Josef-hulle vlug van Betlehem na Egipte

MATTEUS 2:13-15

13 Nadat hulle teruggekeer het, verskyn daar ’n engel van die Here in ’n droom aan Josef en sê: “Staan op en neem die Kind en sy moeder saam en vlug Egipte toe, en bly daar totdat ek jou sê. Want Herodes gaan probeer om die Kind dood te maak.”

14 Hy het toe opgestaan en die Kind en sy moeder in die nag geneem en na Egipte vertrek,

15 en hy het daar gebly tot die dood van Herodes. So is vervul wat deur die Here deur middel van die profeet gesê is: “Uit Egipte het Ek my Seun geroep.” (Hos. 11:1)

Teks en konteks

2:13-14 God tree steeds beslissend op met die groeiende bedreiging van Herodes en laat Josef met die Kind en sy moeder na Egipte vertrek. ‘n Engel verskyn ‘n tweede keer in ‘n droom aan Josef en beveel hom om na Egipte te vlug en daar te bly totdat die engel hom verdere instruksies gee.

Die detail en duidelikheid van die droom tref ‘n mens, sowel as die tydsberekening. Josef weet presies wat hy moet doen, wanneer hy dit moet doen, hoekom hy dit moet doen, selfs vir hoe lank hy dit moet doen.

Let op dat Jesus vóór sy ma genoem word, ’n aanduiding van die voorrang van dié Kind. Maar let ook op dat Josef onmiddellik reageer op die droom en reeds in die nag vertrek na Egipte, ‘n reis van by die 700 km.

2:15 Josef-hulle het in Egipte gebly tot Herodes se dood. Dit was in 4 v.C. Dié verblyf in Egipte word deur Matteus aan ‘n profesie van Hosea uit die 8ste eeu v.C. verbind. Hosea het verwys na die eerste uittog van Israel uit Egipte (Hos. 11:1). Matteus gebruik dit as ‘n tipologiese voorspelling dat Jesus op soortgelyke wyse uit Egipte deur God na die beloofde land geroep is.

Dit beteken natuurlik steeds dat hulle ‘n tyd van groot ontberings sou tegemoet gaan. Josef-hulle word vlugteling-immigrante. Maar, Josef kan die Here vertrou weens die detail en noukeurigheid van die instruksies. Dit is immers net betyds.

Betekenis en boodskap

Wat ons goed moet besef uit hierdie deel van die verhaal is dat dit beteken Jesus was ‘n vlugteling-immigrant vóór Hy in Nasaret gevestig is. Dit beteken ook dat Jesus en sy ouers, Maria en Josef, verstaan het wat dit beteken om ontwortel te wees. Dit moes vir sy ouers moeilik gewees het om in die vreemde werk te kry, ‘n huis te kry, kos op die tafel te sit, vir ‘n kind te sorg.

Jesus sou op sy beurt die magteloosheid ervaar het dat jy as kind min kan doen om jou lot te bepaal. Jy is uitgelewer aan wat die grootmense besluit. Onder andere oor jou.

Maar, juis hierdie feit, is vir ons van groot betekenis. Daar is eintlik niks wat Jesus nie deurgemaak het nie. Niks wat ons kan deurmaak waarvan Hy nie persoonlike praktiese kennis het nie. Sodat ons met Hom kan identifiseer. Want, Hy het met ons geïdentifiseer. Hy het beleef wat ons beleef. Hy het as jong kind al beleef hoe dit voel om niks te hê nie, boonop in ‘n vreemde land.

Daar is egter meer. Daar is ook niks waarvoor God nie planne het nie. Niks waarvoor Hy nie voorsiening gemaak het nie. Niks wat God kan uitvang, asof Hy nie alles weet nie.

Staan ‘n oomblik stil by dié gedagte. En die betekenis daarvan vir jou eie lewe. Want, dit is die God wat ons dien. Dit is die God wat ons aanbid. Daar is niks wat God kan uitvang nie.

Wanneer ‘n mens die leiding van die Here gehoorsaam, raak die pad wat Hy vir jou het, al hoe duideliker. Lei Hy jou al hoe meer. Raak die kleinste insig uit die interaksie van God en jou lewe, ‘n verdere stukkie lig op jou pad.

Dit is wat hier met Josef gebeur. Hy luister na die engel se boodskap in ‘n droom om Maria as sy vrou te neem. Hy luister na die opdrag van die owerheid om na Betlehem te gaan. God was immers daarin ook besig. Hy luister na die engel in ‘n droom wat hom na Egipte toe laat uitwyk, en sal net hierna wéér luister as hy na Israel toe moet terugkeer en uiteindelik aangesê word om in Nasaret te gaan woon.

Dit is hoe die Here ook met jou wil werk. Soos jy gehoorsaam sy leiding volg, gee Hy al hoe meer leiding. Kom jy op die plekke waar Hy jou wil hê. Dink terug oor die leiding van die Here in jou lewe. Hoe kom jou ervaring ooreen of verskil dit hiervan?

Die omgekeerde is ook waar. Wanneer ‘n mens die leiding van die Here nie gehoorsaam nie, lui raak om te leef in sy wil, óf lui raak in jou luister na sy wil, raak die stem van die Here stiller, of beter gestel, raak jou bewussyn van sy leiding minder, en raak jy onseker oor die pad wat jy moet volg, kan jy eintlik net jou eie kop volg en raak jy onbetrokke en selfs weerstandig in jou verhouding met God. Maak dit vir jou sin?