Jesus stuur die twaalf soos skape tussen wolwe in

MATTEUS 10:16-25

16 “Luister! Ek stuur julle soos skape tussen wolwe in. Wees dus versigtig soos die slange en opreg soos die duiwe.

17 Pas op vir die mense, want hulle sal julle uitlewer aan die geregshowe en julle gésel in hulle sinagoges.

18 Julle sal ter wille van My voor heersers en konings gebring word om getuienis voor hulle en die nasies te lewer.

19 Wanneer hulle julle uitlewer, moenie bekommerd wees oor hoe julle moet praat of wat julle moet sê nie, want op daardie oomblik sal dit vir julle gegee word wat julle moet sê.

20 Dit is immers nie júlle wat praat nie, maar die Gees van julle Vader wat deur julle praat.

21 Die een broer sal die ander broer uitlewer om doodgemaak te word en ’n vader sy kind, en kinders sal teen hulle ouers in opstand kom en hulle doodmaak.

22 Julle sal deur almal gehaat word vanweë my Naam, maar die een wat tot die einde volhard, sal gered word.

23 Wanneer hulle julle in een dorp vervolg, vlug na ’n ander een. Want amen, Ek sê vir julle: Julle sal nie met die stede van Israel klaarkry voordat die Seun van die mens kom nie.

24 ’n Leerling is nie bo sy onderwyser en ’n slaaf bo sy heer nie.

25 Dit is genoeg vir ’n leerling dat hy soos sy onderwyser word en ’n slaaf soos sy heer. As hulle die hoof van die huis Beëlsebul genoem het, hoeveel te meer sy huismense.”

Teks en konteks

10:16-17 Jesus is baie bewus van die feit dat Hy sy dissipels in ‘n baie ongelyke situasie in die wêreld instuur. Hulle sal soos skape onder die wolwe wees, uitgelewer aan die wreedheid van roofdiere (vgl. Luk. 10:3; 12-17; Mrk. 13:9-13).

Hulle moet egter nie “skaapagtig” of naïef wees nie. Hulle moet eerder versigtig (phronimos – onderskeidend) wees soos die slange (Gen. 3:1; 2 Kor. 11:3) en tegelykertyd ook steeds opreg (akeraios – rein, eerlik, deursigtig, suiwer – vgl. Rom. 16:19) soos die duiwe (daarom kon duiwe geoffer word, anders as bv ‘n kraai, omdat hulle rein voëls was), want dit is doodgewoon ‘n feit dat die mense hulle sal uitlewer aan die geregshowe en hulle in die sinagoges sal gésel (Deut. 25:2 – nie meer as veertig houe nie). Hulle moet dus versigtig vir dié situasies wees, maar altyd opreg en suiwer, want gebeur sal dit gebeur.

10:18-20 Wanneer dit dus gebeur – let op die stelligheid daarvan – moet hulle weet dit gaan oor die getuienis wat op geen ander manier teenoor heersers en konings gebring kan word nie. Veral nie uiteindelik onder die nasies waar dit meer geredelik ook kan gebeur waar daar sterk teenstand teen die evangelie is nie.

Daarom kan hulle weet dat hulle kan staatmaak op die ondersteuning van die Gees van God die Vader, dieselfde Gees wat in Jesus aan die werk is. Hy sal hulle leer wat hulle moet sê, selfs in die oomblik waar daar van hulle getuienis gevra word.

10:21-22 Dit is egter nie net in die publieke arena waar dié dinge sal gebeur nie. Broer sal teen broer draai, pa’s teen hulle kinders, kinders teen hulle ouers – selfs tot die dood toe. Mense sal doodgewoon kinders van die Here haat, omdat hulle in die eerste plek die Here Jesus self haat. Die Here sal egter self instaan om dié te red wat tot die einde toe volhard en nie toegee aan die druk nie.

10:23 Die dissipels moet ook nie te lank in ‘n gevaarsone bly nie, want as die vervolging te druk raak, moet ‘n mens verder gaan met die evangelie, soos ‘n mens later in Paulus se bediening verskeie kere sien (bv Tessalonika – Hand. 17). Daar is doodgewoon te veel plekke wat die evangelie moet hoor voor die Wederkoms wanneer die Seun van die mens kom (Dan. 7:13).

10:24-25 Jesus beklemtoon dat hulle nie moet dink dat hulle lyding gespaar sal word nie. Hulle moet eerder geëerd voel dat hulle, soos Hy, deur hierdie dinge moet gaan. As hulle immers die Here Jesus Beëlsebul (“heer van die vlieë” wat met Baäl geassosieer word – 2 Kon. 1:2 – en die naam vir die senior duiwel geword het) genoem het, hoeveel te meer sal hulle dit nie met sy volgelinge doen nie.

Boodskap en betekenis

Nik Ripken praat van die “insanity of obedience” waaroor hy ook ‘n boek geskryf het oor die geloofsgehoorsaamheid van mense in vervolgde lande vandag (kyk by https://nikripken.com/books/the-insanity-of-obedience). Want dit is eintlik dwaas om skape tussen wolwe in te stuur. Hulle het geen natuurlike verdediging nie. Maar, dit is juis hierdie dwaasheid wat sin maak, omdat hierdie skape Jesus as die Goeie Herder en die Gees as die Trooster en Helper het. Hulle gaan nie alleen nie. En dit dien tot ‘n getuienis aan mense wat andersins onbereikbaar is vir die evangelie. Almal moet immers hoor vóór die groot en deurlugtige dag kom waarin God die koningskap aan die Here Jesus gee en dit te laat gaan wees vir bekering en bevryding.