Die Psalms bly steeds die mees praktiese boek in die Bybel.  Dit leer ons hoe om na God te luister en insig te kry in sy wil vir ons lewe.  Dit leer ons hoe om te bid, beide wanneer dit sleg gaan en wanneer dit goed gaan.  Daarom is daar klaagpsalms sowel as lofpsalms.  Die wye verskeidenheid van Psalms leer ons dus hoe om God te loof en te aanbid in alle omstandighede.  En dit leer ons hoe om saam met ander vir Hom te leef.  Die Psalms spreek daarom ons hele menswees aan.

Die Psalms help ons om nie net “oor” God te praat nie, maar “met” Hom.  Dit is dan ook die fokus van die volgende Bybelskool oor die laaste en vyfde Psalmboek – Psalm 107-150.  Ek wil jou help om aan die hand van dié Psalms met God besig te raak.

Ons gaan die 43 Psalms van die vyfde Psalmboek elke weeksdag lees, behalwe Psalm 119 wat weens die lengte daarvan in 22 dele gelees gaan word.  Dit gee 64 “Psalms” wat in die derde en vierde kwartaal gelees gaan word.  Die bydraes begin 31 Augustus en eindig 7 Desember.  As jy dit nog nie gedoen het nie, skryf in by Bybelskool om dié bydraes elke weeksdag te ontvang.

EERSTE BYEENKOMS: 2 SEPTEMBER 18:00-19:00 IN DIE KONSISTORIE

Hier is ‘n visuele lusmaker van die belangrikste verse in dié reeks:

• ? – Die LOFPRYSING van God – Psalm 107-109
• ? – Die BELOFTES van God se heerskappy – Psalm 110-118
• ? – Die WANDEL volgens die Woord van God – Psalm 119
• ? – Die BELEWENIS van God – Pelgrims- (120-134) en Aankomsliedere (135-137)
• ? – Die BETROUBAARHEID van God – Psalm 138-145
• ? – Die LOFPRYSING van God – Hallelujaliedere 146-150

By Chris van Wyk

Die Psalms bly steeds die mees praktiese boek in die Bybel.  Dit leer ons hoe om na God te luister en insig te kry in sy wil vir ons lewe.  Dit leer ons hoe om te bid, beide wanneer dit sleg gaan en wanneer dit goed gaan.  Daarom is daar klaagpsalms sowel as lofpsalms.  Die wye verskeidenheid van Psalms leer ons dus hoe om God te loof en te aanbid in alle omstandighede.  En dit leer ons hoe om saam met ander vir Hom te leef.

Die Psalms spreek daarom ons hele menswees aan.  Dit spreek ons intellek aan deur nie net God se betroubaarheid in die verlede in spel te bring nie, maar ook sy beloftes vir die toekoms (kognitief).  Dit leer ons hoe om van harte gehoorsaam te wees veral in hoe die wet as God se riglyne vir die lewe ons tot liefde vir mekaar en ons naaste kan inspireer (konatief).  Dit help ons ook om emosioneel gesond voor God te lewe deur vir ‘n wye reeks emosies plek te maak en maniere te gee om daaraan in ons verhouding voor God uiting te gee (affektief).

Psalmboek 5 (Ps. 107-150) werk met die veronderstelling dat die terugkeer uit ballingskap al plaas gevind het (Ps. 107:2-3: “²So moet die mense sê wat deur die Here bevry is, dié wat Hy uit hulle nood bevry het ³en uit baie lande versamel het, uit die ooste en die weste, die noorde en die suide.”), en loof God vir sy heerskappy oor die nasies (Ps. 108) en fokus op die toekoms wat deur Hom moontlik word vir die volk.

• Psalm 107 funksioneer dus as ’n inleiding vir hierdie deel en loof die Here vir sy goedheid en liefde waaraan daar geen einde is nie. Dit is ook ‘n dankpsalm.
• Psalm 146-150 sluit die vyfde Psalmboek, trouens die hele boek van die Psalms, af met vyf Halleluja-lofliedere.
• Die hart van dié Psalmboek vind ons in Psalm 119 wat op uitgebreide manier die geluk uitspel van een wat sy vreugde in die wet van die Here vind. Dit funksioneer dus as ‘n uitgebreide uitleg van Psalm 1.  Psalm 119 is ‘n alfabetiese akrostiese Psalm waarvan elke opeenvolgende groep van agt verse elke keer met ‘n opeenvolgende letter van die Hebreeuse alfabet begin. Ons gaan dit dan ook oor 22 dae lees om reg te laat geskied aan elke eenheid.

Drie ander reekse Psalms fokus die aandag op omgekeerde wyse op die toekoms, hede en verlede van Israel.

Jy kan natuurlik enige metode gebruik in jou leeswerk van die Psalms.

’n Uitstekende manier om die Psalms te lees is om dit met die Lectio Divina metode te lees.  Lectio Divina is ’n eeue-oue metodiek om die Bybel só te lees dat jy God se stem daarin hoor en leer om op Hom te reageer.  Hier is ’n 6-stap proses wat baie goed werk (Fryling):

Die eerste drie Psalms funksioneer gesamentlik as ‘n inleiding vir die vyfde Psalmboek.  In die breë handel dié drie Psalms oor vryheid, veiligheid en verhoring.

• Psalm 107 handel oor die vryheid wat God in ‘n verskeidenheid van kontekste gegee het, veral ná die ballingskap.
• Psalm 108 handel oor die veiligheid wat die Godsvolk ervaar in die oorwinning wat God gee, al is daar nog talle dinge wat nie reg is nie.
• Psalm 109 handel daarom oor die gebed om verhoring te midde van vele uitdagings om die redding van die Here voluit te kan ervaar.

Daarom begin die Psalms dan ook met ‘n  refrein wat gelowiges as lewensmotto kan gebruik. Dit sluit mense in wat reeds bewus is van die vryheid en veiligheid wat die Here bring.  Dit sluit egter ook mense in wat maar al te bewus is van die uitdagings wat daar steeds bestaan. Dinge waarvoor die Here nog uitkoms moet bewerk.  Dinge waarvoor Hy nog hulle gebede moet verhoor.

Die refrein is dan ook die inleiding van die hele vyfde Psalmboek:

“Loof die Here, want Hy is goed, aan sy liefde is daar geen einde nie!”