JOHANNES 6:51-58

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

JOHANNES 6:51-58

⁵¹Ek is die lewende brood wat uit die hemel neergedaal het. As iemand van hierdie brood eet, sal hy vir ewig leef. En die brood wat Ek sal gee, is my liggaam wat Ek gee vir die lewe van die wêreld.”

⁵²Die Jode het toe onder mekaar gestry en gesê: “Hoe kan hy sy liggaam vir ons gee om te eet?” ⁵³Daarop sê Jesus vir hulle: “Amen, amen, Ek sê vir julle: As julle nie die liggaam van die Seun van die Mens eet en sy bloed drink nie, het julle geen lewe in julle nie. ⁵⁴Wie my liggaam eet en my bloed drink, het die ewige lewe, en Ek sal hom op die laaste dag laat opstaan. ⁵⁵Want my liggaam is ware voedsel, en my bloed is ware drank. ⁵⁶Wie my liggaam eet en my bloed drink, bly in My en Ek in hom. ⁵⁷Soos die lewende Vader My gestuur het, en Ek deur die Vader leef, so sal die een wat My eet, ook deur My leef. ⁵⁸Dít is die brood wat uit die hemel neergedaal het – nie soos die manna wat die vaders geëet het en nogtans gesterf het nie. Wie hierdie brood eet, sal vir ewig leef.”

⁵⁹Dit het Hy in ‘n sinagoge gesê terwyl Hy in Kapernaum onderrig gegee het. (2020-vertaling)

Teks en konteks

6:51 Dan rig Jesus Hom aan almal wat in Hom glo en verseker hulle dat hulle die ewige lewe het. Hy kontrasteer die effek van die manna in die woestyn met die effek wat Hy as die Brood van die lewe het. Die volk het in die woestyn gesterf, want die manna kon hulle nie red nie. Dit is anders met Jesus. Hy gee onsterflikheid in die ewige lewe deur sy eie vlees en bloed.

6:52-59 Soos dit dikwels gebeur as daar teenstand kom, veroorsaak hierdie woorde van Jesus onderlinge konflik by die leiers in die sinagoge in Kapernaum. Hulle kan eenvoudig nie Jesus se boodskap verstaan nie, want hulle probeer dit te letterlik interpreteer. Hy kan tog nie Homself opsny en vir hulle voorsit as ‘n ete nie, maak hulle beswaar.

Jesus ignoreer egter hulle verkeerde interpretasie en herhaal net weer dieselfde boodskap dat Hy die Brood van die lewe is, en voeg daarby dat sy bloed die ware drank is. Hy het immers reeds eet en drink as metafore vir geloof in Hom uitgespel in vers 35. Dié wat dus metafories sy vlees eet en sy bloed drink, beleef ‘n intieme gemeenskap met Hom.

Dit is ook ‘n duidelike heenwysing na die boodskap van die instelling van die nagmaal en sy dood aan die kruis.  Dié wat na Hom toe kom en intiem met Hom saamleef, sal vir altyd lewe. Dié wat vir hierdie intieme gemeenskap nee sê nie, sal die ewige lewe verpas.

Hy verduidelik verder dat dit die tipe gemeenskap is wat Hy met die Vader geniet. Hy lewe as gevolg van die Vader. So sal elkeen wat in Jesus glo– wat Hom eet – ook as gevolg van Hom lewe.

Die gevolge van hierdie helder getuienis was verreikend, want die Jode wou Hom hierna doodmaak. Hy was hierna al hoe meer beperk tot Galilea en kon nie meer sonder meer in Judea bedien nie (Joh 7:1).

Boodskap en betekenis

Dit is duidelik dat hierdie gesprek met die skare en die Joodse leiers die hart is van die boodskap wat Jesus bring. Soos die Vader met Hom in gemeenskap lewe, só wil Hy met gelowiges in gemeenskap lewe. Elkeen wat daarvoor já sê, het die ewige lewe. Elkeen wat daarvoor nee sê, het nie die ewige lewe nie.

Dit sê vir ons twee goed. Die eerste is dat dit die punt is waarop daar skeiding kom tussen dié wat in opstand kom teen Hom en sy boodskap, en dié wat in Hom bly glo en daarom alles wat Hy sê, aanvaar en doen as komende van God die Vader.

Die tweede is dat Jesus ons uitnooi na die mees intieme gemeenskap wat daar in hierdie lewe beskikbaar is. Waar ons in Hom bly en Hy in ons. Waar ons deur God geleer word, en in Hom lewe. Daar is niks wat daarmee vergelyk kan word nie.

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.