Jesaja in die evangelies

Daarna kan jy my opmerkings aan die onderkant lees, oor wat my getref het.

Wat my tref:

1. Jesaja 6 – Die Here se opdrag in Jesaja 6 om die volk traag van begrip te maak sodat hulle nie hoor nie word in Markus 4:12 geëggo.  Paulus het ook een en ander daaroor te sê in sy brief aan die Romeine (9-10).  Insig in wat God doen, is nie teoreties of van ’n afstand af beskikbaar nie.  Dit is slegs toeganklik vir dié wat glo en in ’n verhouding met Hom staan.  Dit is ’n ongelooflike belangrike ding – selfs vir ons as gelowiges: God se werk is net sigbaar in die geloof.  Dit beteken dat ons na gebeure kyk en God se hand daarin bespeur, terwyl ander dink dat dit toevallig is.
2. Jesaja 7 – Die teken aan Agas in Jesaja 7:14 – “’n Jong vrou sal swanger word en ’n seun in die wêreld bring en sy sal hom Immanuel  noem” – word in Matteus 1:23 met die geboorte van Jesus uit Maria as vervulling daarvan geskets – “’Die maagd sal swanger word en ’n Seun in die wêreld bring, en hulle sal Hom Immanuel noem.’ Die naam beteken God by ons.”  Hieruit is die geloofsbelydenis “gebore uit die maagd Maria” ontwikkel.  Interessant dat dit nie ’n groot kwessie was vir die Bybelskrywers nie. Markus, Johannes, Lukas en selfs Paulus vermeld dit nie eers nie.  Dit doen nie afbreek aan die belydenis nie, maar noop ’n mens om tog versigtig te wees om met te veel absoluutheid te praat oor die “maagdelike geboorte”  veral aangesien daar net een teks is wat as bewysplaas vir só ’n belangrike standpunt en belydenis gegee kan word.  Wat egter belangriker is, is dat Jesus se geboorte, lewe, dood, opstanding, hemelvaart, voorbidding nou vir ons ensovoorts baie sterk Bybelse verwysings het wat ons geloofsbelydenis oor Hom ondersteun.  Hy is die moeite werd om aan vas te klou.  Maria verdien ons respek, Jesus ons aanbidding.
3. Jesaja 29 – Die Here se oordeel oor die volk in Jesaja 29:13 dat hulle mond naby aan Hom is, maar hulle hart ver, word in Markus 7:6-7 geëggo met die verdere kommentaar: “Dit help niks dat hulle My probeer dien deur leerstellings van mense as gebooie van God voor te hou nie.“  Ek vermoed ons sit almal met goed uit die verlede wat vir ons sterk oortuigings is, wat nie noodwendig die toets van die Skrif sal kan deurstaan nie.  En dan is die uitdaging nog boonop, om nie net te praat oor die Here en hoe ons moet lewe nie, maar dit inderdaad en van harte te doen.  Dit is miskien die diepste probleem vandag, dat mense, en ek praat nou van gelowiges, nie vanuit ’n deurleefde verhouding met die Here leef en praat nie.
4. Jesaja 40 – Die oproep tot voorbereiding vir die koms van die Here in Jesaja 40:3 – “Iemand roep: ‘Maak vir die Here ’n pad in die woestyn, maak in die barre wêreld ’n grootpad vir ons God!’” – word aan die bediening van Johannes die Doper verbind in al 4 evangelies: Markus 1:2-3; Matteus 3:3; Lukas 3:4-6; Johannes 1:23.  Markus verbind ook Maleagi se voorspelling van ’n boodskapper (die Verbondsengel) wat die pad voor God sal regmaak aan Johannes die Doper se bediening (3:1).  Ek het nog altyd gewonder oor die klem op hierdie voorbereiding – kon Jesus nie maar net gekom het en gedoen het wat Hy gekom het om te doen nie?  En nou uit die hoek van Jesaja kom ek agter, voorbereiding is ’n kritiese element vir die gereedheid vir en aanvaarding van God se werk.  Dit is waarom luister so belangrik is, en die uitsorteer van hindernisse in jou eie lewe – ek praat nou geestelik – dat jy onbelemmerd met God in verhouding kan leef.
5. Jesaja 53 – Dit bly die sentrum van ons geloof, dat Jesus genesing vir ons menswees se probleme, onder andere siekte, gebring het.  Matteus verbind die profesie aan Jesus se genesingsbediening – Matt 8:17.  Uiteraard is daar goed wat hier regkom, en soms op wonderbaarlike maniere gebeur.  Maar dan is daar ook ander goed wat eers met die nuwe hemel en aarde sal regkom.  En daarvoor kan ons maar net vasklou aan God en wag op sy ingrype.
6. Jesaja 54 – Jesus haal Jesaja 54:13 in Johannes 6:45 aan wat gesê het dat die enigste standhoudende lering deur God gegee kan word: “Al jou inwoners sal leerlinge van die Here wees, en hulle sal altyd vrede geniet.” Jesus maak dan die punt dat elkeen wat deur God geleer is, Hom as Here sal erken: “Elkeen wat na die Vader geluister en van Hom geleer het, kom na My toe”.  Hierdie teks moet ’n mens regtig ter harte neem – jy hoef nooit te voel, jy weet nie genoeg nie, of jy het nie ver genoeg geleer , of wat ook al nie.  God leer sy mense en is heeltemal tevrede as Hy met jou in ’n verhouding kan lewe wat ’n effek op jou lewenstyl kan hê.  Die ander goed – kennis, insig, groot dade vir die Here – is net “icing op die koek”, lekker, maar nie noodsaaklik om met God te kan wandel nie.
7. Jesaja 61 – Lukas vertel in 4:18-19 vir ons dat Jesus Jesaja 61:1-2 as sy roepingsteks geneem het: “omdat Hy My gesalf het om die evangelie aan armes te verkondig. Hy het My gestuur om vrylating vir gevangenes uit te roep en herstel van gesig vir blindes, om onderdruktes in vryheid uit te stuur, om die genadejaar van die Here aan te kondig.”  Jesus verklaar die teks as vervuld in Sy persoon en bediening.  Ek sou wat wou gee om te weet hoe dit gebeur het – miskien in die woestyn as deel van die versoeking deur die duiwel, of vroeër toe Hy aan moedersknie en in die sinagoge die Bybel gelees en uiteindelik bestudeer het.  En in ’n sekere sin is dit natuurlik almal van ons se roepingsteks – om om te gee vir jou medemens, en soos Jesaja sê, hom of haar nie aan hul lot oor te laat nie, dit is waarvoor ons in hierdie lewe geroep is.