MARKUS 9:2-8

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

MARKUS 9:2-8

² En na ses dae neem Jesus vir Petrus en Jakobus en Johannes saam en lei hulle op na ’n hoë berg waar hulle alleen op hulle eie was. Hy het voor hulle van gedaante verander ³ en sy klere het glansend wit geword, baie wit, soos wat ’n materiaalkleurder op die aarde dit nie kan wit maak nie.

⁴ Elia het toe saam met Moses aan hulle verskyn en was in gesprek met Jesus. ⁵ En in antwoord sê Petrus vir Jesus: “Rabbi, dit is goed dat ons hier is. Laat ons drie tente maak, een vir U, een vir Moses en een vir Elia.” ⁶ Want hy het nie geweet wat hy moes sê nie, want hulle was beangs.

⁷ Daar het toe ’n wolk gekom wat ’n skaduwee oor hulle gooi en ’n stem het uit die wolk gekom: “Hierdie is my geliefde Seun. Luister na Hom!” ⁸ En skielik, toe hulle rondkyk, het hulle niemand meer gesien nie, net Jesus alleen by hulle. (ASV)

Teks en konteks

9:2 Die driemanskap – Petrus, Jakobus en Johannes – kry die voorreg om ses dae later deur Jesus ‘n hoë berg op begelei te word na ‘n baie intieme heilige ontmoeting. Die tydperk kom ooreen met Moses se ses dae wag in voorbereiding vir God se verskyning op die berg Sinai (Eks 24:16-18).

Jesus het voor hulle van gedaante verander. Die woord wat gebruik word is letterlik metamorfose (metamorphoomai) of soos dit in Engels vertaal word transfiguration. Hy het hier sy gestalte wat Hy as God gehad het aangeneem, dié gestalte wat Hy juis ingestort het in sy menslikheid (Fil 2:5-11).

9:3 Sy klere het ook glansend wit geraak, baie wit, so wit soos geen bleikmiddel of materiaalkleurder dit kan maak nie.

9:4 Elia (verteenwoordig die profete) en Moses (verteenwoordig die wet) het met Hom in gesprek getree oor sy dood of “eksodus”. Daar is ook ‘n goeie saak uit te maak dat dié twee aan die twee getuies in Openbaring verbind kan word (Openb 11:3-12).

Dit is duidelik dat Jesus se Goddelikheid hier deur sy menslikheid geskyn het. Dit laat ‘n mens dink aan die Een soos die Seun van die mens wat in Daniël 7 na die “Ancient of days” gekom het van wie Hy die heerskappy oor die nasies ontvang het.

9:5-8 Petrus se verskrikte reaksie is om drie hutte vir Elia, Moses en sy “rabbi” Jesus te probeer bou, maar as die wolk (aanduiding van God se teenwoordigheid – Eks 16:10) sy skaduwee oor hulle laat val, en die stem Jesus as God se geliefde Seun identifiseer, bly hulle agter met Jesus alleen, dié een na wie hulle moet luister. Net Hy kan God se plan in werking stel.

Boodskap en betekenis

Dit is regtig heilige grond waarop ons staan as ons dié gedeelte lees. Jesus wat in sy volle Goddelike gestalte transformeer as ‘n laaste motivering om die pad van die Lydende Messias enduit te loop.

‘n Mens kan nie anders as om te dink aan Hebreërs 12:2 waar die motivering vir Jesus se aanvaarding van die kruisdood en die skande daarvan aan die vreugde wat vir Hom in die vooruitsig was toegeskryf word. Die verheerliking op die berg berei Hom en sy dissipels voor op die lydenspad wat hierna in intensiteit toeneem.

Let ook op hoe die kruisdood en opstanding as ‘n “eksodus” beskryf word. Die kruisdood en opstanding bewerk die verlossing presies soos die Uittog uit Egipte aanvanklik die Israeliete verlos het om die beloofde land in besit te neem, en daarna die Terugkeer uit die ballingskap in Babel wat Israel weer gevestig het in hulle eie land.

Vir Jesus het dit beteken dat Hy deur die opstanding uit die dood met God verenig sou word. Vir ons het Hy só die weg na die ewige lewe by God gebaan.

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.