Psalm 140 – Hou my veilig teen geweldenaars

Die Psalm is opgedeel in vyf dele.  Die eerste drie vorm ‘n eenheid en beskryf die situasie van aanvegting waarin die Psalmis (Dawid) verkeer en vra telkens dat die Here hom daaruit sal verlos. Die drie dele word telkens afgesluit met ‘n Sela (140:4,6,9).  Die vierde deel vra dat die Here teen hierdie geweldenaars sal optree (140:10-12).  Die vyfde deel bevestig die getrouheid van die Here aan magteloses en behoeftiges en neem dit as ‘n belofte waarop regverdiges en opregtes altyd weer kan staatmaak (140:13-14).

Hou my veilig teen geweldenaars – vers 1-9

Vers 1-4: Die Psalmis bid dat die Here hom sal red van slegte mense, van geweldenaars, van mense wat booshede beplan, wat gevegte aanhits.  Hulle tonge is so skerp soos dié van slange en die gif van adders skuil agter hulle lippe.  Die skerp punte van slange se gevurkte tong word dus as metafoor vir bitsigheid gebruik, en die gif vir die dodelikheid daarvan.

Interessant genoeg word dié beskrywing van giftige woorde in Rom. 3:13 gebruik as prentjie van die tipe sondes waaraan ons almal skuldig is, en waarvan die Here Jesus ons kom bevry het.  Niemand is dus vanself regverdig nie, selfs nie een nie, sê Paulus.  Ons het God se redding nodig, selfs van ons eie gevurkte tonge en giftige woorde.

Vers 5-6: Die Psalmis bid dat die Here hom sal beskerm van die hande (mag) van goddeloses en hoogmoedige mense.  Woorde verwond, maar magspeletjies verguis en kan ‘n mens maklik ontspoor.  Die Psalmis vra dus dat die Here hom sal bewaar van die vangstrikke wat mense vir hom stel, sodat hy op die pad kan bly wat die Here vir hom aanwys.

Vers 7-9: Die Psalmis bely dat die Here alleen sy God is.  Daarom kan hy met oorgawe sy smeekgebed aan die Here bid.  Hy vra dat die Here hom sal beskut in die tyd van oorlog en nie die goddelose mense sal gee wat hulle begeer nie, dat hulle bose planne nie sal slaag nie, anders sal hulle nog meer verwaand raak.

Vers 8 se laaste deel lui eintlik só: “U beskut my kop in ‘n tyd van oorlog.” (BDV).  Dit is wat agter die NAV se dinamiese vertaling lê: “U beskerm my wanneer die goddeloses my aanval.” Dit is belangrik om die meer letterlike vertaling in gedagte te hou in die lig van die kontras wat in vers 10 getrek gaan word met die koppe van die aanvallers.

Mag een ná die ander ramp geweldenaars inhaal – vers 10-12

Die pleitgebed dat die Here sal optree teen geweldenaars werk met die eksplisiete veronderstelling dat daar ‘n wetmatigheid in die wêreld werksaam is.  Iets wat van God af kom.  Dit is, dat geweld uiteindelik altyd die geweldenaars self vernietig. Soos Jesus ook in die NT sê: “almal wat na die swaard gryp, sal deur die swaard omkom.” (Matt. 26:52).

Daarom bid die Psalmis dat die een ramp ná die ander die geweldenaars sal inhaal: verleentheid (vurige kole – dit laat my dink aan Paulus se beskrywing van skaamte in Rom. 12:20), vernietiging (vuur en bodemlose putte), verslaentheid (nie weer opstaan nie), en ontworteling (nie gevestig nie).

Terloops: vers 10 se eerste deel in die NAV dra nie regtig die betekenis van die Hebreeus reg oor nie.  Dit word in die NAV as volg vertaal: “Dié wat my van alle kante bedreig, verhef hulle teen U; laat hulle dreigemente hulleself tref.”  Die laaste deel is wel korrek, maar die eerste deel word meer korrek vertaal in die BDV: “Die koppe van hulle wat my omring, laat dit oordek word met die onheil wat hulle ander toewens (of meer letterlik: die onheil van hulle lippe).”  Die frase: “verhef hulle teen U”, kom nie in die grondteks voor nie.

Dié vers is duidelik in kontras met die uitspraak in vers 8 waar die Here gevra word om sy kop in ‘n tyd van oorlog te beskut, soos dit letterlik daar lui.  Hy vra dus dat die Here hom sal beskerm teen die geweld van geweldenaars, maar nie dieselfde sal doen vir dié wat voortgaan om onheil oor ander uit te spreek nie.

Ek weet die Here behartig die regsaak van magteloses – vers 13-14

Die Psalmis verklaar stellig dat hy weet dat die Here Homself deur die geskiedenis bewys het as dié een wat die regsaak van magteloses en behoeftiges (armes) behartig het.  Daarop kan regverdiges en opregtes staatmaak.  Dit sluit uiteraard goddeloses en geweldenaars uit.  Maar regverdiges sal die Here kan loof en opregtes sal God se teenwoordigheid as ‘n tuiste ervaar.

Internasionale dag van die Bybel 23 November

Dit is vandag, 23 November, die Internasionale dag van die Bybel na aanleiding van Habakuk 2:14 “Want die aarde sal vol word met die kennis van die heerlikheid van die Here soos die waters die seebodem oordek.”  Daar is ‘n leesplan en die idee is om 12:00 vandag almal saam ‘n gedeelte uit die Bybel te lees.  Gebruik #BibleCelebration en deel met ons die gedeelte wat jou tref.

Ek self gaan hierdie Psalm, Psalm 140, lees, die gedeelte vir die dag by Bybelskool.com​.  Dit is ‘n baie gepaste gebed in die lig van die bedreiging van wêreldvrede op só baie plekke, veral in Frankryk, België, Irak, Iran, Sirië, Kenia, Somalië en nog baie ander.  Geweldenaars is Godloënaars, en dié Psalm verkondig ‘n God wat die regsaak van magteloses en behoeftiges behartig.

Kom ons bid daarvoor.  En bely dat regverdiges sy Naam sal loof; dat opregtes in sy teenwoordigheid sal woon.