1 JOHANNES 3:16-24

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

1 JOHANNES 3:16-24

Ons lees weer in konteks:

 Liefde in plaas van haat 

¹¹ Want dit is die boodskap wat julle van die begin af gehoor het: Dat ons mekaar moet liefhê – ¹² nie soos Kain, wat uit die Bose was en sy broer vermoor het nie. En waarom het hy hom vermoor? Omdat sy dade sleg was, en dié van sy broer regverdig. ¹³ Moenie verbaas wees, broers, as die wêreld julle haat nie. ¹⁴ Ons weet dat ons uit die dood oorgegaan het na die lewe, omdat ons ons broers liefhet. Wie nie liefhet nie, bly in die dood. ¹⁵ Elkeen wat sy broer haat, is ‘n moordenaar, en julle weet dat geen moordenaar die ewige lewe blywend in hom het nie.

¹⁶ Hieraan ken ons die liefde: dat Hy vir ons sy lewe afgelê het. Ook ons behoort ons lewe vir ons broers af te lê. ¹⁷ Hoe bly die liefde van God in iemand wat genoeg aardse besittings het en sy broer sien gebrek ly, maar sy hart nogtans vir hom toesluit? ¹⁸ Kinders, ons moenie net met woorde, met die tong, liefhê nie, maar met die daad, in waarheid. ¹⁹ En hieraan sal ons weet dat ons uit die waarheid kom, en met ‘n geruste gewete voor God kan staan: ²⁰ Wanneer ons gewete ons veroordeel, God is groter as ons gewete en Hy weet alles. ²¹ Geliefdes, as ons gewete ons nie veroordeel nie, kan ons met vrymoedigheid voor God staan. ²² En wat ons ook al vra, ontvang ons van Hom, omdat ons sy gebooie onderhou, en doen wat vir Hom aangenaam is. ²³ En dit is sy gebod: Dat ons in die Naam van sy Seun, Jesus Christus , moet glo, en mekaar moet liefhê volgens die gebod wat Hy aan ons gegee het. ²⁴ En wie sy gebooie onderhou, bly in Hom, en Hy in hulle. En hieraan weet ons dat Hy in ons bly: deur die Gees wat Hy aan ons gegee het. (2020-vertaling).

Teks en konteks

Onthou, Johannes wil ons help om aan God self verbind te bly. God is na alles die geheim van die geestelike lewe. En kinders van God doen wat reg is en het mekaar lief. Dit is wat hy in 1 Johannes 2:28-3:10, wat ons vroeër gelees het, vir ons geleer het.

Johannes volg dit nou op met ‘n verdere verduideliking van wat die liefde vir mekaar regtig van ons vra. Ons lewens word gekenmerk deur liefde eerder as haat. Ons lê ons lewe vir mekaar af.

Om reg te doen, om te doen wat God van ons vra, sluit dus altyd die manier in waarop ons met medegelowiges omgaan. Dit het nie net te make met die herstel en versterking van ons verhouding met God nie, maar altyd ook met hoe ons met ander omgaan.

Trouens, sê Johannes, dit was eintlik van die begin af so. En hy illustreer dit met die verhaal van Kain en Abel. Hulle verhaal moet gelowiges bedag maak daarop dat die wêreld hulle sal haat, omdat hulle die medegelowiges liefhet. Hulle moet ook daaruit leer dat iemand wat – soos Kain – sy broer of suster haat, nie die ewige lewe as iets blywend kan besit nie.

Let op dat die teks nie hier net oor fisiese doodmaak van ander praat nie, maar haat as net so sleg beskou. Weereens is Jesus die voorbeeld van naasteliefde. Hy het sy lewe afgelê vir sy mense. Ons moet Hom daarin navolg.

Dié liefde word dan prakties uitgelê dat as jy genoeg aardse besittings het, mag jy nie jou hart toesluit vir ’n medegelowiges wat gebrek ly nie. Liefde moet met dade en nie net woorde nie bewys word.

Dit sal ons ’n goeie gewete voor God gee, wat ook sal inhou dat ons met vrymoedigheid sal kan bid en die ervaring van die inwoning van die Heilige Gees sal geniet.

Boodskap en betekenis

God se standaard vir die Christelike lewe is dat ons sal doen wat Hy vra en in liefde sal leef. Soos Peterson dit vroeër in sy vertaling van vers 10 stel:

“Here’s how you tell the difference between God’s children and the Devil’s children: The one who won’t practice righteous ways isn’t from God, nor is the one who won’t love brother or sister. A simple test.” (The Message)

Dit kan darem amper nie eenvoudiger en duideliker gestel word nie.

Die onderskeid tussen dié wat van God is en dié wat van die duiwel is, word in ons lewe van regdoen en liefde sigbaar. Dit is wat die Gees in ons lewens wil bewerkstellig.

Dit is hoekom die Here Jesus aarde toe gekom het, sê Johannes. Om die werke van die duiwel te vernietig. Want die duiwel is die een wat onreg en liefdeloosheid aanblaas en aanwakker en aanprys. Dit is hy wat die haat in mense se lewens warm hou, wat ons verlei om onsself bó ander te stel, en ons selfsugtige behoeftes te bevredig, maak nie saak hoe nie.

Wie dus in die Here Jesus glo en deur die Heilige Gees begelei word, dié sal saamwerk daarmee dat die werke van die duiwel vernietig word.

Hoe doen ons dit?

Ons laat die Gees toe om die sondige praktyke af te breek op twee maniere.

• Ons laat die Gees toe om die werke van die duiwel te verbreek in ons lewe deur reg te doen. Daarmee wys ons dan ook ondubbelsinnig dat ons kinders van God is.
• Ons laat die Gees toe om die werke van die duiwel te verbreek deur lief te hê op ‘n praktiese wyse. Daarmee wys ons eweneens dat ons kinders van God is, en nie kinders van die duiwel nie.

Dieselfde geld die liefde. Die liefde vir mekaar moet prakties wees: “Hoe bly die liefde van God in iemand wat genoeg aardse besittings het en sy broer sien gebrek ly, maar sy hart nogtans vir hom toesluit?” (1 Joh 3:17).

Jesus is vir ons daarom die voorbeeld van naasteliefde wat ons by uitstek moet nastreef. Hy het die teenoorgestelde gedoen as Kain. Jesus het sy lewe afgelê vir sy mense. Soos Abel, in ‘n sekere sin. Ons moet Jesus daarin navolg – die Abel opsie.

Die liefde kan dus nie net woorde en lippetaal wees nie, maar moet met opregte dade gewys word. Dit gee op die koop toe ongelooflike vryheid in ons gebedsverhouding met God (1 Joh 3:18-24). Waar jou gewete jou immers nie pla nie, kan jy met groot vrymoedigheid vra dat God se wil sal geskied.

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.