PSALM 147:1-20

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

1 Halleluja! 

Ja, dit is goed om ons God te besing, 

ja, dit is aangenaam – 

‘n loflied is gepas. 

2 Die Here herbou Jerusalem, 

die verstrooides van Israel 

maak Hy bymekaar. 

3 Dit is Hy wat dié met gebroke 

harte genees, 

wat hulle wonde verbind; 

4 wat die getal 

van die sterre bepaal, 

aan hulle almal name gee. 

5 Ons Heer is groot en geweldig sterk; 

aan sy insig is daar geen grens nie. 

6 Die Here help die verdruktes op; 

goddeloses verneder Hy tot in die grond. 

7 Sing vir die Here ‘n danklied; 

besing ons God met begeleiding 

van liere,

8 vir Hom wat die hemel bedek 

met wolke, 

wat vir die aarde reën gereedmaak, 

gras op die berge laat groei, 

9 wat vir die diere hulle kos gee, 

vir die jong kraaie wat krys.

10 Dit is nie die krag van ‘n perd, 

waaroor Hy Hom verheug nie, 

nie die bene van ‘n man, 

waarin Hy vreugde vind nie. 

11 Die Here vind vreugde in hulle 

wat vir Hom ontsag het, 

wat hulle hoop vestig 

op sy troue liefde. 

12 Roem die Here, Jerusalem, 

loof jou God, Sion, 

13 want Hy het die sluitbalke

van jou poorte sterk gemaak, 

Hy het jou kinders in jou geseën, 

14 Hy wat jou grense veilig stel. 

Met die vetste koring versadig Hy jou, 

15 Hy wat sy bevel na die aarde stuur 

– sy woord beweeg vinnig – 

16 Hy wat sneeu gee soos wol, 

ysryp soos as uitstrooi, 

17 wat sy ys soos krummels afgooi. 

Wie kan voor sy koue standhou? 

18 Hy stuur sy woord en laat dit smelt; 

Hy laat sy wind waai 

en water begin vloei. 

19 Hy maak sy woorde 

aan Jakob bekend, 

sy vaste voorskrifte en wette 

aan Israel. 

20 Hy het nie so opgetree 

teenoor enige ander nasie nie; 

sy wette ken hulle nie. 

Halleluja! 

Teks en konteks

Psalm 147 raai die geloofsgemeenskap ook aan om op die Here te vertrou, soos Psalm 146, maar begrond dit nie net in God se kongruente karakter nie, maar veral in sy vreugdevolle versorging wat Hy ten toon stel in die natuur sowel as in die geskiedenis van sy mense: ”Die Here vind vreugde in hulle wat vir Hom ontsag het, wat hulle hoop vestig op sy troue liefde.

Die Psalm kan in drie verdeel word op grond van die opdrag om die Here se lof te besing in vers 1, 7 en 12. In aldrie dele word op verskillende maniere die geweldige grootheid van God besing wat in sy kreatiewe krag in die kosmos ten toon gestel word, sowel as die grenslose genot van God wat in sy vreugdevolle versorging van alles wat leef en beef – kraaie en kinders – ten toon gestel word.  God is groot in sy almag, maar ook vol van genade in sy nabyheid.

Besing God se grootheid in die skepping en die geskiedenis – vers 1-6

Die Psalmis sien God se grootheid raak in sy herbouing van Jerusalem waar die verstrooides vanuit die ballingskap weer ‘n tuiste gevind het, soos Jesaja 40 belowe het.  Hulle gebroke harte is genees en hulle wonde is verbind.  Die Here het die verdruktes weer opgehelp en bevestig.

Die verwysing na die sterre wat die Here name kan gee, word hier eintlik as ‘n metafoor gebruik om sy Herderskap te beklemtoon.  Die Here se geweldige grootheid word nie net gedemonstreer in die feit dat die sterre soos sy skape is wat Hy versorg nie, maar ook in die feit dat Hy sy mense soos sy skape terugbring uit die verstrooiing en bó die goddelose mense verhef en bevestig.

Besing God se vreugde in sy skepping en skepsels – vers 7-11

Hoekom sou God dit doen?  Die Psalmis begrond dit in God se grenslose genot in sy skepping en sy skepsels.  Hy sorg vir hulle almal, omdat Hy in hulle ‘n intense vreugde vind – kraaie en kinders.  Hy verheug Hom in die wolke en die reën, in die gras op die berge sowel as in die diere en die jong kraaie wat krys, en veral in dié wat vir Hom ontsag het en op Hom hoop.

Hy is doodgewoon lief vir almal en wil aan hulle sy genade in oorvloed uitstort en hulle versorg.

Besing God se sorg vir Jerusalem en die natuur deur sy woorde – vers 8-20

Weereens keer die Psalmis terug na die herbouing en beveiliging van Jerusalem en loof die Here vir die seën wat dit vir die kinders in die families en vir die families binne die gemeenskap gebring het.  Hulle kan nou veilig woon en die voorsiening wat God gee in die natuur geniet.

Let op hoe God se woord as effektief beide in die natuur as in die geloofsgemeenskap geteken word.  God stuur sy woorde uit en dit bring reën sowel as insig.  Dit versorg die gemeenskap beide met kos om te eet sowel as met woorde om geestelik van te leef en hulle gemeenskapslewe op te begrond.

Boodskap en betekenis

Oordink vandag die feit dat die Here vreugde vind in hulle wat vir Hom ontsag het. Doen moeite om dinge in die natuur raak te sien – gaan stap buite of kyk ‘n natuurprogram – en laat dit jou ontsag verdiep oor Wie God is en wat Hy doen.

Hierdie God laat Hom nie onbetuig in jou lewe nie. Soos Hy Hom in die natuur aan jou bekend maak, soveel te meer maak Hy Hom in sy Woord aan jou bekend: “Hy maak sy woorde aan Jakob bekend, sy vaste voorskrifte en wette aan Israel.” Loof Hom daarvoor.

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.

View all posts in this series

Leesrooster 2021


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Maak 'n opmerking

%d bloggers like this: