MARKUS 4:35-41

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

MARKUS 4:35-41

³⁵ Op daardie dag toe dit aand geword het, sê Hy vir hulle: “Laat ons oorgaan na die oorkant toe.” ³⁶ En hulle het die skare laat gaan en Hom saamgeneem in die boot waarin Hy was. Daar was ook nog ander bote by. ³⁷ Toe kom daar ’n groot stormwind op en die golwe het in die boot in geslaan, sodat die boot reeds besig was om vol te word. ³⁸ Maar Hy was in die agterstewe op die kussing aan die slaap. Hulle maak Hom toe wakker en sê vir Hom: “Meester, gee U nie om dat ons vergaan nie?” ³⁹ Toe Hy wakker word, het Hy die wind beveel en vir die see gesê: “Word stil, wees kalm.” En die wind het gaan lê en daar het ’n groot kalmte gekom. ⁴⁰ En Hy het vir hulle gesê: “Waarom is julle bang? Het julle nog nie vertroue nie?” ⁴¹ En hulle was baie bevrees en het vir mekaar gesê: “Wie is hierdie man dan dat selfs die wind en die see Hom gehoorsaam?” (ASV)

Teks en konteks

Markus het so pas vir ons van Jesus se verklaring van die doel van die gelykenisse vertel. Hier brei Markus uit oor Jesus se sending na die gebied van die Gadareners, en die wonderwerk rondom die stormwind op die see.

4:35 Met skemeraand – die son was al onder, maar dit was nog lig – sê Jesus vir sy dissipels om na die oorkant van die See van Galilea te vaar. Dit is die gebied van Dekapolis, tien heidense stede (Mark 5:1,20). Jesus sou later weer daarheen gaan, ‘n doofstom man genees wat sy impak op die gebied eksponensieel vergroot het (Mark 7:31).

Dit plaas vir ons Jesus se bediening primêr aan Jode in perspektief. Regdeur sy bediening het Hy ook aandag gegee aan heidene wat oor sy pad gekom het. Ons lees byvoorbeeld nie net van sy bediening in Dekapolis en Gadara nie (Mark 5:1-20), maar ook in Tirus en Sidon (Mark 7:24-30), en in Sesarea-Filippi (Mark 9:14-29).

4:36 Hulle het die skare huis toe gestuur en met die boot waarin Hy opgetree het die vaart aangedurf. Daar was ook nog ander bote by, waarskynlik van sy ander volgelinge.

4:37 ‘n Groot stormwind het opgekom. Die golwe het in die boot in geslaan, sodat die boot gedreig het om te sink van al die water. Simbolies van die teenstand wat baie keer gepaard gaan met ‘n uitreik na ‘n nuwe mensegroep.

Die See van Galilea is 18 x 9 km in oppervlakte, en omdat dit 210 m laer as seevlak lê, en daar heelwat berge en klowe daar rondom is, bekend vir sy winde wat skielik opsteek en sterk kan waai.

4:38 Jesus slaap egter ongesteurd op ‘n kussing in die agterstewe van die boot. Volledig in beheer terwyl dit lyk asof alles vergaan. Die dissipels maak Hom toe wakker met ‘n direkte beskuldiging of Hy as hulle Meester dan nie omgee dat hulle vergaan nie.

4:39 Jesus se reaksie met sy wakker word, is om doodgewoon die wind en see te beheer met ‘n eenvoudige woord: ”Word stil, wees kalm.” Die wind het gaan lê. Die see het kalm geword. ‘n Direkte bewys van Jesus se goddelike mag oor wind en see. Hy beheer die elemente van die natuur soos God talle kere in die verlede gedemonstreer het. Dit is ook dieselfde tipe woorde waarmee Jesus ‘n onrein gees aangespreek het vroeër in die evangelie (Mark 1:25). Jesus het dus mag oor beide die bo-natuurlike en natuurlike wêreld.

4:40 Jesus gebruik dan die geleentheid om hulle oor hulle geloof en vertroue aan te spreek. Dit is van kritieke belang. Hulle vertroue in Hom moet die vrees uitdryf. Anders sal hulle nooit sy opdragte kan uitvoer nie.

4:41 Hulle vrees vir of lafhartigheid (deilos) in die stormwind verander in ‘n ontsag (ephobēthēsan phobon megan – “hulle was baie bang” of letterlik: “hulle was bang met ‘n groot vrees”) vir Jesus en ‘n verwondering oor Wie Hy werklik is, die Een vir wie selfs die wind en see gehoorsaam. Let op laasgenoemde woord, gehoorsaam. Dit getuig van ‘n mag wat Jesus het wat allesomvattend is.

Boodskap en betekenis

Die vraag van Jesus aan die dissipels wanneer Hy die storm stilmaak is die sleutel om die boodskap wat Markus hierin raaksien, te verstaan: “Waarom is julle bang? Het julle nog nie vertroue nie?” (vers 40).

Dit wil voorkom asof die dissipels, ten spyte van al die wonderwerke wat Jesus al gedoen het, nog steeds vir Hom onderskat het, en nie rekening gehou het met Wie Hy werklik is, en wat Hy werklik kan doen nie.  Hoe ironies!  Hy is immers die God waarvan die Psalms sê, dat Hy die golwe van die see kan laat bedaar (Ps 65:8; 89:10).

Ly ons nie maar miskien soos hulle aan dieselfde sindroom van onderskatting nie! Vol vrees en lafhartigheid in ons dissipelskap. In Jesus is ons immers in die teenwoordigheid van God self!  Dit is die basis waarop ons gebede moet berus. Dit is die basis  vanwaar ons ons roeping moet uitvoer.  Die see moet aandurf op pad na die heidene toe, selfs al is die gevaar van die stormwind op die see lewensgroot. God is immers aan die werk in die lewe, selfs in die wind en die weer.

Let op hoe die dissipels se vrees vir die storm verander in ‘n vrees en ontsag vir Jesus. Hy vir wie selfs die wind en die see moet luister. Dit is die begin van ware vertroue. Waar Jesus ‘n groter werklikheid word as die dinge wat dreig om ons te verswelg.

‘n Ietsie ekstra

Lees Jona 1 en vergelyk Jona se slapery (Jona 1:5) met Jesus s’n hier in Markus 4. Dink self na oor die ooreenkomste verskille en wat dit vir jou sê. Twee dinge staan vir my uit:

• Jesus slaap in vertroue en sekerheid en Jona in ontvlugting en vertwyfeling. Jesus weet wat Hy moet doen en is besig om dit uit te voer. Jona juis nie.
• Jesus word ook verwyt soos Jona vir sy slapery, maar waar Jona gevra word om te bid tot sy God, bestraf Jesus self die wind en die see.  Die parallel wys dat Jesus groter is as Jona (vgl Matt 12:41), dat Hy God self is.

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.