Gaan in deur die nou poort

MATTEUS 7:13-14

13 “Gaan in deur die nou poort, want wyd is die poort en breed die pad wat na ondergang lei, en dié wat daardeur ingaan, is baie.

14 Hoe nou is die poort en moeilik die pad wat na die lewe lei, en daar is min wat dit kry.”

Teks en konteks

7:13-14 Die metafoor van die twee poorte is ’n baie bekende een, wat ook in ander kulture en godsdienste voorkom, maar hier waarskynlik verwys na die klem op die keuse vir die pad van die lewe eerder as die pad van die dood. Dit is immers wat Jesus met die Bergrede vir sy dissipels wil onderstreep.

Hy sluit hier aan by temas wat reeds in die wet, profete en Psalms aangeraak is. Gaan lees by Moses (Deut. 30:15), Jeremia (Jer. 21:8) en die Psalmdigter (Ps. 1:6) hoe belangrik hierdie idee regdeur die OT is.

Die OT beskou die een pad – die breë pad en die wye poort – as die pad van die dood, die pad van die goddelose.  Die ander pad – die nou pad en die smal poort – is die pad van die lewe, die pad van die regverdige.  Dit is hierdie pad wat Jesus by sy dissipels aanbeveel, al is dit moeilik (The Road Less Traveled), en al is daar min wat hierdie pad vind.

Boodskap en betekenis

Jesus dring dus by die dissipels daarop aan om die pad van die regverdige te kies, nie dié van die goddelose nie.  ’n Mens hoor hier waarskynlik ook iets van wat Jesus later sou sê oor Homself, dat Hyself die weg is na die lewe, ook die poort na die lewe (Joh10), trouens die lewe self (Joh. 14:6). Dit is die pad wat ons moet kies.