JESAJA 50:4-11

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

JESAJA 50:4-11

Ons lees weereens die perikoop saam met die vorige een ter wille van konteks.

¹ So sê die Here:

“Waar is julle moeder se skeibrief 

dan nou waarmee Ek haar 

weggestuur het?

Of wie van my skuldeisers is daar 

aan wie Ek julle verkoop het? 

Kyk, oor julle sondeskuld 

is julle verkoop,

en oor julle oortredings 

is julle moeder weggestuur.

² Waarom het Ek gekom, 

en daar was niemand nie, 

het Ek geroep, en niemand 

het geantwoord nie?

Was my hand werklik te kort 

om te red?

Of was daar geen krag in My 

om uit te red nie? 

Kyk, deur my dreigende woord 

laat Ek die see opdroog – 

Ek maak van riviere ‘n woestyn. 

Die visse daarvan stink 

weens ‘n gebrek aan water – 

hulle sterf van dors. 

³ “Ek beklee die hemelruim 

met donkerte; 

Ek bedek dit met ‘n roukleed.” 

Dienskneg van die Here

⁴ Dit is my Heer, die Here,

wat aan my ‘n vaardige tong gegee het,

sodat ek kan weet 

hoe om vermoeides 

met ‘n boodskap op te beur.

Elke oggend maak Hy my wakker; 

Hy wek my oor om soos ‘n leerling 

te luister. 

⁵ My Heer, die Here,

het my ore oopgemaak, 

en ek, ja, ek was nie opstandig nie; 

teruggedeins het ek nie.

⁶ My rug het ek gehou 

vir hulle wat slaan, 

en my wange vir hulle wat baard uitpluk. 

My gesig het ek nie verberg 

vir beledigings en spuug nie. 

⁷ Dit is my Heer, die Here, wat my te hulp kom; 

daarom voel ek nie verneder nie; 

daarom het ek my gesig 

soos vuurklip gemaak. 

Ek het geweet dat ek nie beskaamd 

sou staan nie. 

⁸ Hy wat my reg handhaaf, is naby. 

Wie sal teen my ‘n regstryd voer? 

Laat ons saam plek inneem! 

Wie is die teenstander in my saak?

Laat hy naderkom! 

⁹ Kyk, my Heer, die Here, kom my te hulp. 

Wie is dit wat my skuldig 

sal verklaar? 

Kyk, hulle sal almal 

soos ‘n kleed verslyt,

motte sal hulle wegvreet. 

¹⁰ Wie is daar onder julle 

wat ontsag het vir die Here,

wat luister na die stem 

van sy dienskneg? 

Hy wat in duisternis verkeer, 

wat geen lig het nie, 

moet op die Naam 

van die Here vertrou, 

moet op sy God steun.

¹¹ Kyk, julle almal wat vure aansteek, 

wat julle met brandpyle bewapen, 

loop dan in die gloed van julle vuur, 

ja, tussen die brandpyle 

wat julle aangesteek het!

Deur my hand het dit met julle gebeur; 

in ‘n plek van pyniging sal julle lê. (2020-vertaling)

Teks en konteks

Jesaja wei in vers 1-3 weer uit oor die redes vir die ballingskap. Dit is weens hulle sondeskuld en oortredings dat Hy hulle “geskei” het en hulle soos aan “skuldeisers” verkoop het. Maar, die Here verklaar dat dit net tydelik was. Die finale skeibrief is nooit uitgereik nie. Daar was in elk geval nooit enige skuldeisers wat kon aanspraak maak op hulle nie.

Die Here is egter uiters verbaas dat niemand onder die ballinge na Hom geroep het nie. Hulle kan tog nie onkundig wees oor hoe magtig die Here is nie? Hy het immers hemel en aarde beweeg in die verlede om sy liefde vir hulle te illustreer. Dit het Hy tog geïllustreer met sy redding uit Egipte. Vergelyk die verwysing na die plae in Egipte (vgl die eerste plaag – visse vrek – en die negende plaag – donkerte) en die tog deur die Rietsee in vers 3.

Daarna volg in vers 4-11 die derde gedeelte in Jesaja wat handel oor die Dienaar van die Here. Hier is Hy in ‘n selfgesprek oor sy ervaringe in sy bediening en die boodskap wat dit gee vir elkeen wat die Here wil dien.

Die Dienaar van die Here dink na oor God wat Hom deur die regte toerusting in staat gestel het om dié wat moeg is, moed in te praat. Elke oggend het God Hom wakker gemaak om Hom te leer. Om na God te luister het sy hele bediening en lewe gestruktureer. En die Dienaar het nooit nee gesê of teruggedeins vir wat God van Hom gevra het nie. Selfs nie toe Hy fisiese pyn verduur het en ontsettende beledigings moes trotseer nie.

Hy kon volhard in die ontsettende lyding in die uitvoering van sy bediening, omdat die Here in die pyn Hom gehelp het om staande te bly, selfs al moes Hy onregverdige aanklagtes verduur.

Wat Hom veral gehelp het, is die besef dat die Een wat sy reg handhaaf nie sal stilbly nie. Dat Hy uiteindelik aan Hom reg sal laat geskied. Dan sal niemand eers probeer om sy teenstander te wees nie! Nie met die Here as sy hulp nie. Sy teenstanders sal soos mis voor die son verdwyn.

Trouens, dit is presies die boodskap wat elkeen wat die Here dien, moet omhels. As jy ontsag het vir die Here, as jy luister na sy stem, moet jy volhard om op Hom te vertrou selfs al beleef jy duisternis. Elkeen wat volhard in die duisternis sal uiteindelik die lig sien aanbreek in sy lewe. Die Here sal die donker laat wyk.

En dié wat die brandpyle aangesteek het, dié wat in die gloed van die vuur wat hulle vir ander aangesteek, geloop het, sal deur die hand van die Here getref word: “in ‘n plek van pyniging sal julle lê.” ‘n Duidelike verwysing na die ewige plek van pyniging.

Laat ‘n mens dink aan die eerste hoofstuk van Johannes se evangelie waar Hy oor die Woord van God praat – Jesus – wat die lig vir die mense is (Joh 1:1-14).

Boodskap en betekenis

Die raakpunte met Jesus se bediening is onteenseglik. Maar, die raakpunte met elke kind van God wat volhard in gehoorsaamheid is net so duidelik. Soos Paulus in Romeine 8:31-39 uitroep: “As God vir ons is, wie kan teen ons wees?” En dan lys hy ‘n klomp negatiewe ervarings waarvan nie eers een naby kom daaraan om ‘n skeiding tussen ons en die liefde van die Here vir ons te bewerk nie. Wat ‘n wonderlike stuk bemoediging om te volhard! God sal lig bring in die duisternis, selfs in die diepste duisternis wat jy op die oomblik ervaar.

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.