1 SAMUEL 2:1-10

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

1 SAMUEL 2:1-10

HANNA SE GEBED

2¹Hanna het gebid en gesê:

“My hart juig in die Here,

ek is sterk in die Here.

Ek maak my mond wyd oop

teenoor my vyande,

want ek verheug my in u verlossing.

²“Niemand is heilig soos die Here nie,

ja, daar is niemand buiten U nie;

daar is geen rots soos ons God nie.

³Julle moet nie verwaand bly praat nie,

nie vermetele woorde

oor julle lippe laat kom nie;

want ‘n God van kennis is die Here;

deur Hom word dade geweeg.

⁴“Die boë van helde is verpletter, 

maar dié wat struikel,

omgord hulleself met krag.

⁵Hulle wat versadig was,

verhuur hulleself vir brood,

maar hulle wat honger was,

het oorvloed.

Selfs die onvrugbare

gee geboorte aan sewe,

maar die vrou met baie seuns

kwyn weg.

⁶“Die Here maak dood

en Hy maak lewend;

Hy laat na die •doderyk afdaal

en Hy laat daaruit opkom.

⁷Die Here maak arm

en Hy maak ryk;

Hy verneder,

ook verhoog Hy.

⁸Hy laat armes uit die stof opstaan,

van die ashoop af

hef Hy behoeftiges op

om hulle by vooraanstaandes te laat sit

en ‘n ereplek hulle erfdeel te maak.

Ja, aan die Here behoort die fondamente

van die aarde,

Hy het die wêreld daarop geplaas.

⁹“Die voete van sy troue volgelinge

beskerm Hy,

maar goddeloses –

in duisternis word hulle vernietig.

“Ja, dit is nie deur krag

dat iemand seëvier nie.

¹⁰Die Here –

wie teen Hom te staan kom,

word verpletter;

oor hulle laat Hy dit dreun

uit die hemel.

Die Here spreek reg tot by

die uithoeke van die aarde.

Hy gee krag aan sy koning,

Hy gee sterkte aan sy gesalfde.”

¹¹Daarna het Elkana na Rama gegaan, na sy huis toe. Die seuntjie was egter in diens van die Here onder toesig van Eli, die priester. (2020-vertaling)

Teks en konteks

Hanna se blydskap in hoofstuk 2 oor die uitkoms wat die Here gee, laat haar God beskryf as die een wat die normale orde omkeer, van wie belangrik is en wie nie. Sy verbly haar ook meer in die Here as in die uitkoms self.

Let op die motiewe in haar lied van:

1. God wat die mindere seën en
2. dat dit God is wat krag aan die koning skenk.

Sy sê ook: “Hy beskerm sy troue dienaars op hulle pad.” (1 Sam 2:9). Dit is ‘n groot troos en aanmoediging om te volhard op die pad wat die Here met jou loop – en om dit met Hom te loop, en nie volgens jou eie goeddunke nie.

Boodskap en betekenis

Die res van die verhaal in hoofstuk twee bewys eintlik die vorige punt, want Eli se seuns bewys met hulle dade dat hulle nie God se troue dienaars is nie. Maar hulle het nie met die Here rekening gehou nie soos die verhaal ontvou.

Dit is egter tragies hoe die verkeerde optrede van die priesters die mense hulle agting vir die offer aan die Here laat verloor het. En die oordeel wat God oor Eli en sy huis bring, is ‘n les vir enigeen wat ooit in hierdie besondere diens aan die Here staan.

Jy kan in die NT die loflied van Maria gaan lees, want Hanna se lied eggo in Maria s’n, soms selfs woordeliks (Luk 1:46 vv).

Let op hoe Samuel van die begin af ’n linneskouerkleed (efod) dra wat sy priesterlike status aandui, selfs al is hy nog baie jonk (1 Sam 2:18 – vgl 22:18 waar dit direk met die priesters verbind word). Hy tree natuurlik ook as profeet op. Hanna word nog verder geseën met 3 seuns en 2 dogters.

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.