PSALM 24

LEES

Raak stil voor die Here in gebed.

Lees die teksgedeelte deeglik deur, selfs 2 of 3 keer, hardop as dit kan. Wat tref jou? Let op vir temas in die gedeelte. Wat sê dit van God? Wat sê dit van mense? Wat sê dit van die wêreld? Skryf dit in jou joernaal neer.

PSALM 24

1 Van Dawid. ‘n Psalm. 

Aan die Here behoort die aarde 

en die volheid daarvan,

die wêreld en dié wat daarin woon, 

2 want Hy het dit op oseane gegrond 

en op strome gevestig. 

3 Wie mag teen die berg 

van die Here opgaan 

en wie mag in sy heiligdom staan? 

4 Die mens met skoon hande 

en ‘n rein hart 

wat nie na nietigheid hunker 

en nie sweer by wat vals is nie, 

5 sal seën ontvang van die Here

en geregtigheid van die God 

wat hom red – 

6 dit is die geslag wat na Hom soek, 

hulle wat u teenwoordigheid opsoek, 

dit is Jakob. Sela

7 Lig op julle koppe, poorte, 

ja, lig julleself op, ewige ingange, 

sodat die roemryke Koning 

kan ingaan. 

8 Wie is hierdie roemryke Koning? 

Die Here, magtig en heldhaftig, 

die Here, heldhaftig in die stryd. 

9 Lig op julle koppe, poorte, 

ja, lig op, ewige ingange, 

sodat die roemryke Koning 

kan ingaan. 

10 Wie is Hy, 

hierdie roemryke Koning? 

Die Here, Heerser oor alle magte, 

Hý is die roemryke Koning. Sela (2020-vertaling).

Teks en konteks

Hierdie Psalm word ten nouste met die ark verbind en is daarom soos Psalm 15 met die tempel verbind. Die twee Psalms vorm die buitenste konsentriese sirkel rondom Psalm 19 se verheerliking van God se stem in die Skepping en in sy Woord.

Die ark van die Here het ‘n besondere geskiedenis. Nie net het dit die sigbare teenwoordigheid van die Here in die woestyn voorgestel nie. Nie net het dit ‘n plek in die heiligdom gehad, in die Allerheiligste deel, nie. Nee, dit was ook die sigbare teenwoordigheid van die Here as Israel geveg het.

In die tyd van Dawid het die ark ‘n rusplek in Jerusalem gekry by die aanvang van sy regering (2 Sam 6). Hier het dit dan gestaan, behalwe as dit tydens ’n oorlog saam met die leër geneem is (2 Sam 11). Elke keer as hulle dan weer terugkom van die oorlog af, het hulle die ark op feestelike wyse in die stad ingeneem (2 Sam 6:5,13).

Blykbaar is hierdie Psalm op twee maniere gebruik met betrekking tot die ark.

  • Eerstens is dit gesing op die eerste dag van die week, om die feit dat die ark ‘n rusplek in Jerusalem gekry het, te vier.
  • En tweedens is dit gesing tydens die optog, wanneer die leërs terugkom van die oorlog af, en hulle die oorwinning kom vier.

Dit is dus ‘n Psalm vir die tot-rus-kom, vir die tuiskoms van die ark, sowel as die viering van God se voortdurende teenwoordigheid by sy volk.

Die Psalm is ook herhaaldelik by die tempel opgevoer.

  • In so ’n opvoering het die mense aan die buitekant van die tempelpoort uitgeroep dat die poort moet oopgaan sodat die magtige Koning kan ingaan.
  • Dan het die priesters aan die binnekant gevra: “wie is hierdie magtige Koning?” en
  • die mense buite het geantwoord: “Die Here, sterk en geweldig, die Here, oorwinnaar in elke stryd.”
  • Dan het die tempelpoort oopgegaan as simbool dat die Here nou by sy mense is.

Die boodskap van die Psalm is daarom tweërlei. Aan die een kant bevestig dit aan die gemeenskap van Israel dat: alles behoort aan die Here. Aan die ander kant verseker dit die mense wat in Sy teenwoordigheid wil lewe: dié God seën sy mense.

  • Let op hoe die fokus in die Psalm spring na die berg van die Here, die Sionsberg, waarheen die ark nou sy terugkeer maak.
  • En die vraag word van binne af vir almal gevra, “Wie mag die berg van die Here opgaan, en en wie mag in sy heiligdom gaan staan?”
  • En die antwoord kom deur die singende skare: “Dié een wie se hande rein en wie se hart suiwer is, wat alle bedrog vermy en geen vals eed aflê nie.”
  • En dan bely hulle saam: “So iemand sal van die Here seën ontvang, en God, sy redder, sal reg aan hom laat geskied.”
  • Dit is die erfenis van mense wat na God se wil vra en Hom dien, dit is hulle wat die ware nageslag van Jakob is en in God se teenwoordigheid mag ingaan.

Soos die gemeente die tempel ingestap het, het hulle gesing en selfs die eeue-oue poorte van die tempel opgeroep om saam te sing en aan die magtige Koning eer te bewys. Hy is sterk en geweldig. Hy is die oorwinnaar in elke stryd. Dit dui duidelik op beide Dawid en die Here self.

Hierdie Psalm is ‘n wonderlike motivering. God seën sy mense, Hy bring vir hulle vrede en Hy bring vir hulle rus. Soos Jesus hierna sou sê: Kom na My toe almal wat vermoeid en belas is, en Ek sal vir julle rus gee (Matt 11:25).

Maar daar is ook ‘n verdere boodskap wat eintlik die hoogtepunt van die Psalm is. Die Psalmis laat die fokus weer terugspring na die Here self, want Hý is die eintlike koning van Israel. Dit is Hý wat die oorwinning gegee het, en dit is Hý wat geloof moet word. En soos die ark dan ingedra is in die tent wat daarvoor opgerig is, en dit in die heiligdom neergesit is, kom Israel tot rus. God is hier, en ons is hier, veilig, vertroos, versorg.

Boodskap en betekenis

Hierdie is ’n Psalm vir tot rus kom by God. Soos die ark in Jerusalem tot rus gekom het in die tempel. Stel jouself gerus met die boodskap dat alles aan God behoort en dat Hy sy mense seën. Ook vir jou.

Die Psalm het ‘n besonder betekenis vir ‘n familie in ons gemeente. In die laaste ure van ‘n besondere man in ons gemeente, het sy familie hierdie Psalm gelees, waarna hy: “Amen, Amen” geroep het, vertel het dat hy die Here Jesus sien en toe gesterf het.

Ek kon nie anders om te wonder of dit nie hierdie keer hy was wat by die hemelse deur gekom het, en daar van binne-af gevra is, wie is daar, en hy kon antwoord, dit is U kind, Here. En die deur het vir hom oopgegaan en daar het hy sy rusplek gekry. Laat sy ervaring jou inspireer om jou lewe só te lewe dat jy ook op dieselfde manier in die hemel verwelkom word.

LUISTER

Dink na oor wat God vir jou hiermee wil sê. Waar raak hierdie gedagtes jou lewe in die praktyk? Wat vra dit van jou? Wat belowe dit vir jou? Wat moet jy dink of doen daarmee? Wat is die kern van die boodskap van dié teks vir jou dag en lewe? Dit help jou sin maak van jou eie ervarings in die lig van God se Woord.

LEEF

Besluit hoe jy daarop gaan reageer. Sê dit vir die Here in gebed. Skryf dit in jou joernaal. Geniet Sy teenwoordigheid. Laat die boodskap wat God jou gee met jou saamgaan deur die dag. Leef dit uit.

View all posts in this series

Leesrooster 2021


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Maak 'n opmerking

%d bloggers like this: