Psalm 145 – Die Here is goed vir almal

Psalm 145 is die afsluiting van die groepie Dawid Psalms – Ps. 138-145 – wat God se betroubaarheid deur die eeue bevestig sowel as die goeie bedoelings wat Hy van altyd af het vir sy mense, trouens vir alle mense: “Die Here is goed vir almal.” (vers 9).  Daarom, sê Dawid: “My mond sal die lof van die Here verkondig; alle mense moet sy heilige Naam prys vir altyd en ewig.” (vers 21).

‘n Mens kan die Psalm in twee deel, hoewel elke vers eintlik die hele boodskap van lof in sigself alreeds dra.

• Die eerste deel – vers 1-9 – besing God se lof aan die hand van sy allesoortreffende kwaliteite en karakter, hoewel dit uiteraard verbind is aan die konkrete voorbeelde wat daarvan getuig. God se groot goedheid is lofwaardig vir ewig.
• Die tweede deel – vers 10-21 – raak ‘n bietjie meer spesifiek en besing God se lof meer direk aan die hand van sy groot werke en magtige dade, en maak dit nog meer universeel op alles en almal van toepassing as selfs in die eerste deel van die Psalm. Dit is ook uitsonderlike beloftes wat jy kan aangryp in jou gebede!  God se besondere beloftes verryk die lewe vir ewig.

God is groot goedheid is lofwaardig vir ewig – vers 1-9

Die eerste deel van die Psalm is eintlik ‘n bron van aanhalings oor wie en wat God is.  ‘n Mens kan enige vers neem as ‘n “koringkorrel” vir jou dag om jou oor God te verwonder!

Let op die beskrywing van die meer as tien kwaliteite en karakter van God self:

• sy lofwaardigheid wat vir altyd geprys moet word,
• sy grootheid wat ondeurgrondelik is,
• sy luisterryke majesteit wat alles verlig,
• sy wonders wat ‘n mens uitnooi om vir altyd daaroor na te dink,
• sy ontsagwekkende magtige dade waaroor jy nie kan stil bly nie,
• sy groot goedheid wat mens verstom,
• sy regverdige optrede waaroor ‘n mens net wil juig,
• sy genade,
• sy barmhartigheid,
• sy geduldigheid,
• sy groot troue liefde, en
• sy glansryke koningskap wat mense oral met ontsag vervul.

Trouens: “U koningskap strek oor alle ewighede … deur al die komende geslagte” (vers 13)!

God se besondere beloftes verryk die lewe vir ewig – vers 10-21

Die tweede deel van die Psalm is eintlik ‘n bron van beloftes van wat God doen waarmee ‘n mens jou gebede kan verryk.  Let op die beskrywing van sy groot werk en magtige dade, want elkeen daarvan is ‘n belofte wat in gebed aangegryp kan word, nie net deur die geloofsgemeenskap nie, maar deur die hele mensdom!

Lees dié meer as tien beskrywings as beloftes en maak dit deel van jou gebede:

• Die Here is goed vir almal,
• Die Here ondersteun almal wat val,
• Die Here help almal op wat teneergedruk is,
• Die Here gee almal kos op hulle tyd,
• Die Here versadig al wat lewe met wat hulle wil hê,
• Die Here is regverdig in al sy weë,
• Die Here is getrou aan alles wat Hy gemaak het,
• Die Here is naby almal wat Hom aanroep in waarheid,
• Die Here vervul die wens van dié wat vir Hom ontsag het,
• Die Here hoor die hulpgeroep van dié wat vir Hom ontsag het, en verlos hulle,
• Die Here beskerm almal wat Hom liefhet (maar al die goddelose mense vernietig Hy).

Dít is die Here wat ons aanbid!  Dít is die dinge waarop jy kan staatmaak.  Dít is die dinge waarvoor jy kan intree en die Here se seën op alles en almal kan afbid.  Ook vir jouself.

Ietsie ekstra

Op ‘n tegniese vlak is Psalm 145 ook ‘n akrostiese Psalm soos Psalm 111 en 112.  Vergelyk die Hebreeuse letters wat in die OAV en die BDV aangegee word, maar ongelukkig nie in die NAV verskyn nie.  Dit beteken elke versreël begin met ’n opeenvolgende letter van die Hebreeuse alfabet.  Dit gee ‘n reël (of ‘n vers of selfs ‘n groep verse soos in die geval van Ps. 119) vir elke letter van die alfabet, behalwe dat in Psalm 145 se geval een letter, NUN, uitgelaat is (tussen vers 13-14, d.w.s. tussen MEM en SAMEK), en hier dus net 21 reëls voorkom.

Dit is redelik algemeen in die akrostiese Psalms.  Vergelyk Psalm 25 (KOF word nie gebruik nie), Psalm 34 (KOF word 2 keer gebruik, maar geen WAW of HET nie), en Psalm 37 (ZAJIN word 2 keer gebruik, maar geen HET nie), hoewel Psalm 111, 112, en 119 weer wel al die opeenvolgende letters gebruik.  ‘n Mens moet nogal kop hou om dit raak te sien!

In Psalm 145 se geval kom daar wel in die Griekse en Siriese vertaling van die Psalm (die LXX en die Peshitta) ‘n reël voor wat met NUN begin.  Dit lui só: “Die Here is getrou aan al sy woorde en genadig in al sy dade.”  Dit beteken dat dié reël heel waarskynlik uitgeval het.  Nogal ‘n baie besondere en waardevolle toevoeging tot die boodskap van die Psalm!