2 KORINTIËRS 6:1-13

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

2 KORINTIËRS 6:1-13

¹ As medewerkers van God doen ons ‘n ernstige beroep op julle om nie die genade van God tevergeefs te ontvang nie! ² Want Hy sê: 

“Op die regte tyd het Ek na jou geluister, en op die dag van verlossing het Ek jou gehelp.” (Jes 49:8)

Kyk, nou is die gunstige tyd, kyk, nou is die dag van verlossing! ³ Ons gee in geen opsig enige aanstoot aan iemand nie, sodat daar nie met die bediening foutgevind kan word nie. ⁴ Maar in alles beveel ons onsself aan as dienaars van God, met groot uithouvermoë: in verdrukkings, in ontberings, in benoudhede; ⁵ geslaan, in tronke gegooi, in oproere en in swaar arbeid, in slaaploosheid en honger; ⁶ met eerbaarheid, begrip, verdraagsaamheid en vriendelikheid, in die Heilige Gees, en met ongeveinsde liefde; ⁷ met die woord van die waarheid, met die krag van God, met die wapens van geregtigheid vir die regterhand en die linkerhand; ⁸ te midde van eer en oneer, te midde van laster en lof, as misleiers, wat tog opreg is; ⁹ as onbekendes, en tog goed bekend, as sterwendes – maar kyk, ons leef; as gekastydes, wat tog nie doodgemaak word nie (vgl die steniging in Listra – Hand 14:8-28); ¹⁰ as bedroefdes, maar altyd blymoedig, as armes, maar wat baie ander mense ryk maak, as mense wat niks het nie, en tog alles besit. ¹¹ Ons het reguit met julle gepraat, Korinthiërs; ons harte is wyd oop vir julle. ¹² Julle word nie deur ons ingeperk nie, maar julle word deur julleself in julle eie binneste ingeperk. ¹³ Maar doen dít as teenprestasie – ek praat soos met kinders: Stel julleself ook wyd oop vir ons. (2020-vertaling).

Teks en konteks

Paulus spel hier die praktiese implikasies van die versoening uit. Paulus verwys na Jesaja 49 waarin dieselfde boodskap aan die ballinge gegee is dat die Here hulle gebede om verlossing verhoor het, en hulle sal terugneem na hulle land. Hierdie genade van God, die aanbod van die versoening, is so ‘n groot gawe dat dit omhels moet word, anders kan dit heeltemal verniet wees.

Dit tref my dat hierdie genade van God vir Paulus so belangrik is, dat hy, soos iemand een keer gesê het, eintlik in die “opposite spirit” lewe, dws: al word hy bedroef, hy is altyd opgeruimd; al is hy arm, is hy bly dat hy ander mense ryk maak (vers 10).

Dit is die paradoks van die Christelike bediening – die dood van die bedienaar is die lewe van die wat bedien word. Paulus stel dit dus as sy eer om ten spyte van belediging en minagting betroubaar te wees (vers 8), want God se genade en Christus se liefde het hom van binne verander. Waar ander reisende predikers hulle prestasies voorgehou het as aanbeveling aan hulle gehore, hou Paulus se ontberinge voor as aanbeveling. Want, dit wys dat hy dit uit liefde vir God en vir mense doen.

Soos Chrisostomus, die groot prediker van Antiogië, later hieroor sou skryf: “Just as what brings heat makes things expand, so it is the gift of love to stretch hearts wide open; it is a warm and glowing virtue.” (Concerning the Statues 13.1-2)

Boodskap en betekenis

Dit was Jesus se dryfveer … dit was Paulus se dryfveer … en dit is die enigste dryfveer wat ook ons lewens moet rig – die liefde vir God en vir ons naaste.

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.