PSALM 45:1-2, 6-9

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

PSALM 45:1-2, 6-9

¹Vir die musiekleier. Op “Narsings”. Van die Koragiete. ‘n Maskiel. ‘n Liefdeslied.

²My hart is ontroer deur mooi woorde,

ek dra my verse voor aan ‘n koning.

My tong is die pen

van ‘n vaardige skrywer.

³U is mooier as ander mense,

guns vloei oor u lippe,

daarom seën God u vir altyd.

⁴Gord u swaard aan die heup, o held –

u majesteit en u luister!

⁵Seëvier in u glansrykheid!

Trek op ter wille van waarheid,

nederigheid en geregtigheid!

Laat u regterhand vir u

ontsagwekkende dinge leer.

⁶U pyle is skerp in die hart

van die koning se vyande;

volke val onder u.

⁷U troon, o goddelike wese,

is vir altyd en altyd,

die septer van u heerskappy

is ‘n regverdige septer.

⁸U het geregtigheid lief

en u haat goddeloosheid.

Daarom, o goddelike wese,

het u God u met olie

van vreugde gesalf –

meer as u metgeselle.

⁹Na mirre, adelhout

en wildekaneel

ruik al u klere;

uit paleise van ivoor

maak snaarinstrumente u bly.

¹⁰Die dogters van konings

is versier met u juwele;

aan u regterkant staan die koningin,

getooi in goud uit Ofir.

¹¹Luister, dogter,

kyk en gee aandag!

Vergeet jou volk en die huis

van jou vader.

¹²Dan sal die koning jou skoonheid

onweerstaanbaar vind;

want hy is jou heer

en jy moet laag voor hom buig.

¹³Dogter van Tirus, met geskenke

sal die rykes van die volk

jou guns soek.

¹⁴In volle glorie wag die dogter

van ‘n koning binne,

in haar uitrusting van goudbrokaat.

¹⁵In veelkleurig geweefde klere

word sy na die koning gebring;

jongmeisies, haar vriendinne,

is haar gevolg,

hulle word vir u ingebring.

¹⁶Met vreugderoepe en gejuig

word hulle binnegelei,

gaan hulle die koninklike troonsaal binne.

¹⁷U seuns sal die plekke

van u vaders inneem,

u sal hulle as •hoë amptenare

aanstel in die hele land.

¹⁸Ek wil sorg dat u naam bekend bly

deur alle geslagte heen,

daarom sal mense u prys

vir altyd en altyd. (2020-vertaling)

Teks en konteks

Na die worsteling en smeekgebede van Psalm 42-44 bring Psalm 45 ’n verandering in atmosfeer en fokus.  Een van die Koragiete dra die gedig voor aan die koning (vers 1-2) en:

1. verheerlik die koning se heldhaftige oorwinnings wat geregtigheid laat geskied (vers 3-8).  Let op dat sy skoonheid en wysheid aan God se seën toegeskryf word.  Sy opdrag as koning word verbind aan die stryd vir die waarheid en vir die reg van die hulpelose, soos Spreuke dit ook meermale vermeld.  Sy invloed word vergelyk met dié van ’n verhewe wese waarmee kwasi-goddelike eienskappe aan hom toegeskryf word.
2. besing die lof van die koningin wat die koning met haar skoonheid bekoor (vers 9-16).  Let op die beskrywing van sintuiglike plesier: haar klere ruik lekker, daar is vrolike musiek wat haar hart bly maak, sy is versier met goud van Ofir (baie bekend vir hulle goud, maar ongelukkig vandag heeltemal onbekend – daar is selfs een tradisie wat Ofir met Suid-Afrika identifiseer!).  Sy word aangeraai om haar volledig vir die koning te gee om aan hom te behoort en afskeid te neem van haar volk en familie, iets wat natuurlik nie sonder pyn kon geskied nie, ten spyte van die uitbundige vreugde van die seremonie.

Die Psalm sluit af met ’n gebed vir die bevestiging van sy koninkryk tot roem onder die volke vir altyd (vers 17-18).

Daarom is hierdie Koningspsalm gebruik as ’n huwelikslied vir die koning, soos die opskrif ook te kenne gee: “’n Lied van die liefde”.  Inhoudsgewys laat dit ’n mens dus eerder dink aan die styl van Hooglied (3:6-11) as aan die styl van die ander Psalms in die Psalmboek. 

Boodskap en betekenis

Die Psalm is deur die eeue op verskeie sekondêre betekenisvlakke gebruik. 

1. Die Psalm is later ingespan by gewone huwelike waar oor die bruid en bruidegom in koninklike terme gesing is. 

2. Nog later het die Psalm ’n Messiaanse interpretasie gekry soos ons dit lees in Hebreërs 1:8-9 waar uit Psalm 45:7-8 aangehaal word en op Christus van toepassing gemaak is.

Vergelyk die groot ooreenkomste (“verhewe wese” en “God” is die grootste verskil) in die tabel hieronder:

Psalm 45     7U troon, verhewe wese, staan vir altyd vas, met u koninklike septer laat u geregtigheid geskied. 8U het die reg lief en u haat die onreg, want, verhewe wese, onder groot vreugde het u God u bo u tydgenote tot koning gesalf.

Hebreërs 1 8Maar van die Seun sê Hy:   “U troon, o God, staan vir ewig vas, met u koninklike septer laat U reg geskied. 9U het die reg lief en U haat die onreg. Daarom het God, u God, U onder groot vreugde tot Koning gesalf bo u tydgenote.”

3. Paulus gebruik waarskynlik ook dié Psalm as die vertrekpunt vir sy beskrywing van die huweliksverhouding as soortgelyk aan die verhouding tussen Christus en die kerk (Ef. 5:21-33).

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.