Jesaja 51:1-52:12 – Omhels ‘n bruikbare toekoms in jou verlede

Hoofstuk 51:1-16

Let op hoe Jesaja in dié eerste gedeelte 51:1-10 hierdie raad rig aan dié onder die volk wat reg wil doen, wat na die wil van die Here vra.  Die ballingskap was immers ‘n reinigingsproses om die bewussyn van God te herstel.  En die raad wat hy gee is om moed te skep uit dit wat in hulle verlede lê.  In hulle verlede lê die Here se roeping van die aartsouers, Abraham (vader van vele) en Sara (prinses).  Net soos Hy hulle toe geseën het, gaan God dit nou weer vir Sion, vir die volk, doen.  Trouens, dit is nie eksklusief vir hulle bedoel nie, maar ook goeie nuus vir al die volke en nasies.

Die redding sal gou kom.  Let egter op dat dit – soos verskeie ander plekke in Jesaja – weereens kosmiese trekke aanneem, hetsy as metafore vir die lotsverandering van daardie tyd, of met die oog op die finale oordeelsdag.

Let ook op hoe belangrik drie goed in die verandering is: 1) ‘n luister na die Here – 51:1, 4, 7; 2) ‘n vasberade vashou aan God ten spyte van die spot en belediging van mense – 51:7; en 3) ‘n gebed om redding waar spesifiek die dade van die Here in die verlede voor Hom gebring word – 51:9-10.

Dan gaan Jesaja oor tot die beskrywing van die uitkoms wat die volk met hulle terugkeer sal beleef – 51:11-16.  Weereens word hulle gewys daarop dat hulle niks het om voor te vrees nie, en dat vrees eintlik kom wanneer vergeet word wat die Here in die verlede gedoen het.  Die verdrukker is hokgeslaan en die ballinge is binnekort vry.  En dit is die Here wat dit gedoen het.

Hoofstuk 51:17 – 52:12

Dié verandering vir die ballinge het uiteraard ook ‘n effek op Jerusalem en dié wat daar agtergebly het.  Jesaja roep hulle op om wakker te word sodat hulle die verandering kan omhels.  Al het hulle leiers hulle in die steek gelaat, sal God as hul leier optree en die oordeelsbeker wegneem en vir die verdrukkers gee – 51:17-23.

Daarom moet Sion hulle regmaak, mooi klere aantrek, want hulle is losgekoop.  ‘n Nuwe toekoms het aangebreek, roep die wagte op die mure, en die hele wêreld sal dit sien en God daarvoor eer – 52:1-10.

Die oproep aan die ballinge word herhaal om uit Babel te gee pad, hulleself te reinig, en agter God aan terug te keer na Israel toe – 52:11-12.