Skip to main content

MARKUS 13:1-8

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

MARKUS 13:1-8

PROFETIESE REDE: AFBREEK VAN DIE TEMPEL

(Matt 24:1-2; Luk 21:5-6)

131Toe Hy die tempelterrein verlaat, sê een van sy dissipels vir Hom: “Meester, kyk net watter indrukwekkende klippe en geboue!” 2Jesus sê toe vir hom: “Sien jy hierdie groot geboue? Hier sal beslis nie een klip op ‘n ander gelaat word nie – alles sal afgebreek word.”

PROFETIESE REDE: BEGIN VAN DIE EINDTYD

(Matt 24:3-14; Luk 21:7-19)

3Terwyl Jesus op die Olyfberg, regoor die tempelterrein, gesit het, het Petrus, Jakobus, Johannes en Andreas Hom eenkant gevra: 4“Sê vir ons, wanneer sal hierdie dinge gebeur, en wat sal die teken wees dat al hierdie dinge volbring sal word?”

5Jesus het hulle toe geantwoord: “Pasop dat niemand julle mislei nie. 6Baie sal in my Naam kom en sê, ‘Dit is ek!’ en hulle sal baie mense mislei. 7Wanneer julle van oorloë en gerugte van oorloë hoor, moet julle nie verskrik raak nie. Dit moet gebeur, maar dit is nog nie die einde nie. 8Want nasie sal teen nasie in opstand kom, en koninkryk teen koninkryk. Daar sal aardbewings op een plek ná die ander voorkom, en daar sal hongersnood wees. Hierdie dinge is die begin van die smarte.

9“Maar wat julle betref, wees op julle hoede! Hulle sal julle aan sanhedrins oorlewer, julle sal in sinagoges geslaan word en voor prokurators en konings teregstaan ter wille van My, sodat julle voor hulle kan getuig. 10En die evangelie moet eers aan al die nasies verkondig word. 11Wanneer hulle julle gevange neem en julle oorlewer, moet julle julle nie vooraf bekommer oor wat julle moet sê nie, maar wat ook al op daardie oomblik aan julle gegee word, dit moet julle sê; want dit is nie julle wat praat nie, maar die Heilige Gees. 12Broer sal broer aan die dood oorlewer, en ‘n vader sy kind. Kinders sal teen hulle ouers in opstand kom en hulle doodmaak. 13Julle sal deur almal gehaat word ter wille van my Naam. Maar wie enduit volhard, dié sal gered word.” (2020-vertaling)

Teks en konteks

13:1 Markus is meer presies in sy mededeling dat dit een van sy dissipels is wat Hom op hulle pad uit die tempel uit op die besondere klippe gewys het waarmee die tempel gebou is en hoe majestueus die geboue daar rondom ook is.

13:2 Jesus het egter daarop gereageer met ‘n boodskap van verwoesting. Niks van die grootsheid en prag sal oorbly in die verwoesting wat kom nie. Waarmee Jesus natuurlik die beleg en verowering van Jerusalem in 70 nC voorspel het.

13:3 Die Olyfberg is aan die oostekant van die stad geleë reg oorkant die tempelberg. Jesus lewer hierdie profetiese rede dus terwyl hulle na die tempel kan kyk. Let op hoe die eerste geroepe dissipels, Petrus en Andreas, Johannes en Jakobus, twee pare broers – hier in ‘n ander volgorde as in Markus 1:16-20 genoem – die gesprek met Jesus begin.

13:4 Hulle wil weet wanneer die verwoesting van die tempel waarvan Jesus praat, sal gebeur en aan watter teken hulle die voltrekking van die dinge van die eindtyd sal kan uitken.

13:5-6 Jesus fokus op hulle nodig het om te doen, eerder as wat hulle in detail moet weet. Die eerste opdrag is dat hulle sorg sal dra dat hulle nie mislei word nie. Baie sal onder sy Naam voorgee om Hom te wees of te verteenwoordig, maar mense in die proses mislei.

13:7-8 Hulle moet in die tweede plek nie verskrik raak as hulle van oorloë hoor nie. Dit is alles dinge wat moet gebeur, maar dit is nog nie ‘n teken van die einde nie. Want die konflikte tussen nasies en koninkryke is net die begin van die geboortepyne van God se koninkryk wat aan die kom is. Dieselfde wanorde sal in die natuur sigbaar wees met aardbewings en hongersnode.

13:9-10 Hulle moet in die derde plek op hulle hoede wees vir die vervolging wat hulle sal moet verduur. Die mense wat weerstand bied teen die evangelie sal hulle geregtelik (plaaslike howe), godsdienstig (sinagoges) en polities (stadsleiers en konings) vervolg. Maar dit alles sal as getuienis vir Jesus dien en deel wees van die noodsaaklike verkondiging van die evangelie aan al die nasies.

13:11 Jesus verseker hulle egter ook van die direkte begeleiding van die Heilige Gees ter ondersteuning van hulle getuienis in private en publieke arenas. Hulle moenie bekommerd wees oor wat hulle ter verdediging in sulke situasies moet sê nie, want die onus is op die Gees om hulle in daardie uur te begelei. Daarop kan hulle staatmaak.

13:12 Jesus laat hulle egter nie onder enige illusie dat dit ‘n maklike tyd sal wees nie, want broers sal mekaar uitlewer aan die dood, en vaders hulle kinders. Die omgekeerde sal ook gebeur met kinders wat teen hulle ouers in opstand sal kom, en hulle sal doodmaak.

13:13 Trouens, hulle sal deur almal vanweë my Naam gehaat word. Dit moet hulle egter nie moedeloos maak nie, maar eerder aanspoor om tot die einde te volhard, want dit is net diegene wat gered sal word. Soos Eugene Peterson hierdie laaste vers vertaal: “Stay with it—that’s what is required. Stay with it to the end. You won’t be sorry; you’ll be saved.” (The Message)

Boodskap en betekenis

Jesus stap hiermee beslissend weg van die tempel om die oordeel van God te verkondig in die profetiese rede – die “Klein Apokalips” van Markus – oor almal wat opgevang is in die skynheilige godsdiens van dié pragtige tempel. Met die tempel se voorhangsel wat skeur met sy dood aan die kruis is die weg na God beslissend deur Jesus oopgemaak. Die tempel se bruikbaarheid het daarmee tot ‘n einde gekom (Hebr 10:19-39).

Dink goed na oor die drie goed wat Jesus met hierdie drie opdragte van Hom van jou vandag vra. Die misleiding rondom ons en in die kerk deur valse profete is ‘n daaglikse werklikheid. Die vrees vir die onrus in ons wêreld is eweneens ‘n groot uitdaging. So ook die impak van die sosiale media om ons te dwing om politiek korrek te leef volgens die waardes van die wêreld.

Besluit hoe jy daarop gaan reageer.

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.

View all posts in this series

Leesrooster 2021


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Comments

Maak 'n opmerking

  • Chris van Wyk on Psalm 71Sy het die Here gedien met haar hele hart en eerder my met huisbesoek bemoedig as wat ek dit vir haar gedoen het. Sy was een van die pilare van ons geloofgemeenskap.
  • Neels Fourie on Psalm 71More dr vertel my meer van tannie phoebe
  • Chris van Wyk on 1 Kronieke 28-29Groete!
  • Wansen Engelbrecht on 1 Kronieke 28-29Baie dankie. Groetnis Wansen Engelbrecht Klerksdorp
  • Chris van Wyk on Genesis 1:1-2:3Is dit op 'n selfoon?
  • Johan Kirsten on Genesis 1:1-2:3Middag Chris. Ek merk dat as jy op die "menu" hierbo tik, die blok wat aan die linkerkant verskyn, blanko is. Daar is wel "onsigbare" skakels wat jou na die verskillende bladsye neem. Groete. Johan
  • Chris van Wyk on Psalm 11Dankie, Jenny. Ek het self weer baie moed uit dié Psalm 11 gekry. Veral uit die feit dat ons nie baie beheer het oor die fondamente nie, maar op God kan vertrou wat opregtes suiwer en goddeloses skroei, soos dit in die laaste deel van die Psalm uitgespel word. God kan oneindig meer doen as wat ons k…
  • Jenny on Psalm 11Baie dankie vir die boodskap wat weereens soos vorige boodskappe my help om deur baie swaar tye te kan kom. Die laaste jaar is daar so baie berge wat my toesak dat ek net kan vasklou aan God se woord en U maak dit makliker om sekere dinge beter te verstaan en net aan te hou glo en vertrou. Baie dank…
  • Chris van Wyk on Die Twaalf Kleiner ProfeteDankie Johan, waardeer.
  • Johan v Zyl on Die Twaalf Kleiner ProfeteHi Chris net so baie dankie vir die enorme werk wat jy in Bybelskool doen. Ek gebruik dit elke dag in my bediening hier in Lichtenburg Klipkerk. Ek het op 60 die Bybel herontdek met nuwe passie . Jesusliefde Johan v Zyl
  • Chris van Wyk on Salwing in die BybelEk is bly, Stoffie, dat ek kon help. Die waarhede in die Skrif is ons diepste en enigste beskerming teen dwaling.
  • Stoffie Van Dyk on Salwing in die BybelEk het die afgelope Sondag 'n diens bygewoon wat my baie ontstem het - mense in die gehoor is gesalf deur 'n "profetes", en snaakse dinge het gebeur. Hierdie hele skrywe oor die salfgebruik, en van die antwoorde op vrae was vir my baie leersaam omdat dit vir my Skriftuurlik is. Baie dankie
  • Chris van Wyk on 2 Samuel 18Dankie Lesley, waardeer.
  • Lesley Barnard on 2 Samuel 18Pragtig, ñ mooi toepaslike verduideliking.
  • Chris van Wyk on 2 Samuel 17Hi Hettie. Daar is twee letters in Hebreeus wat amper dieselfde geskryf word, maar verskillend uitgespreek word. Daar is die normale h wat uitgespreek word soos ons dit normaalweg doen. Dan is daar egter ook die letter ḥ (geskryf met 'n h met 'n punt onder) wat anders uitgespreek word. Die uitspraak…