Skip to main content

Genesis 39:21-40:23 – Josef lê drome uit in die tronk met God se hulp

655804-breathtaking-space-artDrie frases in vers 21 struktureer die volgende fase van Josef se lewe in Egipte.  Terwyl Josef daar in die tronk was: 1) “was die Here by hom”, en 2) “het Hy Josef sy troue liefde laat ondervind”, sodat 3) “die tronkbewaarder hom goedgesind geword het.

Hoewel Josef dus van ‘n slegte situasie as slaaf in Potifar se huis na ‘n nog slegter situasie in die koninklike tronk beweeg het, is die bepalende faktor steeds die Here se teenwoordigheid in Josef se lewe. Nie net was die teenwoordigheid van die Here by Josef nie, maar die Here het sy lojaliteit, sy besondere troue liefde (die Hebreeuse ḥě·sěḏ) steeds aan Josef bewys.  Daarom was die tronkbewaarder hom goedgesind en plaas hom bykans onmiddelik in beheer van al die gevangenes in die tronk.  Hy was nou verantwoordelik vir alles wat hulle daar moes doen.  Josef was só goed in sy organisastoriese en leidinggewende vermoëns dat die tronkbewaarder eintlik na niks meer omgesien het nie.  Alles was in Josef se hande, soos dit uiteindelik van die hele Egipte waar sou word.

Om die punt te onderstreep, herhaal die skrywer die feit dat dit die gevolg is van die Here wat by hom was en alles wat Josef ook al aangepak het, laat slaag het.

’n Ruk nadat Josef in die tronk gesit is, gebeur daar iets wat Josef se invloedsfeer beslissend sou uitbrei.  Die bekende storie uit ons jeug van die skinker en die bakker van Egipte se koning word vir ons vertel.  Hulle het albei verkeerd opgetree teenoor die farao, hoewel ons nie weet wat presies hulle verkeerd gedoen het nie.  Die farao het vir hulle kwaad geword en hulle beland in die tronk.

Die afwagting neem toe, maar die volgende positiewe ding wat met Josef gebeur, kom eers na ‘n lang tyd verloop het, ongeveer in die elfde jaar van sy tronkstraf (Gen. 41:1).  Trouens Josef sou ongeveer dertien jaar in die tronk deurbring (Gen. 41:46).  In die tydsberekening van die Here verloop daar soms jare voor die tyd ryp is vir wat Hy beplan.

Die skinker en die bakker droom albei een nag ‘n droom, maar wonder oor die uitleg daarvan.  Let op hoe Josef eers invra oor hulle bedruktheid – sy belangstelling kom baie eg oor – en daarna stellig verklaar dat God hulle drome se uitleg ken.  Die uitleg van drome, sê hy, is nie ‘n menslike kuns nie, maar ‘n Goddelike guns.

Die hoof van die skinkers se droom oor die wingerdstok met die drie lote waarvan hy die ryp druiwe in die farao se beker uitdruk, word deur Josef geïnterpreteer dat hy weer oor drie dae in sy amp herstel sal word.

Die hoof van die bakkers se droom was opgewonde oor die gunstige uitleg vir die skinker, maar moes die grusame nuus aanhoor dat sy droom van die drie mandjies met brood op sy kop wat die voëls opgevreet het, beteken dat hy aan ’n paal opgehang sal word waar die voëls sy vleis van hom sal afvreet.

Let op hoe dit net vir die skinker is wat Josef vra dat hy aan hom moet dink en ‘n guns aan Josef moet bewys deur sy saak aan die farao te stel.  Dit is immers net hy wat moontlik ‘n effek op Josef se lot kan hê.  Josef wil hê dat sy verhaal van ontvoering en verontregting die ore van die koning moet bereik.  Hy het niks gedoen wat dié onreg verdien nie.

Dit alles het gebeur soos Josef vir die twee hulle drome uitgelê het.  Na drie dae is die twee weer na die koning met sy verjaarsdag ontbied en die skinker het inderdaad sy pos teruggekry en die bakker is opgehang.

Die hoop dat Josef se verhaal by die koning sou uitkom, het egter beskaam.  Die hoof van die skinkers het nie weer aan Josef gedink nie.  “Hy het van Josef vergeet.”  Soos dit waarskynlik die geval was met sy broers in Kanaän.  Maar nie soos dit die geval was met die eintlike koning, die Here, nie, soos ons in die volgende hoofstuk sal agterkom.  Twee jaar later sou Josef se kans kom.

Dit is ook merkwaardig dat Josef se twee drome in Kanaän vir Josef in die tronk laat beland het toe eers sy broers en daarna Potifar hom in die steek gelaat het. Twee drome van die skinker en bakker in die tronk lei uiteindelik daartoe dat hy as verantwoorde Goddelike uitlegger vir die farao aanbeveel word.  Twee drome van die farao lei uiteindelik daartoe dat hy in die posisie as de facto leier van Egipte aangestel word wat nie net tot Egiptenare se voordeel is nie, maar sy broers, familie en selfs wyer na ander nasies s’n ook.

Die laaste twee drome bevestig dus uiteindelik die ware betekenis van die eerste twee drome, al neem dit ongeveer twintig jaar voor dit waar word.  En dit is nie net sy ouers en broers wat hom daarvoor eer nie.  Hy hou die hele wêreld se lot uiteindelik in sy hand met die wyse plan om koring gedurende die sewe vet jare op te gaar vir die sewe maer jare wat sou kom.  God het hom inderdaad vir die hele wêreld geroep en sy sorg vir alle mense daardeur geïllustreer.

Dit was inderdaad so dat die Here by Josef was, dat Hy hom sy troue liefde laat ondervind het, sodat almal teenoor hom goedgesind geword het, al het dié fase in sy lewe dertien jaar lank geduur.  Selfs sy broers sou uiteindelik sy guns soek en dit vind.  Watter wonderlike getuienis van wat God met ‘n mens se lewe kan doen!

View all posts in this series

Genesis


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Maak 'n opmerking

Onlangse kommentaar

  • Chris van Wyk on 2 SAMUEL 11:1-15Die Skrif is duidelik daaroor dat God nie sonde kan doen nie. Hy keur ook nie sonde ooit goed nie. Hy laat boonop geen sonde ongestraf nie (Eks 34). Dit is in dié lig wat 'n mens die profesie moet verstaan. God laat Dawid aan die gevolge van sy eie sondes oor, dit is dat Absalom onder andere in opst…
  • PHILIPPUS C FOURIE on 2 SAMUEL 11:1-152 Samuel 12 vers 11 waar God aan Dawid sê dat Hy sy vroue aan sy naaste sal gee om by te slaap en dit sal geskied in daglig sodat almal dit sal sien. Ek was deur my naaste hieroor gekonfronteer met die argument: Hoe kan God dit self toelaat en laat gebeur as Hyself hier owerspel toelaat? Dit is mos…
  • Chris van Wyk on Amos 9:1-10Waardeer.
  • Klazina Jacobs on Amos 9:1-10Dankie. Baie insiggewend!
  • Chris van Wyk on Jona 1:1-16Dankie Kobus, ek sien uit na module 4 waar ons saam dieper in die NT gaan delf!
  • Kobus De Wet on Jona 1:1-16More Dr Chris, vanmore is ek weer in verwondering oor die Woord van God na ek u stuk gelees het oor Jon 1:1-16. Ek het altyd in terme van Jona en die vis Jona gelees, uit my sondagskool perpektief, nou ontdek ek die diepte in Jona: die chiastiese rangskikking, God se name en natuurlik die Radam - di…
  • Chris van Wyk on Matteus 17 – Jesus word verheerlik as teken van sy Goddelike weseDankie Monique, dit is my voorreg!
  • Monique Steyn on Matteus 17 – Jesus word verheerlik as teken van sy Goddelike weseDie Bybelskool help my so vreeslik Baie, Om die Bybel en die Woord van Jesus better te verstaan. Ek Wil net Soo Baie dankie se. Wees geseend.
  • Chris van Wyk on 2 Kronieke 1Hi Ayden, verhale uit die OT is voorbeelde wat ons help om te verstaan hoe God in ander se lewens gewerk het - in dié geval Salomo - sodat ons kan kyk of daar raakpunte met ons eie lewe is, en ons die boodskap aan die mense van daardie tyd, ook op onsself van toepassing kan maak. Jy kan die boodskap…
  • Ayden Corbett on 2 Kronieke 1Ekt gebid en gevra dat die Here vir my n vers uit die bybel moet kies en my sal help verstaan wat ek lees en toe maak ek oop op 2 krinieke 1...dra die stukkie n spesifieke betekenis of boodskap buitens dat jy wysheid moet kies om die Here se volk te regeer inplaas daarvan om vir rykdom en n lang Lew…
  • Chris van Wyk on Kolossense 2:6-23 – In Christus Jesus is ons met die volheid van God vervulHi Eugene, alles moet getoets word aan die geskrewe Woord van God. As sy iets sien of sê wat daarmee in stryd is, is dit verkeerd. En as jy dit uitwys, is dit nie 'n sonde teen die Heilige Gees nie.
  • Chris van Wyk on 1 Konings 11:1-43;  2 Kronieke 9:29-31Jesus wys in Matteus 12 en Lukas 11 uit dat sy eie wysheid dié van Salomo oortref. Die koningin van Skeba sal dus in die oordeel opstaan en die geslag van Jesus oordeel, omdat sy op Salomo se wysheid gereageer het, en die Jode nie dieselfde gedoen het met Jesus nie (Matt 12:42; Luk 11:31). Die boods…
  • Chris van Zyl on 1 Konings 11:1-43;  2 Kronieke 9:29-31Chris, sê asseblief iets meer oor die laaste sin van vandag se bydrae. Groete
  • Eugene Beetge on Kolossense 2:6-23 – In Christus Jesus is ons met die volheid van God vervulGoeie dag kan u dalk verduidelik as die vroue predekant helder ligte en engele sien of engele wat tekens doen. Hoe moet n mens as Christen dit verwerk of interpreteer sonder om te laster teen die Heilige gees . U inset word opreg wardeer.
  • Chris van Wyk on Openbaring 19:1-10 – Gelukkig is hulle wat uitgenooi is na die bruilofsfees van die LamHi, dit is beelde wat gebruik word om dieselfde werklikheid uit te druk. In vers 7 word die kerk as 'n bruid uitgebeeld om die intieme verhouding tussen God en sy mense uit te druk. Die bruid is enkelvoud, maar die mense wat deel daarvan is natuurlik meervoud. Maar, dit is nie 'n probleem nie, want…