Op 10 September 2026 begin my nuwe leesplan op Bybelskool.com: ’n 23-week reis deur die Evangelie van Matteus.

Matteus vertel die verhaal van Jesus op ’n besondere manier. Hy verweef die verhale oor Jesus met Jesus se verkondiging – sy woorde oor die koninkryk van God, dissipelskap en die lewe van sy volgelinge.

Ons lees daarom van Jesus se geboorte en voorbereiding vir sy bediening, sy wonderwerke, roeping van dissipels en konflik met teenstanders; van die Bergrede, die gelykenisse van die koninkryk en sy onderrig aan sy dissipels; van sy bediening in Judea en Jerusalem; en uiteindelik van sy lyding, kruisdood, opstanding en die Groot Opdrag.

Matteus se vyf groot toesprake van Jesus vorm telkens ’n belangrike deel van hierdie verhaal:

• Matteus 5–7: Die Bergrede – die geregtigheid van die koninkryk
• Matteus 10: Onderrig aan die dissipels – die koninkryk het naby gekom
• Matteus 13: Gelykenisse van die koninkryk
• Matteus 18: Verhoudinge in die koninkryk
• Matteus 23–25: Die koms van die koninkryk

Matteus merk hierdie toesprake telkens af met ’n afsluitende sin, soos: “Toe Jesus klaar gepraat het…” (Matt. 7:28) en “Nadat Jesus oor al hierdie dinge klaar gepraat het…” (Matt. 26:1).

Hierdie verwewing van verhaal en verkondiging is belangrik. Matteus wil ons nie net help om in Jesus te glo op grond van wat Hy gesê het nie, maar om Hom na te volg in alles wat Hy gedoen het.

Dit is immers presies wat Matteus self gedoen het.

23 weke – 162 perikope

Ek het die Evangelie van Matteus in 162 perikope opgedeel. Ons lees elke dag een perikoop en beweeg so oor 23 weke deur die hele Evangelie.

Die volledige Bybelteks uit die Afrikaanse Standaard Vertaling (ASV) is by elke leesgedeelte ingesluit. Jy kan dus primêr op die Bybelteks fokus en my kommentaar slegs as ’n leeshulp gebruik.

My kommentaar wys op dinge wat my self getref het in my besig wees met Matteus – dinge in die teks, die konteks en die betekenis daarvan vir ons lewe.

Maar daar is iets wat vir my belangriker is:

Wat jy self gaan lees, luister en leef, is belangriker as wat ek skryf.

Kom reis saam deur Matteus. Lees stadig. Luister aandagtig. En laat Jesus se woorde en voorbeeld jou telkens weer roep:

Kom en volg Hom.

Ontvang die leesplan

As jy die bydraes elke week in jou Inbox wil ontvang, kan jy hier inskryf:

Skryf in op Bybelskool.com

As jy dit eerder per WhatsApp wil ontvang, kan jy hier aansluit:

Sluit by die WhatsApp-leesplan aan

Die reis begin 10 September 2026.

Kom en volg Hom.

Vorige bydraes

Matteus

Matteus, die skrywer van hierdie Evangelie, is die dissipel en apostel Matteus in die Evangelies (Matt. 9:9; 10:3) soos deur talle kerkvaders bevestig. Markus en Lukas beskryf hom as Levi in hulle Evangelies (Mrk. 2:14; Luk. 5:27), hoewel hulle hom slegs as Matteus in die lys van apostels insluit (Mrk. 3:18; Luk. 6:15).

Dit is egter waarskynlik dieselfde persoon, omdat al drie Evangelieskrywers dieselfde gebeure met Matteus/Levi se roeping beskryf. Matteus en Levi is beide Hebreeuse name, maar die naam Matteus het ook ‘n Griekse ekwivalent gehad wat “dissipel” beteken. Dit kan die gebruik van die twee name vir Matteus verklaar, die een ‘n Griekse (Matteus), en die ander ‘n Hebreeuse naam (Levi).

Hoewel Matteus/Levi – soos Jakobus, die “Kleinere” – as die “seun van Alfeus” beskrywe word (Mrk. 2:14; vgl. Matt. 10:3; Mrk. 3:18; 15:40; Hand. 1:13), is daar is geen ander historiese getuienis wat hulle as broers aan mekaar koppel nie. Hulle was dus waarskynlik uit verskillende huise afkomstig.

Jesus word as Messias en Koning vir Israel en die nasies gebore

Die Evangelie volgens Matteus word nie om dowe neute aan die begin van die NT geplaas nie. Dit is die Evangelie wat die verhaal van Jesus Christus op die mees direkte wyse aan die OT verbind.

Jesus is volgens Matteus die hoogtepunt en vervulling van die Messiaanse verwagting van die hele OT verhaal. Dit sien ‘n mens in die baie moeite wat Matteus regdeur sy Evangelie doen om Jesus se lewe en bediening aan die vervulling van OT beloftes en profesieë te koppel (meer as 60 aanhalings en toespelings).

Jesus se lewensveranderende woorde (aangebied in vyf toesprake), sy magtige werke (geïllustreer onder andere deur agtien wonderwerke) en sy simboolryke dade (bv. die reiniging van die tempel en die vervloeking van die vyeboom) wys onomwonde dat Hy die langverwagte Messias van die profetiese tradisie is.

Jesus is ook die “Seun van Dawid” (Matt. 1:1 en nog agt ander kere só genoem) en die “Seun van God” (Matt. 14:33 en nog sewe ander kere só genoem, onder andere deur die duiwel, die dissipels en die Romeinse offisier en sy soldate by die kruisiging). Dit is titels wat beide sy menslike as sy Goddelike kant beklemtoon. Hy is beide die nakomeling van Dawid as nakomeling van God.

Hierdie Jesus, sê Matteus, se geboorte kondig sy Koningskap vir Israel en die nasies aan. Sy Koninkryk word veral openbaar deur sy wonderwerke en woordbediening totdat hy sy Koninkryk gevestig het met sy lyding, kruisdood en opstanding aan die einde van die Evangelie.

Geen wonder dus dat dié Evangelie die mees-gebruikte Evangelie van die vroeë kerk was nie, soos ons aflei uit die feit dat die vroeë kerkvaders twee keer meer keer uit dié Evangelie aanhaal in hulle geskrifte as uit die ander drie Evangelies saam.

18 Die geboorte van Jesus Christus was só: Toe Maria, sy moeder, aan Josef verloof was, voor hulle intiem verkeer het, het dit geblyk dat sy swanger is deur die Heilige Gees.

19 Josef, haar man, was wetsgehoorsaam, maar wou haar nie in die openbaar verneder nie, en het besluit om in die geheim die verlowing met haar te verbreek.

20 Terwyl hy dit oorweeg het, het daar ’n engel van die Here in ’n droom aan hom verskyn en gesê: “Josef seun van Dawid, moenie bang wees om Maria as jou vrou by jou te neem nie, want wat in haar verwek is, is deur die Heilige Gees.

21 Sy sal geboorte gee aan ’n Seun, en jy moet Hom Jesus noem, want Hy sal sy volk van hulle sondes verlos.”

22 Dit alles het gebeur sodat vervul sou word wat deur die Here deur middel van die profeet gesê is:

23 “Kyk, die maagd sal swanger word

en geboorte gee aan ’n Seun,

en hulle sal Hom Immanuel noem,” (Jes. 7:14)

wat vertaal word: “God is met ons.”

24 Toe Josef uit sy slaap wakker word, het hy gemaak soos die engel van die Here hom beveel het, en hy het haar by hom as vrou geneem.

25 En hy het nie met haar intiem verkeer totdat sy geboorte gegee het aan ’n seun nie. En hy het Hom Jesus genoem.

Ons lees vervolgens Matteus se vyf verhale van Jesus se kinderjare of meer korrek, sy peuter jare (0-3).

Matteus fokus op die reaksies van ’n wye reeks mense op die bekendstelling van God se herderleier, Jesus, in vervulling van die OT beloftes. Hy vertel vir ons van die besoek van die sterrekundiges, die reaksies in Jerusalem, die ontmoeting in Betlehem, die vlug na Egipte, die kindermoord deur Herodes, die terugkoms uit Egipte, en die uiteindelike verblyf in Nasaret.

Die gebeure van hoofstuk 2 vind duidelik ‘n tyd ná die geboorte van Jesus plaas. Die sterrekundiges gaan “in die huis” in om voor Jesus neer te kniel en Hom te aanbid. Hulle is dus nie meer in die stal nie. Josef-hulle het dus ‘n geruime tyd in Betlehem gebly vóór hulle eers na Egipte toe uitgewyk het, en daarna in Nasaret gaan bly het.