Psalm 108 – Ek wil die rooidag met lof wakker maak – u liefde reik tot in die hemel, u trou tot in die wolke

Hierdie Psalm word as ‘n Psalm van Dawid aangekondig en word saamgestel uit twee vorige Psalms van hom in die 2de Psalmboek (42-72): Ps. 57:7-11 en Ps. 60:5-12.  Dié twee Psalms het ontstaan uit onderskeidelik:

• Dawid se vlug vir Saul die grot in, waar hy ten spyte van die gevaar by God skuiling gevind het (Psalm 57 – Van vrees na versekering) en
• die oorwinning oor die Arameërs na God hulle eers verstoot het (Psalm 60 – Laat dit tog weer met ons goed gaan).

Dele van dié twee Psalms word nou hier hergebruik as ‘n lofprysing aan God vir die verlossing uit ballingskap (en ander grotte of gate waarin hulle hulle bevind het) asook as ‘n gebed dat God hulle sal help in die konteks van nuwe vyande.

Daarmee wys die samestellers van die vyfde Psalmboek ook vir ons hoe ons self die Psalms kan inspan in ons eie diverse omstandighede.  Dié Psalms is daar vir hergebruik en vir aanpassing in die pad wat ons self met die Here loop.  Ons kan saam met die Psalm vir God loof vir vorige uitkomste, en Hom smeek vir nuwe uitkomste.

Die Psalm word in twee dele opgedeel:

• LOFPRYSING – 108:2-7 – Die Psalmis voel weer veilig. Sy situasie is omgekeer.  Hy is verlos van die spreekwoordelik gat wat vir hom gegrawe is (gegewe Dawid se ervaring in die grot). Hy wil daarom in die oopte gaan sing, die rooidag wakker maak, omdat God sy situasie verander het. Om die waarheid te sê, die nasies moet hiervan kennis neem.  God se liefde reik tot in die hemel, sy trou tot in die wolke.  Daarom kan Dawid ook staatmaak daarop en by die Here intree daarvoor, dat Hy sy grootheid sal toon, en inderdaad verlossend sal optree om alle mense uit die verskillende vorme van wat as ‘n soort grotbestaan beskryf kan word, te bevry.
• HELP ONS TOG HERE – 108:8-14 – Die Psalmis weet nuwe uitdagings wag. Hy ervaar veral die verraad van Edom as ‘n dreigende gevaar, soos Obadja, Jeremia 49, en Esegiël 25 en 35-36 in die onlangse verlede verwoord het.  “Help ons tog teen die vyand, want die hulp van mense – dit is niks.”  Die vernedering wat hulle aan die hand van Edom ondergaan het, moet omgekeer word.  Hy beroep hom op God se beloftes oor die uitbreiding van hulle grondgebied na Sigem en die Sukkotlaagte – weerskante van die Jordaan – en die feit dat nie net die grondgebied van Israel (Gilead, Manasse en Efraim na die noorde, Juda rondom Jerusalem) aan die Here behoort nie, maar selfs Moab en Edom na die ooste en Filistea na die weste aan die Middellandse See.  “Met God aan ons kant sal ons oorwin, Hy self sal ons vyande vertrap.”

Boodskap

Die boodskap van die Bybel het altyd nuwe toepassings in nuwe situasies.  Dit is waarom dit só belangrik is om jouself in die Woord te verdiep, om die Bybel ‘n huis te maak waarin jy woon.  Want, dan kan jy ook soos hierdie na-ballingskap gemeenskap die ouer Psalms gebruik om ‘n nuwe Psalm te skryf vir die situasie waarin jy jou nou bevind.

Dink vandag aan ‘n situasie waarin jy in ‘n gat geval het of in ‘n grot moes gaan wegkruip het … en die Here jou daaruit verlos het.  Maak dié dag daarom ‘n dag van lofprysing, as jy vroeg genoeg opgestaan het: “maak die rooidag wakker!”   En praat daaroor met mense: “God se liefde reik tot in die hemel, sy trou tot in die wolke.”

Dink ook vandag aan ‘n situasie waarin jy of iemand naby aan jou steeds vasgeval is … en bid dat die Here jou daaruit verlos: “Help ons tog teen die vyand, want die hulp van mense – dit is niks.  Met God aan ons kant sal ons oorwin, Hy self sal ons vyande vertrap.”