Skip to main content

1 JOHANNES 3:1-7

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

1 JOHANNES 3:1-7

Ons lees weer in konteks:

’n Lewe as kinders van God 

2:28 En nou, kinders, bly in Hom, sodat ons vrymoedigheid kan hê wanneer Hy verskyn, en nie met sy wederkoms deur Hom in die skande gestel word nie.

29 As julle weet dat Hy regverdig is, weet julle ook dat elkeen wat doen wat reg is, uit Hom gebore is. 

3:1 Kyk watter groot liefde die Vader aan ons bewys het, dat ons kinders van God genoem kan word! En dit is ons ook. Om hierdie rede ken die wêreld ons nie, omdat hulle Hom nie leer ken het nie. 2 Geliefdes, nou is ons kinders van God, maar dit is nog nie geopenbaar wat ons sal wees nie. Wat ons weet, is dat wanneer Hy verskyn, ons soos Hy sal wees, omdat ons Hom sal sien soos Hy is.

3 En elkeen wat hierdie vaste hoop op Hom het, hou homself rein, net soos Hy rein is.

4 Elkeen wat sonde doen, beoefen ook wetteloosheid, want sonde is wetteloosheid.

5 Julle weet dat Hy verskyn het om die sondes weg te neem, en in Hom is daar geen sonde nie. 6 Elkeen wat in Hom bly, sondig nie meer nie; elkeen wat aanhou sondig, het Hom nie gesien, en Hom nie leer ken nie. 

7 Kinders, laat niemand julle mislei nie: wie doen wat reg is, is regverdig, soos Hy regverdig is.

8 Wie sonde doen, is uit die Duiwel, omdat die Duiwel van die begin af sondig. Hiervoor het die Seun van God verskyn: om die dade van die Duiwel te vernietig.

9 Elkeen wat uit God gebore is, doen nie meer sonde nie, omdat God se saad in hom bly, en hy kan nie meer aanhou sonde doen nie, omdat hy uit God gebore is.

10 Hieraan is dit duidelik wie kinders van God en wie kinders van die Duiwel is: Wie nie doen wat reg is nie, is nie uit God nie. Dieselfde geld vir iemand wat nie sy broer liefhet nie. (2020-vertaling).

Teks en konteks

Johannes het in hoofstuk 1 ons verbeelding gestimuleer met die klem op die vleesgeworde Woord, die Goddelike geheim van die Inkarnasie van die Woord in Jesus Christus. Hy het dit uitgebrei in hoofstuk 2 met die klem op die leiding van die Heilige Gees. In hoofstuk 3 wil hy ons aanmoedig om ons liefde vir God die Vader te laat oorspoel in ’n rein lewe sowel as praktiese liefde vir mekaar as geloofsgemeenskap.

Daarmee wil Johannes ons help om aan God self verbind te bly. God is na alles die geheim van die geestelike lewe. En kinders van God doen wat reg is en het mekaar lief – 1 Johannes 2:28-3:10. Hy sal dit opvolg met ‘n verdere verduideliking van wat die liefde vir mekaar regtig van ons vra. Ons lê ons lewe vir mekaar af – 1 Johannes 3:11-24.

Johannes motiveer sy oproep om aan te hou om te doen wat reg is in ons teksgedeelte met vyf perspektiewe:

  1. Hy waarsku ons dat ons vrymoedigheid by die Here Jesus se wederkoms skade sal ly as ons beskaamd voor Hom staan oor ons gebrekkige Christelike lewe.
  2. Hy wys ons op Jesus se regverdige karakter wat ons moet aanspoor om te doen wat reg is.  Dit sal aan ons ons kindskap bevestig.
  3. Hy bemoedig ons met die feit dat ons kindskap ’n bewys van God die Vader se groot liefde is.  En dit is inderdaad so, dat ons God se kinders is, hoewel die presiese nuwe gestalte by die wederkoms nog ondeursigtig is.
  4. Dit is dié hoop wat ons aanspoor om onsself rein te hou en die sonde te vermy.  Jesus het immers gekom om ons van ons sonde te verlos en ons deel van Homself te maak.  Ons kan dus nie aanhou met sondig en steeds deel van Hom bly nie.
  5. Die onderskeid tussen dié wat van God is en dié wat van die duiwel is, word in ons lewe van reg doen sigbaar.  Die Here Jesus het gekom om die werke van die duiwel te vernietig.  Wie dus in Hom bly, het deel aan die verlossing van die sonde, want God se saad, sy natuur, bly in hom of haar.

Boodskap en betekenis

Die boodskap kan eintlik nie meer helder as dit gestel word nie. Kinders van God leef rein. Kinders van God doen reg. Kinders van God het mekaar lief. Dit is wat ware Christenskap behels. Enigiemand wat anders beweer, is ‘n valse profeet, ‘n wolf in skaapsklere.

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.

View all posts in this series

Leesrooster 2021


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Maak 'n opmerking

  • Chris van Wyk on 1 Kronieke 28-29Groete!
  • Wansen Engelbrecht on 1 Kronieke 28-29Baie dankie. Groetnis Wansen Engelbrecht Klerksdorp
  • Chris van Wyk on Genesis 1:1-2:3Is dit op 'n selfoon?
  • Johan Kirsten on Genesis 1:1-2:3Middag Chris. Ek merk dat as jy op die "menu" hierbo tik, die blok wat aan die linkerkant verskyn, blanko is. Daar is wel "onsigbare" skakels wat jou na die verskillende bladsye neem. Groete. Johan
  • Chris van Wyk on Psalm 11Dankie, Jenny. Ek het self weer baie moed uit dié Psalm 11 gekry. Veral uit die feit dat ons nie baie beheer het oor die fondamente nie, maar op God kan vertrou wat opregtes suiwer en goddeloses skroei, soos dit in die laaste deel van die Psalm uitgespel word. God kan oneindig meer doen as wat ons k…
  • Jenny on Psalm 11Baie dankie vir die boodskap wat weereens soos vorige boodskappe my help om deur baie swaar tye te kan kom. Die laaste jaar is daar so baie berge wat my toesak dat ek net kan vasklou aan God se woord en U maak dit makliker om sekere dinge beter te verstaan en net aan te hou glo en vertrou. Baie dank…
  • Chris van Wyk on Die Twaalf Kleiner ProfeteDankie Johan, waardeer.
  • Johan v Zyl on Die Twaalf Kleiner ProfeteHi Chris net so baie dankie vir die enorme werk wat jy in Bybelskool doen. Ek gebruik dit elke dag in my bediening hier in Lichtenburg Klipkerk. Ek het op 60 die Bybel herontdek met nuwe passie . Jesusliefde Johan v Zyl
  • Chris van Wyk on Salwing in die BybelEk is bly, Stoffie, dat ek kon help. Die waarhede in die Skrif is ons diepste en enigste beskerming teen dwaling.
  • Stoffie Van Dyk on Salwing in die BybelEk het die afgelope Sondag 'n diens bygewoon wat my baie ontstem het - mense in die gehoor is gesalf deur 'n "profetes", en snaakse dinge het gebeur. Hierdie hele skrywe oor die salfgebruik, en van die antwoorde op vrae was vir my baie leersaam omdat dit vir my Skriftuurlik is. Baie dankie
  • Chris van Wyk on 2 Samuel 18Dankie Lesley, waardeer.
  • Lesley Barnard on 2 Samuel 18Pragtig, ñ mooi toepaslike verduideliking.
  • Chris van Wyk on 2 Samuel 17Hi Hettie. Daar is twee letters in Hebreeus wat amper dieselfde geskryf word, maar verskillend uitgespreek word. Daar is die normale h wat uitgespreek word soos ons dit normaalweg doen. Dan is daar egter ook die letter ḥ (geskryf met 'n h met 'n punt onder) wat anders uitgespreek word. Die uitspraak…
  • Hettie Swart on 2 Samuel 17Baie dankie vir die oopbreek van die Woord. Ek sien dat my Bybel 35 vertaling na Husai verwys en nie Gusai soos in die Bybelstudie aangetoon word nie. Is dit verskillende uitsprake vir dieselfde mens? Help my reg asseblief.
  • Chris van Wyk on Josua 2 – Ragab se ontsag vir Jahwe spaar die verkenners se lewe👍