01 Feb2011

Jesaja 10 – God se vuur verteer en suiwer

Written by Chris van Wyk. Posted in Jesaja

Jesaja vervolg die oordeelsuitspraak teen Israel met ‘n oordeelsboodskap teen Assirië (10:5-19, 28-34) wat onderbreek word met ‘n boodskap van uitkoms vir ‘n oorblyfsel van die volk (10:20-27).

10:5-19: Hier sien ons hoe God se optrede en dié van die werktuie wat hy kies, Assirië in dié geval, verskil. God se bedoeling is om die volk te suiwer deur sy oordeel. Assirië se bedoeling is om te vernietig deur sy veldslae. Dié arrogansie van Assirië word eweneens deur God geoordeel, al gebruik Hy hulle soos ‘n byl of ‘n saag om sy bedoeling uit te voer. God se koninkryk is dus anders en in stryd met die Assiriese wêreldryk (ander nasies word ingesluit in die vernietigende imperialisme).

Die prentjie van God wat ons hieruit kry, is dat Hy die Lewende God is wat nie net die Skepping aan die gang gesit en onbetrokke is by die verloop van die geskiedenis nie. Hy word ook baie spesifiek as die Inisieerder geteken, wat goed laat gebeur. Hy is nie net Iemand wat terugsit en eers later reageer op wat gebeur nie. En Hy doen dit op die wêreldverhoog en nie net in Israel nie – ‘n baie belangrike uitbreiding van die heersende Dawidsteologie.

Selfs al erken mense nie Sy betrokkenheid nie, is Hy agter en deur dit alles besig om sy wil te voltrek in die besluite van mense. Assirië is Syne … al erken hulle dit nie! Hy is dus in beheer ook van hulle geskiedenis, wat ‘n mens met ‘n tikkie meer respek moet laat praat oor groot bewegings wat in die wêreldgeskiedenis gebeur. En dit moet ons versigtig laat wees om met te groot stelligheid veroordelend te wees oor goed wat gebeur. Selfs dit wat sleg is, word steeds deur God gebruik en ingespan in die vestiging van sy koninkryk.

Maar ons kan ook hier sien dat Hy nooit die arrogansie van imperialisme ongestraf laat bly nie. Ons sien dat die Lig van Israel ook ‘n vuur en ‘n vlam word wat verbrand en verteer totdat Assirië volkome vernietig is. ‘n Skrikwekkende interpretasie van die “groot lig” wat eintlik blydskap en vrede en voorspoed bring, soos Jesaja in hoofstuk 9 aangekondig het, maar hier vernietiging. Dit korrespondeer ook met God se Heiligheid – dit is ‘n vuurkool wat sy mense reinig, en ‘n vuurvlam wat sy teenstanders vernietig, al neem dit soms tyd om gestalte te kry (Jes 6).

Daarom dat ek werk met die lewensfilosofie van Niebuhr, as ek dink oor alles wat in die wêreld gebeur, sowel as dit wat met my persoonlik gebeur:

“God is acting in all actions upon you. So respond to all actions upon you as to respond to his action.” (H Richard Niebuhr: The Responsible Self, 126)

10:20-27: Hoewel die oordeelsboodskap steeds in plek bly, belowe die Here ‘n tyd waar dié wat agterbly in die land na die verwoesting, weer op Hom sal vertrou, en daar ‘n oorblyfsel sal terugkom. Die vergelding staan egter vas, met die stukkie hoop wat hulle gebied word, dat dinge in die toekoms anders sal wees. Twee historiese voorbeelde van God se verlossing word as bewyse aangehaal: Gideon teen Midian by die Orebrots (Rigt 7:25) en Moses by die Rietsee (Eks 14). Die volk moet net geduldig wees.

10:28-34: En hulle geduld sal beloon word. Al trek Assirië met gemak deur Israel se dorpe en bring sonder veel teenstand verwoesting waar hulle ook al gaan, sal hulle ondergaan voor hulle die berg van die Here bereik (soos inderdaad gebeur het – Jes 36 vv). Ironies dat Assirië wat die byl van die Here genoem word (10:15) nou deur ‘n ander byl afgekap word, hoewel dit nie nader beskrywe word nie.

View all posts in this series

Tags: Jesaja

Trackback from your site.

Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Comments (1)

Vince Aslett

Feb 1, 2011 at 08:09 | #

“Selfs al erken mense nie Sy betrokkenheid nie, is Hy agter en deur dit alles besig om sy wil te voltrek in die besluite van mense.”

Ek kan net imagine hor hierdie statement die ongelowiges en post moderniste sal laat kriewel van irritasie – te lekker 🙂

Reply

Chris van Wyk

Oct 6, 2021 | #

Hi Karin, jy kan kyk by https://bybelskool.com/hebreers-511-620-gaan-voort-na-volwassenheid-en-hou-stewig-vas-aan-die-hoop-wat-voorle/ Daar skryf ek onder andere:

Die begin kwessies van die Christelike geloof kan ’n mens verhinder om geestelik volwasse te word. Hoekom? Nie net omdat hulle só vasgevang kan word daarin dat hulle nie geestelik volwasse word nie, maar omdat dit eintlik onmoontlik is om iemand wat van dié dinge afvallig geword het – nádat hulle die hemelse gawe gesmaak het, deel gekry het aan die Heilige Gees, die goeie woord van God gesmaak het, sowel as die kragte van die komende bedeling – om dié mense weer opnuut tot bekering te bring. Hulle het wat hulleself betref eintlik die Seun van God opnuut gekruisig en openlik tot skande gemaak, sê die skrywer.

Die boodskap het dan nie sy vrug in hulle gedra nie, en deur weereens op die begin kwessies te fokus, gaan nie maklik enige verandering by hulle bring nie. Dit sal net ’n wonder van God wees wat in sulke gevalle mense tot inkeer kan bring.

Ek hou van die manier waarop William Lane dit sê: “If those who have enjoyed a full and authentic Christian experience should then fall away, a renewal to repentance is impossible” (Word kommentaar). Let op die “if” en die “should“, want die skrywer dink nie só iets is regtig moontlik nie.

Hy sê wel: “Dit is immers onmoontlik om hulle wat eenmaal verlig is, wat die hemelse gawe gesmaak, en deel gekry het aan die Heilige Gees, en wat die goeie woord van God gesmaak, en ook die kragte van die komende bedeling, en tog afvallig geword het, weer opnuut tot bekering te bring, aangesien hulle wat hulleself betref, die Seun van God opnuut kruisig en openlik tot skande maak,” (Hebr. 6:4-6 in BDV).

Hoekom sou ons dit só erg wees, as ‘n mens ter wille van die argument sou bedink? Want dit sou beteken dat die lewende God aktief teengestaan word. Dit is egter iets wat eintlik nie kan gebeur nie.

Daarom is die skrywer nie regtig bekommerd oor die geloofsgemeenskap in Rome nie, want hy is oortuig dat hulle die pad met God na volwassenheid sal stap: “Maar selfs wanneer ons só praat, geliefdes, is ons, wat julle betref, oortuig van beter dinge wat betrekking het op verlossing.” (Hebr. 6:9). Die Here is immers nie onregverdig nie, sien raak wat hulle vir Hom en vir die ander “heiliges” doen. Hy wil net baie graag hê dat elkeen van hulle enduit dieselfde ywer sal toon om die wedloop wat vir hulle voorlê te voltooi, soos dié wat hulle voorgegaan het. In hfst. 11-12 sal hy verder daaroor uitbrei.

Onlangse kommentaar

Chris van Wyk

Oct 6, 2021 | #

Hi Karin, jy kan kyk by https://bybelskool.com/hebreers-511-620-gaan-voort-na-volwassenheid-en-hou-stewig-vas-aan-die-hoop-wat-voorle/ Daar skryf ek onder andere:

Die begin kwessies van die Christelike geloof kan ’n mens verhinder om geestelik volwasse te word. Hoekom? Nie net omdat hulle só vasgevang kan word daarin dat hulle nie geestelik volwasse word nie, maar omdat dit eintlik onmoontlik is om iemand wat van dié dinge afvallig geword het – nádat hulle die hemelse gawe gesmaak het, deel gekry het aan die Heilige Gees, die goeie woord van God gesmaak het, sowel as die kragte van die komende bedeling – om dié mense weer opnuut tot bekering te bring. Hulle het wat hulleself betref eintlik die Seun van God opnuut gekruisig en openlik tot skande gemaak, sê die skrywer.

Die boodskap het dan nie sy vrug in hulle gedra nie, en deur weereens op die begin kwessies te fokus, gaan nie maklik enige verandering by hulle bring nie. Dit sal net ’n wonder van God wees wat in sulke gevalle mense tot inkeer kan bring.

Ek hou van die manier waarop William Lane dit sê: “If those who have enjoyed a full and authentic Christian experience should then fall away, a renewal to repentance is impossible” (Word kommentaar). Let op die “if” en die “should“, want die skrywer dink nie só iets is regtig moontlik nie.

Hy sê wel: “Dit is immers onmoontlik om hulle wat eenmaal verlig is, wat die hemelse gawe gesmaak, en deel gekry het aan die Heilige Gees, en wat die goeie woord van God gesmaak, en ook die kragte van die komende bedeling, en tog afvallig geword het, weer opnuut tot bekering te bring, aangesien hulle wat hulleself betref, die Seun van God opnuut kruisig en openlik tot skande maak,” (Hebr. 6:4-6 in BDV).

Hoekom sou ons dit só erg wees, as ‘n mens ter wille van die argument sou bedink? Want dit sou beteken dat die lewende God aktief teengestaan word. Dit is egter iets wat eintlik nie kan gebeur nie.

Daarom is die skrywer nie regtig bekommerd oor die geloofsgemeenskap in Rome nie, want hy is oortuig dat hulle die pad met God na volwassenheid sal stap: “Maar selfs wanneer ons só praat, geliefdes, is ons, wat julle betref, oortuig van beter dinge wat betrekking het op verlossing.” (Hebr. 6:9). Die Here is immers nie onregverdig nie, sien raak wat hulle vir Hom en vir die ander “heiliges” doen. Hy wil net baie graag hê dat elkeen van hulle enduit dieselfde ywer sal toon om die wedloop wat vir hulle voorlê te voltooi, soos dié wat hulle voorgegaan het. In hfst. 11-12 sal hy verder daaroor uitbrei.
Karin de Kock

Oct 6, 2021 | #

Goeie more Ds Chris,
Dankie dat ek uit Namibië ook ń vraag kan vra.
Hoe moet ń mens Hebreërs 6:4-9 verstaaan?
Baie dankie
Groete
Karin de Kock
Chris van Wyk

Oct 4, 2021 | #

Die vroeë kerk het Openbaring 1:10 se verwysing na die dag van die Here op die Sondag betrek, bv die bekende onderrig van die Didage. Jy kan verder lees by https://bybelskool.com/waarom-vier-ons-nie-meer-die-sabbat-soos-dit-in-die-wet-gebied-word-nie/ en https://bybelskool.com/sabbat/
Sonja

Sep 30, 2021 | #

Hi Chris
Kan jy moontlik vir my verduidelik hoekom jy die dag van die Here as Sondag uitbeeld. Ek sal ook teksverse wat dit ondersteun waardeer.
Chris van Wyk

Sep 30, 2021 | #

Waardeer die terugvoer!
Rudi

Sep 29, 2021 | #

Baie dankie die het die stuk in JAKOBUS vir my Baie beter laat verstaan, baie dankie geseend is jy met die uitleg
Chris van Wyk

Sep 27, 2021 | #

Hi Willie, nee, ek het nog nie die pad van akkreditasie gestap nie. Dit is net vir privaat verryking.
Chris van Wyk

Sep 27, 2021 | #

Spreuke 5:15-21

In Spreuke 5:7-14 borduur die pa voort op die versoeking van die vreemde vrou en waarsku al sy seuns teen die effek wat ontrouheid in die huwelik op jouself kan hê. Ontrouheid in die huwelik is nie speletjies nie! Dit lei tot ’n private hel en publieke skandes, sê Spreuke. Natuurlik is daar genade en vergifnis – so leer ons in die NT. Maar, voorsorg is beter as nasorg.

In Spreuke 5:15-21 keer die pa die situasie om. Sal jy nou graag wil hê iemand anders moet by jou vrou kom slaap? Stellig nie, so, waarom dit aan iemand anders doen? Die punt van die verbod op ontrou is om volle vreugde te vind in die huwelik met die vrou (of man) wat die Here vir jou gegee het. Vers 15: “Drink water uit jou eie opgaarput, en lopende water uit jou eie bron.” Jou vrou moet vir jou alleen wees en nie vir ander saam met jou nie!

Vers 18 herhaal dit: “Mag jou waterbron geseënd wees; verheug jou oor die vrou van jou jeug.”

Let op dat hier in die enkelvoud gepraat word, want dit was altyd die ideaal dat die huwelik monogaam sal wees, soos Jesus helder in Matteus 19 vir ons leer op grond van Genesis 2. Poligamie het via die nageslag van Kain pos gevat, en selfs die Israeliete het die nasies daarin begin navolg. Maar, dit was nooit God se skeppingsdoel met die mens nie. Laat jou vrou (of man) jou dus bedwelm, en niemand anders nie, want God sien en reageer op alles wat jy doen. Hierdie waarskuwing het daarby ook ‘n geestelike kant, want die Here sien dit alles raak. Jou sonde sal jou inhaal, jy sal sterf deur só ‘n gebrek aan selfbeheersing.
Dirk Uys

Sep 27, 2021 | #

Spreuke 5 vers 15 en 18a se uiteensetting asb. hoe moet dit toegepas word in vandag se lewe en persoonlike lewe?
Willie

Sep 27, 2021 | #

Kan mens n diploma of sertifikaat verdien na voltooiing van die kursus