, ontferm U oor my!” 49Jesus het gaan staan en gesê: “Roep hom!” Hulle roep toe die blinde man en sê vir hom: “Hou moed! Staan op! Hy roep jou.” 50Hy gooi toe sy bokleed af, spring op en kom na Jesus toe. 51Jesus vra hom: “Wat wil jy hê moet Ek vir jou doen?” Die blinde man antwoord Hom: “Rabboeni, dat ek kan sien.” 52Jesus sê toe vir hom: “Gaan! Jou geloof het jou gered.” En dadelik kon hy sien, en hy het Hom op sy pad gevolg. (2020-vertaling)

Teks en konteks

10:46 Jesus se reis na Jerusalem neem Hom deur Jerigo waar Hy net buitekant die stad die aandag van ‘n blinde bedelaar – Bartimeus, seun van Timeus – vang langs die pad.

10:47 Toe Bartimeus hoor dat dit Jesus van Nasaret is, het hy onmiddellik die konneksie gemaak dat Jesus die Seun van Dawid is en Hom gesmeek om Hom oor hom te ontferm.

10:48 Hy word ook nie afgesit deur die mense wat hom wou stilmaak, en hom selfs berispe het nie, en het net met nog meer passie na Jesus geroep.

10:49-50 Toe Jesus gaan staan en die skare vra om die blinde na Hom toe te roep, het hulle Bartimeus moed ingepraat om op te staan en na Jesus toe te gaan. Die man het dit onmiddellik gedoen, selfs sy bokleed afgegooi wat hom miskien kon pooitjie, opgespring en na Jesus toe gekom.

10:51 Jesus het natuurlik besef dat die titel – Seun van Dawid – hom polities in die moeilikheid kon bring, want dit was ‘n baie duidelike Messiaanse uitspraak (Jer 33:17). Die tyd vir sy volledige publieke bekendmaking het egter aangebreek. Hy sou selfs net hierna met die Fariseërs in gesprek tree oor dié titel (Joh 12:35). Daarom vra Hy Bartimeus wat hy wil hê dat Jesus, die Seun van Dawid, vir hom moet doen. Uiteraard was genesing voorop in die blinde se gedagtes en hy vra dit toe van Jesus. Let op die titel Rabboeni, ‘n aanspreekvorm van groot respek.

10:52 Jesus het aan sy versoek voldoen, maar die verwysing na sy geloof wat hom gered het, wys dat dit vir Jesus nie net om die genesing gegaan het nie, maar oor die redding van die blinde Bartimeus. Geen wonder dat Bartimeus Jesus op die pad verder gevolg het nie.

Boodskap en betekenis

Dit tref my hoe Bartimeus as blinde alreeds ‘n gespitste fokus het op Jesus as die Messias en nadat die Messias hom genees het, hy onmiddellik ‘n volgeling van Hom word.

Daarby het hierdie laaste wonder van Jesus, soos Markus dit vertel, ‘n simboliese betekenis net voor sy Intog in Jerusalem. Jesus het gekom om die volk van hulle blindheid te verlos. Hy illustreer dit met die genesing van Bartimeus. Maar, soos ons sal sien, sal hulle die Een verwerp wat hulle geestelike blindheid wou genees.

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.

View all posts in this series

Leesrooster 2021


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Maak 'n opmerking

  • Chris van Wyk on Psalm 71Sy het die Here gedien met haar hele hart en eerder my met huisbesoek bemoedig as wat ek dit vir haar gedoen het. Sy was een van die pilare van ons geloofgemeenskap.
  • Neels Fourie on Psalm 71More dr vertel my meer van tannie phoebe
  • Chris van Wyk on 1 Kronieke 28-29Groete!
  • Wansen Engelbrecht on 1 Kronieke 28-29Baie dankie. Groetnis Wansen Engelbrecht Klerksdorp
  • Chris van Wyk on Genesis 1:1-2:3Is dit op 'n selfoon?
  • Johan Kirsten on Genesis 1:1-2:3Middag Chris. Ek merk dat as jy op die "menu" hierbo tik, die blok wat aan die linkerkant verskyn, blanko is. Daar is wel "onsigbare" skakels wat jou na die verskillende bladsye neem. Groete. Johan
  • Chris van Wyk on Psalm 11Dankie, Jenny. Ek het self weer baie moed uit dié Psalm 11 gekry. Veral uit die feit dat ons nie baie beheer het oor die fondamente nie, maar op God kan vertrou wat opregtes suiwer en goddeloses skroei, soos dit in die laaste deel van die Psalm uitgespel word. God kan oneindig meer doen as wat ons k…
  • Jenny on Psalm 11Baie dankie vir die boodskap wat weereens soos vorige boodskappe my help om deur baie swaar tye te kan kom. Die laaste jaar is daar so baie berge wat my toesak dat ek net kan vasklou aan God se woord en U maak dit makliker om sekere dinge beter te verstaan en net aan te hou glo en vertrou. Baie dank…
  • Chris van Wyk on Die Twaalf Kleiner ProfeteDankie Johan, waardeer.
  • Johan v Zyl on Die Twaalf Kleiner ProfeteHi Chris net so baie dankie vir die enorme werk wat jy in Bybelskool doen. Ek gebruik dit elke dag in my bediening hier in Lichtenburg Klipkerk. Ek het op 60 die Bybel herontdek met nuwe passie . Jesusliefde Johan v Zyl
  • Chris van Wyk on Salwing in die BybelEk is bly, Stoffie, dat ek kon help. Die waarhede in die Skrif is ons diepste en enigste beskerming teen dwaling.
  • Stoffie Van Dyk on Salwing in die BybelEk het die afgelope Sondag 'n diens bygewoon wat my baie ontstem het - mense in die gehoor is gesalf deur 'n "profetes", en snaakse dinge het gebeur. Hierdie hele skrywe oor die salfgebruik, en van die antwoorde op vrae was vir my baie leersaam omdat dit vir my Skriftuurlik is. Baie dankie
  • Chris van Wyk on 2 Samuel 18Dankie Lesley, waardeer.
  • Lesley Barnard on 2 Samuel 18Pragtig, ñ mooi toepaslike verduideliking.
  • Chris van Wyk on 2 Samuel 17Hi Hettie. Daar is twee letters in Hebreeus wat amper dieselfde geskryf word, maar verskillend uitgespreek word. Daar is die normale h wat uitgespreek word soos ons dit normaalweg doen. Dan is daar egter ook die letter ḥ (geskryf met 'n h met 'n punt onder) wat anders uitgespreek word. Die uitspraak…