PSALM 25:1-10

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

PSALM 25:1-10

Ons lees die Psalm as ‘n geheel om die konteks deeglik te kan verreken:

25:1 Van Dawid. 

א ALEF

Na U, Here, hunker ek. 

ב BET

2 My God, op U vertrou ek; 

laat my tog nie beskaamd staan nie; 

laat my vyande nie oor my jubel nie. 

ג GIMEL

3 Ja, niemand wat op U wag, 

sal beskaamd staan nie; 

maar hulle wat sonder rede 

ontrou is, sal beskaamd staan. 

ד DALET

4 Here, maak u paaie aan my bekend; 

leer my u weë. 

ה HE

5 Lei my deur u waarheid 

ו WAW

en leer my, 

want U is die God wat my red; 

op U wag ek die hele dag. 

ז ZAJIN

6 Dink aan u barmhartigheid 

en u troue liefde, Here, want dit is van altyd af daar. 

ח GET

7 Aan die sondes van my jeug 

en my oortredings 

moet U nie dink nie; 

dink aan my in u troue liefde, 

omdat U goed is, Here.

ט TET

8 Die Here is goed en reg, 

daarom leer Hy sondaars die pad. 

י JOD

9 Mag Hy verdruktes lei in wat reg is; 

mag Hy hulle sy pad leer. 

כ KAF

10 Al die paaie van die Here is troue liefde en waarheid 

vir hulle wat hou by sy verbond 

en sy bepalings. 

ל LAMED

11 Ter wille van u Naam, Here,

vergewe my sondeskuld, 

want dit is groot. 

מ MEM

12 Wie is die mens 

wat vir die Here ontsag het? 

Die Here leer hom die pad 

wat hy moet kies. 

נ NUN

13 Sy lewe verloop voorspoedig 

en sy nageslag sal die land besit. 

ס SAMEK

14 Die Here neem 

hulle wat vir Hom ontsag het, 

in sy vertroue, 

en sy verbond is daar 

om hulle te onderrig. 

ע AJIN

15 My oë bly altyd op die Here, want dit is Hy wat my voete 

uit die vangnet bevry. 

פ PE

16 Draai U na my en wees my genadig, 

want ek is eensaam en magteloos. 

צ TSADE

17 Die benoudheid van my hart 

is oorweldigend; 

lei my uit my kwellinge. 

ר RESJ

18 Sien tog my ellende 

en my swaarkry raak 

en vergewe al my sonde. 

19 Kyk na my vyande, 

hoe baie hulle geword het; 

en hoe fel hulle my haat. 

שׁ SJIN

20 Beskerm tog my lewe en red my; 

laat my nie beskaamd staan nie, 

want ek skuil by U. 

ת TAW

21 Mag onskuld en opregtheid 

oor my wag hou, 

want ek wag op U. 

22 Bevry Israel, o God, 

van al sy benoudheid. 

Teks en konteks

Psalm 25 is ’n akrostiese Psalm.  Elke vers begin met ’n opeenvolgende letter van die Hebreeuse alfabet.  Dit help met die onthou van die Psalm (ten minste vir die Jode!).  En dit help ook om simbolies gesproke die “alfabet van geestelike groei” aan te leer (Elwell). 

Want dit is die behoefte van Dawid, om die pad wat hy gekies het (Psalm 1), enduit met integriteit en opregtheid te kan loop, al is dit nie maklik nie.  Om die waarheid te sê, hy weet dit is onmoontlik om die pad te loop sonder God en sonder dat Hy in alles betrokke is by ’n mens se lewe.

Psalm 25:1-15

Die belangrikste boodskap van die Psalm is in vers 1-2, dat die basis van die geestelike lewe in vertroue gevind word. Trouens, dit is ’n vertrouens Psalm.  Die Psalmis rig hom daarom tot God in die vertroue dat God hom nie in die steek sal laat nie (vers 2). Dit is immers die ervaring van almal wat hul verwagting in God gestel het, dat God die moeite werd is om te vertrou (vers 3).  Daarop maak hy dus staat.

Sy verwagting is dat God hom 1) God se wil sal leer en 2) nie Dawid se sonde teen hom sal hou nie. In vers 4-5a brei hy uit oor sy gewilligheid om deur God onderrig te word, en in vers 5b-7 oor sy afhanklikheid van God se goedheid en vergifnis.  Leerbaarheid en afhanklikheid is dus twee eienskappe wat voortspruit uit vertroue.  Wat natuurlik ook beteken dat dit eintlik net die Here self is wat jou kan leer wat jy moet weet (vgl Jer 31:34, waar dit deel van die visie vir die toekom is, dat elkeen deur die Here geleer sal wees).

Die Psalmis se ervaring is dat God liefde en trou bewys aan dié wat Hom vertrou, van Hom leer, en afhanklik van Hom lewe. Selfs sondaars wat op Hom fokus, word deur God geleer (vers 8-10).

Dit laat hom sy skuld bely in die verwagting dat God hom Sy weë sal leer. Meer nog, hy verwag dat God hom in Sy vertroue sal neem, sy verbond aan hom bekend sal maak, sodat hy blaamloos met God die pad kan stap (vers 11-15).  Laat my dink aan Jesus wat vir sy dissipels gesê het, dat hulle nou sy vriende is, en dat Hy aan hulle alles bekend maak wat die Vader vir Hom gesê het (Joh 15:15).

Psalm 25:16-22

Maar skuldbelydenis alleen kan nie sy situasie herstel nie.  Hy het ook nodig dat God ingryp en hom van sy vyande verlos (vers 16-20).  En die toppunt van sy gebed is dat hy vra dat onskuld (of integriteit) en opregtheid oor hom die wag sal hou, want op U vertrou ek (vers 21).  Daar is dus ’n manier van lewe binne die gevaar van vyandigheid, waar dit ironies genoeg juis onskuld/integriteit en opregtheid is wat jou beskerm.  Dit is soos twee karperde wat jou in die regte rigting trek.  Dit is ook juis die dinge wat die Here se aandag trek –  integriteit en opregtheid – en wat Hom betrek by die praktyk van ons lewe.  Laat my dink aan Daniël wat op dié manier selfs ’n leier in ’n vreemde land en kultuur geword het.

Dié gebed is ook vir sy volk (vers 22), ’n vers wat waarskynlik bygevoeg is om die lied in die liturgie van die tempel te kan gebruik.

Boodskap en betekenis

Leerbaarheid en afhanklikheid is twee onontbeerlike kenmerke van iemand wat met integriteit en opregtheid voor God wil lewe. Dit is wanneer ons God regtig vertrou met ons lewe dat Hy ons ook in sy vertroue neem, die grootste gawe aan ‘n gehoorsame gelowige. Dit is waarom ‘n mens Bybel lees met die verwagting dat God sal praat en sy beloftes daarin vir jou sal waarmaak. Dit is waarom ‘n mens nie bang hoef te wees vir wat in hierdie lewe gebeur nie, want ons weet dat ons hele lewe in sy hande veilig en vrugbaar is.

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.

View all posts in this series

Leesrooster 2021


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Maak 'n opmerking

%d bloggers like this: