PSALM 84

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

PSALM 84

¹Vir die musiekleier. Op Haghittiet. Van die Koragiete. ‘n Psalm.

²Hoe lieflik is u woning,

Here, Heerser oor alle magte!

³My hele wese verlang, ja, smag

na die voorhowe van die Here;

my hart en liggaam roep uit

na die lewende God.

⁴Selfs ‘n mossie vind ‘n tuiste,

en ‘n swaeltjie haar nes

waarin sy haar kleintjies neerlê,

by u altare,

Here, Heerser oor alle magte,

my Koning en my God!

⁵Gelukkig is hulle wat in u huis woon!

Hulle loof U gedurig. Sela

⁶Gelukkig is mense wie se krag in U lê!

Die pelgrimstogte leef

in hulle gedagtes:

⁷Trek hulle deur die Baka-vallei,

maak hulle daarvan ‘n landskap

ryk aan fonteine;

die vroeë reën maak dit

selfs vol waterpoele.

⁸Hulle gaan van krag tot krag;

elkeen verskyn voor God in Sion.

⁹Here, God, Heerser oor alle magte,

hoor tog my gebed,

luister tog, God van Jakob! Sela

¹⁰O God, sien ons skild raak,

slaan ag op u gesalfde;

¹¹want ‘n dag in u voorhowe

is beter as duisend daarbuite.

Ek wag liewer op die drumpel

van die huis van my God

as om te woon in die tente

van goddeloosheid.

¹²Ja, ‘n son en skild is die Here God;

genade en eer is wat die Here skenk.

Hy hou wat goed is nie terug van

hulle wat onberispelik leef nie.

¹³Here, Heerser oor alle magte,

gelukkig is mense wat op U vertrou! (2020-vertaling)

Teks en konteks

Die volgende paar Psalms word aan die Koragiete toegeskryf – Ps. 84-88 – met Psalm 86 wat aan Dawid verbind word.

Psalm 84 is ’n besondere beskrywing van die tempel as die spilpunt van God se teenwoordigheid in Israel – beide uit die hoek van die mense wat daar woon (vers 5) as die mense wat die pelgrimstog daarheen onderneem (vers 6). Dit is ook ’n Psalm wat verskeie kere getoonset is en onder ander op pragtige wyse deur Chris Lamprecht as koormusiek  verwerk is.

Twee merkers in die Psalm staan uit: 1) drie saligsprekinge in vers 5,6 en 13 wat die geluk van dié wat in God se huis woon, wie se krag in God lê en wat op Hom vertrou, besing; 2) dat die Here vier keer as “Heerser oor alle magte” (Jahwe ṣeva’ôt – “Here van die leërskare” 1933 vertaling; “Almagtige” 1983 vertaling) geteken word in vers 2,4,9, en 13.

Die Psalm is opgedeel in vier dele: 1) die verlange na die tempel van die Here – vers 2-5; 2) die impak van die God van die tempel – vers 6-8; 3) ’n gebed vir beskerming van God se gesalfde – vers 9-10; 4) die genade wat God vanaf die tempel skenk – vers 11-13.

My siel verlang, ja smag na die voorhowe van die Here – vers 2-5

Die skoonheid van die tempel lê nie net in die prag en praal van die geboue nie, maar in die verknogtheid en verlange van die Psalmis na die lewende God.  Soos die mossies en swaeltjies ’n plekkie daar vind, só wil die Psalmis dit ook ondervind.  Dié mense wat gelukkig genoeg is om daar te woon (in die tempelgeboue) kan die Here gedurig loof.

Hoe gelukkig is mense wie se krag in U lê! – vers 6-8

Dit is egter nie net die priesters en ander tempel amptenare wat gelukkig is nie.  Ook die pelgrims se gedagtes is vol van die ervaringe van die lang togte na die tempel waar hulle krag ontvang het om voor God in Sion te verskyn.    Daarom kan hulle as gelukkig beskryf word, want hulle krag lê in die Here.  Terloops: Die vertaling “dorre laagte” verwys eintlik na die Baka-vallei wat egter nie presies aangewys kan word nie, maar op pad na Jerusalem toe was.

O God, sien om na u gesalfde – vers 9-10

Dat dié deel ’n gebed vir die koning is, word in die oorspronklike afgelei van die beskrywing van hierdie persoon met die woorde skild (beskermer) en gesalfde, hoewel sommige ook dink dat dit miskien na die hoëpriester kon verwys.

’n Dag in u voorhowe is beter as duisend daarbuite – vers 11-13

Die tempel as sodanig is nie die punt van sy argument dat ’n dag in God se voorhowe beter is as ’n duisend daarbuite nie, maar dat hy só die genade en eer wat die Here skenk, kan geniet.  Want dié God is Een wat nie terughou wat goed is nie van dié wat onberispelik lewe nie.

Boodskap en betekenis

Ek neem vers 12 se tweede deel met my saam vandag: “Hy hou wat goed is nie terug van hulle wat onberispelik leef nie.”

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.